Read Moroccan Standard Translation رِسَالَةْ أَفَسُسْ 4 Bible Online

رِسَالَةْ أَفَسُسْ 4 - Moroccan Standard Translation bible

رِسَالَةْ أَفَسُسْ 4

¹الْفَصْلْ الرَّابْعْ عْلَى هَادْشِّي، كَنْطْلَبْ مْنّْكُمْ أَنَا الْمْسْجُونْ عْلَى وْدّْ الرَّبّْ، بَاشْ تْعِيشُو الْحَيَاةْ اللِّي كَتْرْضِي اللَّهْ وْاللِّي عْلَى وْدّْهَا عَيّْطْ لِيكُمْ.

²كُونُو دِيمَا مْتْوَاضْعِينْ، وْلْطَافْ، وْصْبَّارِينْ، وْتّْحَمّْلُو بْعْضِيَّاتْكُمْ فْالْمْحَبَّة.

³وْدِيرُو جَهْدْكُمْ بَاشْ تْبْقَاوْ مْحَافْضِينْ عْلَى الْوَحْدَة دْيَالْ الرُّوحْ الْقُدُسْ بْالْهْنَا اللِّي كَيْجْمَعْكُمْ.

⁴رَاهْ كَايْنَة دَاتْ وَحْدَة، وْرُوحْ قُدُسْ وَاحْدْ، كِمَا كَايْنْ رْجَا وَاحْدْ اللِّي لِيهْ عَيّْطْ لِيكُمْ اللَّهْ.

⁵كَايْنْ رَبّْ وَاحْدْ، وْإِيمَانْ وَاحْدْ، وْمَعْمُودِيَّة وَحْدَة.

⁶إِلَاهْ وَاحْدْ، وْهُوَ الْبُو دْيَالْ كُلّْ وَاحْدْ، كَيْحْكَمْ عْلَى كُلّْ وَاحْدْ، وْكَيْخْدَمْ فْكُلّْ وَاحْدْ، وْسَاكْنْ فْكُلّْ وَاحْدْ.

⁷وَلَكِنْ كُلّْ وَاحْدْ فِينَا تّْعْطَاتْ لِيهْ النِّعْمَة عْلَى حْسَابْ الْقْيَاسْ اللِّي كَيْوَهْبُه الْمَسِيحْ.

⁸عْلَى دَاكْشِّي كَيْݣُولْ الْكْتَابْ: «مْلِّي طْلَعْ لْلْعْلُو دَّا مْعَاهْ الْمْسْجُونِينْ، وْعْطَى لْلنَّاسْ مَوَاهِبْ».

⁹أَشْنُو كَتْعْنِي «طْلَعْ»، رَاهَا كَتْعْنِي بْلِّي فْاللّْوّْلْ نْزَلْ لْقَاعْ الْأَرْضْ.

¹⁰وْهَادَاكْ اللِّي نْزَلْ، رَاهْ هُوَ بْرَاسُه اللِّي طْلَعْ فُوقْ ݣَاعْ السَّمَاوَاتْ بَاشْ يْعَمّْرْ ݣَاعْ الدّْنْيَا بْالْحُضُورْ دْيَالُه.

¹¹وْهُوَ اللِّي عْطَى لْشِي وْحْدِينْ بَاشْ يْكُونُو رُسُلْ، وْشِي وْحْدِينْ يْكُونُو أَنْبِيَا، وْشِي وْحْدِينْ يْكُونُو مُبَشِّرِينْ، وْشِي وْحْدِينْ يْكُونُو مْسْؤُولِينْ دْ الْكْنِيسَة وْمُعَلِّمِينْ،

¹²بَاشْ يْوَجّْدْ الْمُومْنِينْ الْمْقَدّْسِينْ يْدِيرُو الْخْدْمَة دْيَالْ الرَّبّْ، وْهَكَّا يْبْنِيوْ الدَّاتْ دْيَالْ الْمَسِيحْ،

¹³حْتَّى نْوَلِّيوْ كُلّْنَا مْتَّاحْدِينْ فْالْإِيمَانْ وْفْمَعْرِفَةْ وَلْدْ اللَّهْ، وْنْوَلِّيوْ نَاضْجِينْ وْكَامْلِينْ فْالْمَسِيحْ.

¹⁴بَاشْ مَا نْبْقَاوْشْ وْلَادْ صْغَارْ كَيْضْرْبُونَا الْمَّاجْ، وْكَتْدِّينَا كُلّْ رِيحْ دْيَالْ التَّعْلِيمْ اللِّي كَيْجِي مْنْ النَّاسْ وْاللِّي كَيْخْدَعْ، وْبْالْحِيلَة كَيْجَرّْ لْلْغَلَطْ.

¹⁵وَلَكِنْ نْݣُولُو الْحَقّْ بْالْمْحَبَّة، بَاشْ نْكَبْرُو فْكُلّْشِي لْعَنْدْ الْمَسِيحْ اللِّي هُوَ الرَّاسْ.

¹⁶اللِّي بِيهْ الدَّاتْ كُلّْهَا مْجْمُوعَة مْزْيَانْ، وْمْتَّاحْدَة بْالْمْفَاصْلْ. وْهَكَّا مْلِّي كُلّْ مْفْصَلْ كَيْدِيرْ خْدَمْتُه، كَتْكْبَرْ الدَّاتْ كُلّْهَا وْكَتّْبْنَى بْالْمْحَبَّة.

¹⁷رَانِي كَنْݣُولْ لِيكُمْ وْكَنْأَكّْدْ عْلِيكُمْ فْالرَّبّْ: مَا تْبْقَاوْشْ تْعِيشُو كِيفْ كَيْعِيشُو الشّْعُوبْ اللِّي مَا كَيْآمْنُوشْ بْاللَّهْ، بْالْفْهَامَة دْيَالْهُمْ الْخَاوْيَة،

¹⁸وْرَاهْ أَفْكَارْهُمْ مْضَلّْمَة، وْهُمَ بْعَادْ عْلَى الْحَيَاةْ دْيَالْ اللَّهْ بْسْبَابْ قَلّْةْ الْمَعْرِفَة دْيَالْهُمْ، وْبْسْبَابْ الْقْسُوحِيَّة دْيَالْ قْلُوبْهُمْ.

¹⁹وْحِيتْ مَا بْقَاوْشْ كَيْحَشْمُو، عْطَاوْ رَاسْهُمْ لْلْفْسَادْ بَاشْ يْدِيرُو كُلّْ حَاجَة مْنْجُوسَة بْلَا قْيَاسْ.

²⁰أَمَّا نْتُمَ، رَاهْ مَاشِي هَكَّا تْعَلّْمْتُو عْلَى الْمَسِيحْ،

²¹إِلَا كْنْتُو بْالصَّحْ سْمَعْتُو عْلَى يَسُوعْ وْتْعَلّْمْتُو الْحَقّْ اللِّي كَايْنْ فِيهْ،

²²رَاهْ خَاصّْكُمْ تْحَيّْدُو مْنّْكُمْ الطّْبِيعَة الْقْدِيمَة اللِّي كَانْتْ فِيكُمْ مْنْ قْبَلْ، اللِّي فْسْدَاتْ بْسْبَابْ الشَّهْوَة اللِّي كَتْغَرّْكُمْ،

²³وْخَاصّْكُمْ تْخَلِّيوْ الرُّوحْ يْجَدّْدْ الْأَفْكَارْ دْيَالْكُمْ،

²⁴وْتْلَبْسُو الطّْبِيعَة الجّْدِيدَة اللِّي خْلَقْهَا اللَّهْ عْلَى حْسَابْ الصُّورَة دْيَالُه فْالتَّقْوَى وْالْحَقّْ دْيَالُه الْمْقَدّْسْ.

²⁵عْلَى دَاكْشِّي، بَعّْدُو مْنْ الْكْدُوبْ، وْكُلّْ وَاحْدْ خَاصُّه يْتّْكَلّْمْ بْالْحَقّْ مْعَ لَاخُرْ، عْلَاحْقَّاشْ كُلّْنَا طْرَافْ فْدَاتْ وَحْدَة.

²⁶إِلَا تْقَلّْقْتُو مَا تْدَنْبُوشْ. مَا تْخَلِّيوْشْ الشّْمْسْ تْغْرَبْ وْنْتُمَ مَازَالْ مْقَلّْقِينْ،

²⁷مَا تْعْطِيوْشْ لْإِبْلِيسْ الْوْجْبَة فِينْ يْدْخَلْ.

²⁸اللِّي كَانْ كَيْسْرَقْ مَا خَاصُّوشْ يْبْقَى يْسْرَقْ، وَلَكِنْ خَاصُّه يْخْدَمْ شِي خْدْمَة شْرِيفَة بْيْدِّيهْ بَاشْ يْعِيشْ وْيْعْطِي لْلِّي مْحْتَاجْ.

²⁹مَا تْخْرُجْ حْتَّى كْلْمَة خَايْبَة مْنْ فُمّْكُمْ، وَلَكِنْ خَاصّْ كْلَامْكُمْ يْكُونْ مْزْيَانْ بَاشْ تْبْنِيوْ بْعْضِيَّاتْكُمْ عْلَى حْسَابْ الْإِحْتِيَاجْ دْيَالْكُمْ، بَاشْ يْكُونْ بَرَكَة لْلِّي كَيْسَمْعُوهْ.

³⁰مَا تْخَلِّيوْشْ الرُّوحْ الْقُدُسْ دْ اللَّهْ يْحْزَنْ، اللِّي بِيهْ تّْرْشَمْتُو لْلنّْهَارْ اللِّي غَادِي تّْفْدَاوْ فِيهْ.

³¹مَا تْحَقْدُوشْ، مَا تْسَخْطُوشْ، مَا تْغَضْبُوشْ، مَا تْغَوّْتُوشْ، مَا تْسَبُّوشْ، وْبَعّْدُو مْنْ ݣَاعْ الشَّرّْ.

³²وْكُونُو لْطَافْ مْعَ بْعْضِيَّاتْكُمْ، وْحْنَانْ، وْمْتْسَامْحِينْ كِمَا سَامْحْكُمْ اللَّهْ حْتَّى هُوَ فْالْمَسِيحْ.