Read Moroccan Standard Translation رِسَالَةْ أَفَسُسْ 5 Bible Online

رِسَالَةْ أَفَسُسْ 5 - Moroccan Standard Translation bible

رِسَالَةْ أَفَسُسْ 5

¹الْفَصْلْ الْخَامْسْ إِيوَا حِيتْ نْتُمَ وْلَادْ اللَّهْ الْعْزَازْ، دِيرُو بْحَالُه.

²وْعِيشُو فْالْمْحَبَّة، كِمَا بْغَانَا الْمَسِيحْ وْعْطَى حْيَاتُه عْلَى وْدّْنَا، تَقْدِمَة وْدْبِيحَة كَتْرْضِي اللَّهْ.

³وَلَكِنْ الْفْسَادْ وْݣَاعْ الْأُمُورْ الْمْنْجُوسَة وْالطّْمَعْ مَا خَاصّْكُمْشْ حْتَّى تْدْكْرُوهَا بِينَاتْكُمْ، حِيتْ هَادْشِّي مَا كَيْلِيقْشْ بْالْمُومْنِينْ الْمْقَدّْسِينْ.

⁴وْحْتَّى الْكْلَامْ الْخَايْبْ، وْالْكْلَامْ اللِّي مَا عَنْدُه مْعْنَى، وْالنُّكَتْ الْخَايْبِينْ، رَاهْ مَا كَيْلِيقُوشْ بِيكُمْ، وْفْعُوضْ هَادْشِّي خَاصّْكُمْ تْشَكْرُو اللَّهْ.

⁵حِيتْ رَاكُمْ كَتْعَرْفُو مْزْيَانْ بْلِّي الْفَاسْدْ، وْالْمْنْجُوسْ، وْالطّْمَّاعْ -حِيتْ الطّْمَعْ هُوَ الْعِبَادَة دْيَالْ الْأَصْنَامْ- مَا غَادِيشْ يْوَرْتُو فْالْمَمْلَكَة دْيَالْ الْمَسِيحْ وْاللَّهْ.

⁶مَا تْخَلِّيوْ حْتَّى وَاحْدْ يْخْدَعْكُمْ بْالْكْلَامْ الْبَاطْلْ، عْلَاحْقَّاشْ بْسْبَابْ هَادْ الْأُمُورْ كَيْنْزَلْ غَضَبْ اللَّهْ عْلَى النَّاسْ اللِّي مَا كَيْطِيعُوهْشْ.

⁷إِيوَا مَا تْكُونُوشْ مْشَارْكِينْ مْعَاهُمْ.

⁸حِيتْ كْنْتُو مْنْ قْبَلْ ضْلَامْ، وَلَكِنْ دَابَا رَاكُمْ نُورْ فْالرَّبّْ، إِيوَا عِيشُو بْحَالْ وْلَادْ النُّورْ،

⁹عْلَاحْقَّاشْ الْغْلَّة دْيَالْ النُّورْ هِيَ أَعْمَالْ الْخِيرْ وْالتَّقْوَى وْالْحَقّْ.

¹⁰مَيّْزُو الْأُمُورْ اللِّي كَتْرْضِي الرَّبّْ.

¹¹وْمَا تْشَارْكُوشْ فْالْأَعْمَالْ دْيَالْ الضّْلَامْ اللِّي مَا كَتْعْطِي غْلَّة، وَلَكِنْ بْالْعَكْسْ خَاصّْكُمْ تْفَضْحُوهَا.

¹²حِيتْ الْأُمُورْ اللِّي كَيْدِيرُوهَا هَادْ النَّاسْ فْالسِّرْ، رَاهْ حْشُومَة حْتَّى بَاشْ نْتّْكَلّْمُو عْلِيهَا.

¹³وَلَكِنْ ݣَاعْ الْأُمُورْ اللِّي كَتّْفْضَحْ كَتْوَلِّي بَايْنَة فْالنُّورْ،

¹⁴حِيتْ كُلّْ مَا كَيْبَانْ رَاهْ هُوَ نُورْ. وْعْلِيهَا كَيْتّْݣَالْ: «فِيقْ آ النَّاعْسْ، وْنُوضْ مْنْ بِينْ الْمُوتَى، وْالْمَسِيحْ غَيْضَوِّي عْلِيكْ».

¹⁵رْدُّو بَالْكُمْ مْزْيَانْ كِيفَاشْ كَتْعِيشُو، مَاشِي بْحَالْ اللِّي طَايْشِينْ، وَلَكِنْ بْحَالْ الْحُكَمَا.

¹⁶سْتَغْلُّو الْوَقْتْ فْكُلّْ حَاجَة مْزْيَانَة، عْلَاحْقَّاشْ لِيَّامْ خْيَابْتْ.

¹⁷وْعْلَى هَادْشِّي مَا تْكُونُوشْ بْلَا عْقَلْ، وَلَكِنْ فَهْمُو الْمُرَادْ دْيَالْ الرَّبّْ.

¹⁸وْمَا تْسَكْرُوشْ بْالْخْمَرْ حِيتْ كَيْتّْسَبّْبْ فْالْفْسَادْ، وَلَكِنْ تْعَمّْرُو بْالرُّوحْ الْقُدُسْ،

¹⁹وْنْتُمَ كَتّْكَلّْمُو مْعَ بْعْضِيَّاتْكُمْ بْالْمَزَامِيرْ وْالتَّرَانِيمْ وْالْأَغَانِي الرُّوحِيَّة، وْسَبّْحُو الرَّبّْ وْحْمْدُوهْ مْنْ كُلّْ قْلُوبْكُمْ.

²⁰وْشْكْرُو اللَّهْ الْآبْ فْكُلّْ وَقْتْ وْعْلَى كُلّْشِي فْإِسْمْ رَبّْنَا يَسُوعْ الْمَسِيحْ.

²¹خْضْعُو لْبَعْضِيَّاتْكُمْ حِيتْ كَتْخَافُو الْمَسِيحْ.

²²آ الْعْيَالَاتْ، خْضْعُو لْرْجَالْكُمْ كِمَا كَتْخَضْعُو لْلرَّبّْ.

²³عْلَاحْقَّاشْ الرَّاجْلْ هُوَ الرَّاسْ دْيَالْ الْمْرَاة، كِمَا الْمَسِيحْ حْتَّى هُوَ الرَّاسْ دْيَالْ الْكْنِيسَة، وْهُوَ الْمُنَجِّي دْيَالْ الدَّاتْ.

²⁴وْكِمَا كَتْخْضَعْ الْكْنِيسَة لْلْمَسِيحْ، هَكَّا حْتَّى الْعْيَالَاتْ كَيْخَصّْ يْخَضْعُو لْرْجَالْهُمْ فْكُلّْشِي.

²⁵آ الرّْجَالْ، بْغِيوْ عْيَالَاتْكُمْ كِمَا بْغَا الْمَسِيحْ حْتَّى هُوَ الْكْنِيسَة وْعْطَى حْيَاتُه عْلَى وْدّْهَا،

²⁶بَاشْ يْقَدّْسْهَا وْيْرَدّْهَا طَاهْرَة بْالْمَا وْبْالْكَلِمَة،

²⁷وْبَاشْ يْقَدّْمْهَا لْرَاسُه كْنِيسَة زْوِينَة بْزَّافْ، مَا فِيهَا لَا وْسَخْ وَلَا تْكْمَاشْ وَلَا حْتَّى حَاجَة نَاقْصَة، وَلَكِنْ تْكُونْ مْقَدّْسَة وْبْلَا عِيبْ.

²⁸وْهَكَّا كُلّْ رَاجْلْ وَاجْبْ عْلِيهْ يْبْغِي مْرَاتُه كِمَا كَيْبْغِي الدَّاتْ دْيَالُه. رَاهْ اللِّي كَيْبْغِي مْرَاتُه، كَيْبْغِي رَاسُه.

²⁹حِيتْ عَمّْرْ شِي وَاحْدْ مَا كْرَهْ دَاتُه، وَلَكِنْ رَاهْ كَيْوَكّْلْهَا وْكَيْتّْهَلَّى فِيهَا، كِمَا كَيْدِيرْ حْتَّى الْمَسِيحْ مْعَ الْكْنِيسَة،

³⁰عْلَاحْقَّاشْ حْنَا طْرَافْ فْالدَّاتْ دْيَالُه.

³¹«هَادْشِّي عْلَاشْ غَيْخَلِّي الرَّاجْلْ بَّاهْ وْمُّه وْغَيْتَّاحْدْ مْعَ مْرَاتُه، وْغَيْوَلِّيوْ بْجُوجْهُمْ دَاتْ وَحْدَة».

³²هَادْ السِّرّْ رَاهْ كْبِيرْ، وَلَكِنْ أَنَا كَنْقْصَدْ بِيهْ الْمَسِيحْ وْالْكْنِيسَة.

³³وَلَكِنْ نْتُمَ خَاصّْ كُلّْ وَاحْدْ فِيكُمْ يْبْغِي مْرَاتُه كِمَا كَيْبْغِي رَاسُه، وْالْمْرَاة خَاصّْهَا تْحْتَرْمْ رَاجْلْهَا.