Read Moroccan Standard Translation رِسَالَةْ فِيلِبِّي 1 Bible Online

رِسَالَةْ فِيلِبِّي 1 - Moroccan Standard Translation bible

رِسَالَةْ فِيلِبِّي 1

¹الْفَصْلْ اللّْوّْلْ مْنْ بُولُسْ وْتِيمُوتَاوُسْ، الْعْبِيدْ دْيَالْ الْمَسِيحْ يَسُوعْ، لْݣَاعْ الْمُومْنِينْ الْمْقَدّْسِينْ فْالْمَسِيحْ يَسُوعْ اللِّي فْفِيلِبِّي وْلْݣَاعْ الْمْسْؤُولِينْ وْالْمُدَبِّرِينْ فْالْكْنِيسَة،

²النِّعْمَة وْالْهْنَا لِيكُمْ مْنْ اللَّهْ بَّانَا وْالرَّبّْ يَسُوعْ الْمَسِيحْ.

³كَنْشْكَرْ اللَّهْ فْكُلّْ وَقْتْ كَنْتّْفَكّْرْكُمْ فِيهْ،

⁴وْدِيمَا مْلِّي كَنْصَلِّي مْنْ جِهْتْكُمْ، كَنْصَلِّي بْالْفَرْحَة،

⁵حِيتْ عَاوْنْتُونِي بَاشْ نْخَبّْرْ بْالْإِنْجِيلْ، مْنْ النّْهَارْ اللّْوّْلْ اللِّي عْرَفْتْكُمْ فِيهْ حْتَّى لْدَابَا.

⁶وْأَنَا مْتْيِقّْنْ بْلِّي اللَّهْ اللِّي بْدَا كَيْدِيرْ فِيكُمْ هَادْ الْأَعْمَالْ الْمْزْيَانَة، غَادِي يْكَمّْلْهَا حْتَّى لْيُومْ الْمْجِي دْيَالْ يَسُوعْ الْمَسِيحْ.

⁷وْرَاهْ عَنْدِي الْحَقّْ نْفَكّْرْ فِيكُمْ كُلّْكُمْ، حِيتْ نْتُمَ فْقَلْبِي، وْكُلّْكُمْ كَتْشَارْكُونِي فْالْخْدْمَة اللِّي نْعَمْ بِيهَا اللَّهْ عْلِيَّ، سْوَا وْأَنَا دَابَا مْشْدُودْ فْالْحَبْسْ، وْلَا مْلِّي كْنْتْ كَنْدَافْعْ عْلَى رَاسِي فْالْمَحْكَمَة وْكَنْبَيّْنْ بْلِّي الْإِنْجِيلْ حَقّْ.

⁸وْاللَّهْ شَاهْدْ عْلِيَّ بْلِّي كَنْبْغِيكُمْ كُلّْكُمْ كِمَا كَيْبْغِيكُمْ الْمَسِيحْ يَسُوعْ.

⁹وْكَنْصَلِّي لْلَّهْ بَاشْ تْزِيدْ الْمْحَبَّة دْيَالْكُمْ تْكْبَرْ، وْهَكَّا غَتْكُونْ عَنْدْكُمْ الْمَعْرِفَة وْالْفْهَامَة،

¹⁰بَاشْ تْقَدْرُو تْمَيّْزُو الْأُمُورْ الْمْزْيَانَة، وْتْكُونُو نْقِيِّينْ مَا عْلِيكُمْ لُومْ فْالنّْهَارْ اللِّي غَيْرْجَعْ فِيهْ الْمَسِيحْ.

¹¹وْتْكُونُو عَامْرِينْ بْالْغْلَّة دْيَالْ التَّقْوَى اللِّي كَتْجِي مْنْ يَسُوعْ الْمَسِيحْ، بَاشْ يْتّْعْطَى الْعَزّْ وْالْحَمْدْ لْلَّهْ.

¹²وْبْغِيتْكُمْ آ خُوتِي تْعَرْفُو بْلِّي الْأُمُورْ اللِّي وْقْعَاتْ لِيَّ خْلَّاتْ الْإِنْجِيلْ يْزِيدْ يْتّْعْرَفْ كْتَرْ.

¹³وْهَكَّا وْلَّى مْعْرُوفْ فْقْصَرْ الْحَاكْمْ وْفْݣَاعْ الْبْلَايْصْ، بْلِّي أَنَا مْسْجُونْ عْلَى وْدّْ الْمَسِيحْ.

¹⁴وْبْسْبَابْ الْحَبْسْ دْيَالِي، الْأَغْلَبِيَّة دْ الْخُوتْ الْمُومْنِينْ زَادُو تَاقُو فْالرَّبّْ، وْوْلَّاوْ مْتْشَجّْعِينْ بَاشْ يْتّْكَلّْمُو بْكْلَامْ اللَّهْ بْلَا مَا يْخَافُو.

¹⁵بْلَا شْكّْ كَايْنْ فِيهُمْ اللِّي كَيْخَبّْرُو بْالْمَسِيحْ بْسْبَابْ الْحْسَدْ وْالْخْصُومَة، وَلَكِنْ كَايْنْ فِيهُمْ اللِّي كَيْتّْكَلّْمُو بْنِيَّة مْزْيَانَة،

¹⁶هَادُو كَيْدِيرُو هَادْشِّي بْالْمْحَبَّة اللِّي فِيهُمْ، وْهُمَ عَارْفِينْ بْلِّي أَنَا هْنَا بَاشْ نْدَافْعْ عْلَى الْإِنْجِيلْ.

¹⁷أَمَّا لْخْرِينْ، رَاهْ بْالْأَنَانِيَّة اللِّي فِيهُمْ مَا كَيْتّْكَلّْمُوشْ عْلَى الْمَسِيحْ بْنِيَّة صَادْقَة، وْكَيْضَنُّو بْلِّي غَادِي يْزِيدُو عْلِيَّ الْعْدَابْ فْالْحَبْسْ.[١]

¹⁸وَلَكِنْ مَا كَيْهَمّْشْ، مَا دَامْ التّْبْشِيرْ بْالْمَسِيحْ كَيْتّْدَارْ كِمَا كَانْ الْحَالْ، سْوَا بْنِيَّة مْزْيَانَة وْلَا بْنِيَّة خَايْبَة. وْعْلَى وْدّْ هَادْشِّي رَانِي فْرْحَانْ، وْغَادِي نْفْرَحْ كْتَرْ،

¹⁹حِيتْ كَنْعْرَفْ بْلِّي صْلَاتْكُمْ مْنْ جِهْتِي، وْالْعْوِينْ دْيَالْ الرُّوحْ دْ يَسُوعْ الْمَسِيحْ غَادِي يْكُونُو هُمَ السَّبَبْ فْالنّْجَا دْيَالِي.

²⁰وْكَنْتّْمَنَّى وْكَنْتّْرَجَّا مْنْ كُلّْ قَلْبِي بَاشْ عَمّْرْنِي مَا نْتْحَشّْمْ فْالْخْدْمَة دْيَالِي، وَلَكِنْ حْتَّى دَابَا نْكُونْ مْتْشَجّْعْ كِمَا كْنْتْ دِيمَا، بَاشْ تْبَانْ الْعَظَمَة دْيَالْ الْمَسِيحْ فْالدَّاتْ دْيَالِي، سْوَا عْشْتْ وْلَا مْتّْ.

²¹حِيتْ الْحَيَاةْ عَنْدِي هِيَ الْمَسِيحْ، وْالْمُوتْ هِيَ الرّْبَحْ.

²²وَلَكِنْ إِلَا كَانْتْ الْحَيَاةْ دْيَالِي غَتْخْلِّنِي نْكَمّْلْ الْخْدْمَة اللِّي بْدِيتْ، رَاهْ مَا عْرَفْتْشْ آشْ غَنْخْتَارْ؟

²³وْأَنَا حَايْرْ بِينْ جُوجْ دْ الْأُمُورْ: بْغِيتْ نْمُوتْ بَاشْ نْكُونْ مْعَ الْمَسِيحْ وْهَادَا حْسَنْ لِيَّ بْزَّافْ.

²⁴وَلَكِنْ ضَرُورِي نْعِيشْ، وْهَادْشِّي رَاهْ عْلَى وْدّْكُمْ.

²⁵وْحِيتْ عَنْدِي التِّقَة فْهَادْشِّي، رَانِي عَارْفْ بْلِّي غَنْبْقَى مْعَاكُمْ كُلّْكُمْ بَاشْ تْكَبْرُو وْتْكُونُو فْرْحَانِينْ فْالْإِيمَانْ دْيَالْكُمْ.

²⁶وْهَكَّا غَيْتّْزَادْ الْإِفْتِخَارْ دْيَالْكُمْ بِيَّ فْالْمَسِيحْ يَسُوعْ مْلِّي نْرْجَعْ مَرَّة خْرَى بَاشْ نْشُوفْكُمْ.

²⁷وْاللِّي مُهِمّْ دَابَا، هُوَ تْعِيشُو كِمَا كَيْوَصِّيكُمْ إِنْجِيلْ الْمَسِيحْ. وْهَكَّا سْوَا جِيتْ وْشْفْتْكُمْ وْلَا بْقِيتْ غَايْبْ، نْسْمَعْ بْلِّي رَاكُمْ تَابْتِينْ فْرُوحْ وَحْدَة، وْكَتْكَافْحُو بْقَلْبْ وَاحْدْ عْلَى وْدّْ الْإِيمَانْ بْالْإِنْجِيلْ.

²⁸وْمَا تْخَلِّيوْشْ النَّاسْ اللِّي مْضَادِّينْ مْعَاكُمْ يْخَوّْفُوكُمْ بْشِي حَاجَة، رَاهْ بْالنّْسْبَة لِيهُمْ هَادَا دَلِيلْ عْلَى الْهْلَاكْ دْيَالْهُمْ، وْبْالنّْسْبَة لِيكُمْ هَادَا دَلِيلْ عْلَى النّْجَا دْيَالْكُمْ، وْهَادْشِّي كُلُّه مْنْ عَنْدْ اللَّهْ.

²⁹عْلَاحْقَّاشْ اللَّهْ نْعَمْ عْلِيكُمْ مَاشِي غِيرْ بَاشْ تْآمْنُو بْالْمَسِيحْ، وَلَكِنْ بَاشْ تْتْعَدّْبُو عْلَى وْدُّه.

³⁰حِيتْ كَتْكَافْحُو كِمَا شْفْتُونِي كَنْدِيرْ مْنْ قْبَلْ، وْكِمَا مَازَالْ كَتْسَمْعُو عْلِيَّ دَابَا.