Read Moroccan Standard Translation رِسَالَةْ أَفَسُسْ 6 Bible Online

رِسَالَةْ أَفَسُسْ 6 - Moroccan Standard Translation bible

رِسَالَةْ أَفَسُسْ 6

¹الْفَصْلْ السَّادْسْ آ الْوْلَادْ، طِيعُو وَالِدِيكُمْ فْالرَّبّْ، حِيتْ هَادَا هُوَ الْحَقّْ.

²«تّْهَلَّى فْبَّاكْ وْمُّكْ» هِيَ الْوْصِيَّة اللّْوّْلَى اللِّي جَاتْ مْتْبُوعَة بْوَاحْدْ الْوَعْدْ، وْهُوَ:

³«بَاشْ تْكُونْ نَاجْحْ فْحْيَاتْكْ، وْيْطْوَالْ عَمْرَكْ عْلَى الْأَرْضْ».

⁴وْنْتُمَ آ الْوَالِدِينْ، مَا تْخَلِّيوْشْ وْلَادْكُمْ يْغَضْبُو، وَلَكِنْ رْبِّيوْهُمْ بْالتَّأْدِيبْ وْالتَّعْلِيمْ دْيَالْ الرَّبّْ.

⁵آ الْعْبِيدْ، طِيعُو سْيَادْكُمْ اللِّي فْالدّْنْيَا بْالْخُوفْ وْالْإِحْتِرَامْ، وْبْقَلْبْ صَادْقْ كِمَا كَتْطِيعُو الْمَسِيحْ،

⁶مَاشِي غِيرْ مْلِّي يْكُونُو مْرَاقْبِينْكُمْ بَاشْ تْرْضِيوْ النَّاسْ، وَلَكِنْ طِيعُو بْحَالْ عْبِيدْ الْمَسِيحْ اللِّي كَيْدِيرُو مُرَادْ اللَّهْ مْنْ قَلْبْهُمْ.

⁷خْدْمُو بْنِيَّة صَادْقَة بْحَالْ إِلَا كَتْخَدْمُو لْلرَّبّْ مَاشِي لْلنَّاسْ.

⁸وْرَاكُمْ عَارْفِينْ بْلِّي الرَّبّْ غَيْجَازِي كُلّْ وَاحْدْ، سْوَا كَانْ عَبْدْ وْلَا حُرّْ، عْلَى الْخْدْمَة الْمْزْيَانَة اللِّي كَيْدِيرْ.

⁹وْنْتُمَ آ الْسْيَادْ، دِيرُو بْحَالْ هَكَّا مْعَ عْبِيدْكُمْ. مَا تْهَدّْدُوهُمْشْ، وْعَرْفُو بْلِّي نْتُمَ وْالْعْبِيدْ دْيَالْكُمْ عَنْدْكُمْ سِيّْدْ وَاحْدْ فْالسّْمَا، وْرَاهْ مَا كَيْدِيرْشْ الْوْجْهِيَّاتْ.

¹⁰وْفْاللّْخْرْ كَنْݣُولْ لِيكُمْ آ خُوتِي، تْقُوَّاوْ فْالرَّبّْ وْفْالْقُدْرَة دْيَالُه الْقْوِيَّة.

¹¹لْبْسُو السّْلَاحْ الْكَامْلْ اللِّي كَيْعْطِيهْ اللَّهْ لِيكُمْ، بَاشْ تْقَدْرُو تّْبْتُو ضْدّْ الْحِيلَاتْ دْيَالْ إِبْلِيسْ.

¹²حِيتْ الْحَرْبْ دْيَالْنَا مَاشِي مْعَ بْنَادْمْ اللِّي مْنْ لْحَمْ وْدْمّْ، وَلَكِنْ مْعَ الرُّؤَسَا وْالسُّلُطَاتْ وْالْحُكَّامْ الرُّوحِيِّينْ دْيَالْ هَادْ الزّْمَانْ الْمْضَلّْمْ، وْمْعَ الْأَرْوَاحْ دْيَالْ الشَّرّْ اللِّي فْالسّْمَا.

¹³عْلَى دَاكْشِّي هْزُّو سْلَاحْ اللَّهْ الْكَامْلْ بَاشْ تْقَدْرُو تْقَاوْمُو فْالنّْهَارْ اللِّي غَيْكُونْ فِيهْ الشَّرّْ، وْتْقَدْرُو تْبْقَاوْ تَابْتِينْ مْنْ بَعْدْمَا تْكَمّْلُو كُلّْشِي.

¹⁴إِيوَا وَجّْدُو رَاسْكُمْ وْتّْحَزّْمُو بْالْحَقّْ، وْلْبْسُو الضّْرَّاݣَة دْيَالْ التَّقْوَى.

¹⁵وْلْبْسُو فْرْجْلِيكُمْ الْغِيرَة عْلَى الْإِنْجِيلْ دْيَالْ الْهْنَا بَاشْ تْخَبّْرُو بِيهْ.

¹⁶وْدِيمَا هْزُّو تُرْسْ الْإِيمَانْ بَاشْ تْقَدْرُو تْطْفِيوْ ݣَاعْ نْبْلَاتْ الشِّيطَانْ اللِّي شَاعْلَة.

¹⁷لْبْسُو النّْجَا بْحَالْ الْكَاسْكْ اللِّي كَيْحْمِي الرَّاسْ، وْتّْسَلّْحُو بْسِيفْ الرُّوحْ اللِّي هُوَ كْلَامْ اللَّهْ.

¹⁸صْلِّيوْ فْكُلّْ وَقْتْ بْالرُّوحْ الْقُدُسْ فْݣَاعْ الصَّلَوَاتْ وْالدَّعَوَاتْ دْيَالْكُمْ، وْسَهْرُو وْدَاوْمُو عْلَى هَادْشِّي، وْصَلِّيوْ مْنْ جِهْةْ ݣَاعْ الْمُومْنِينْ الْمْقَدّْسِينْ،

¹⁹وْمْنْ جِهْتِي حْتَّى أَنَا، بَاشْ مْلِّي نْبْغِي نْتّْكَلّْمْ يْعْطِينِي اللَّهْ الْكْلَامْ مْنْ عَنْدُه وْبْكُلّْ تِقَة نْبَيّْنْ سِرّْ الْإِنْجِيلْ،

²⁰اللِّي عْلَى وْدُّه أَنَا سَفِيرْ وَاخَّا مْشْدُودْ بْالسّْنَاسْلْ، إِيوَا صْلِّيوْ بَاشْ نْتّْكَلّْمْ عْلِيهْ بْلَا خُوفْ كِمَا وَاجْبْ عْلِيَّ.

²¹رَانِي بْغِيتْكُمْ حْتَّى نْتُمَ تْعَرْفُو الْخْبَارْ دْيَالِي وْأَشْنُو كَنْدِيرْ، رَاهْ خُويَا الْعْزِيزْ تِيخِيكُسْ اللِّي أَمِينْ فْخْدَمْتُه لْلرَّبّْ غَيْخَبّْرْكُمْ بْكُلّْشِي.

²²هَادْشِّي عْلَاشْ صِيفْطْتُه لِيكُمْ بَاشْ تْعَرْفُو خْبَارْنَا وْبَاشْ يْشَجّْعْكُمْ.

²³اللَّهْ الْآبْ وْالرَّبّْ يَسُوعْ الْمَسِيحْ يْعْطِيوْ الْهْنَا، وْالْمْحَبَّة بْالْإِيمَانْ لْݣَاعْ الْخُوتْ.

²⁴وْالنِّعْمَة تْكُونْ مْعَ ݣَاعْ هَادُوكْ اللِّي كَيْبْغِيوْ رَبّْنَا يَسُوعْ الْمَسِيحْ بْالْمْحَبَّة اللِّي مَا كَتّْبَدّْلْشْ.