Read Moroccan Standard Translation رِسَالَةْ فِيلِبِّي 2 Bible Online

رِسَالَةْ فِيلِبِّي 2 - Moroccan Standard Translation bible

رِسَالَةْ فِيلِبِّي 2

¹الْفَصْلْ التَّانِي وْمَا دَامْ كَايْنْ التَّشْجِيعْ فْالْمَسِيحْ، وْكَايْنَة الْمْوَاسْيَة فْالْمْحَبَّة، وْكَايْنَة الشّْرْكَة فْالرُّوحْ الْقُدُسْ، وْكَايْنَة الْمْحَنَّة وْالرَّحْمَة،

²إِيوَا زِيدُو كَمّْلُو الْفَرْحَة دْيَالِي، وْكُونُو عْلَى رَأْيْ وَاحْدْ، وْكُونُو مْتَّاحْدِينْ فْالْمْحَبَّة بْقَلْبْ وَاحْدْ، وْفَكّْرُو تَفْكِيرْ وَاحْدْ،

³وْعَمّْرْكُمْ مَا تْدِيرُو شِي حَاجَة بْالْأَنَانِيَّة وْالْإِفْتِخَارْ، وَلَكِنْ بْالتَّوَاضُعْ، فَكّْرُو دِيمَا تْفَضّْلُو غِيرْكُمْ عْلَى رَاسْكُمْ.

⁴وْحْتَّى وَاحْدْ مْنّْكُمْ مَا يْفَكّْرْ غِيرْ فْمْصْلَحْتُه، وَلَكِنْ حْتَّى فْمْصْلَحْةْ النَّاسْ لْخْرِينْ.

⁵وْدَاكْشِّي اللِّي كَتْدِيرُوهْ خَاصُّه يْكُونْ بْحَالْ دَاكْشِّي اللِّي دَارُه الْمَسِيحْ يَسُوعْ:

⁶هُوَ اللِّي كَانْ فْالطّْبِيعَة دْ اللَّهْ، عَمّْرُه مَا فَكّْرْ يْسْتَغْلّْ الْمْسَاوْيَة دْيَالُه مْعَ اللَّهْ لْمْصْلَحْتُه.

⁷وَلَكِنْ تّْنَازْلْ عْلَى الْقِيمَة دْيَالُه، وْخْدَا الطّْبِيعَة دْيَالْ عَبْدْ، وْوْلَّى فْصُورْةْ بْنَادْمْ، وْتّْعْرَفْ بْحَالْ بْنَادْمْ بِينْ النَّاسْ.

⁸تْوَاضْعْ وْطَاعْ حْتَّى لْلْمُوتْ، الْمُوتْ عْلَى الصّْلِيبْ.

⁹هَادْشِّي عْلَاشْ رْفَعْ اللَّهْ مْقَامُه، وْعْطَاهْ إِسْمْ فُوقْ مْنْ كُلّْ إِسْمْ،

¹⁰بَاشْ تْسْجَدْ لْإِسْمْ يَسُوعْ كُلّْ رْكْبَة، فْالسّْمَا وْعْلَى الْأَرْضْ وْتَحْتْ الْأَرْضْ،

¹¹وْيْعْتَرْفْ كُلّْ لْسَانْ بْلِّي يَسُوعْ الْمَسِيحْ هُوَ الرَّبّْ، بَاشْ يْبَانْ الْعَزّْ دْيَالْ اللَّهْ الْآبْ.

¹²إِيوَا آ خُوتِي الْعْزَازْ، كِمَا كْنْتُو دِيمَا كَتْطِيعُونِي، هَاكْدَا دَابَا خَاصّْكُمْ تْطِيعُونِي كْتَرْ، مَاشِي غِيرْ وْأَنَا حَاضْرْ، وَلَكِنْ حْتَّى وْأَنَا غَايْبْ، وْدِيرُو جَهْدْكُمْ بَاشْ تْكَمّْلُو النّْجَا دْيَالْكُمْ بْالْخُوفْ وْالطَّاعَة.

¹³حِيتْ اللَّهْ هُوَ اللِّي كَيْخْدَمْ فِيكُمْ بَاشْ تْبْغِيوْ وْتْدِيرُو دَاكْشِّي اللِّي كَيْرْضِيهْ.

¹⁴دِيرُو كُلّْشِي بْلَا مَا تّْشْكَّاوْ وْبْلَا مَا تْخَاصْمُو عْلَى بْعْضِيَّاتْكُمْ،

¹⁵بَاشْ تْكُونُو بْلَا لُومْ وْنْقِيِّينْ. وْتْكُونُو وْلَادْ اللَّهْ، مَا فِيكُمْ حْتَّى عِيبْ فْوَسْطْ جِيلْ حْيَاتُه فَاسْدَة، وْتْضَوِّيوْ وَسْطْ النَّاسْ بْحَالْ الضُّو فْالدّْنْيَا،

¹⁶وْنْتُمَ تَابْتِينْ فْكْلَامْ اللَّهْ اللِّي كَيْعْطِي الْحَيَاةْ، وْهَكَّا غَنْفْتَخْرْ فْالنّْهَارْ اللِّي غَيْرْجَعْ فِيهْ الْمَسِيحْ، حِيتْ مَا جْرِيتْشْ بْلَا فَايْدَة وْمَا ضْرَبْتْشْ تَمَارَة عْلَى وَالُو.

¹⁷وَلَكِنْ رَاهْ حْتَّى إِلَا كْنْتْ بْحَالْ الزِّيتْ الْمْعَطّْرْ مْخْوِي عْلَى الدّْبِيحَة دْ الْخْدْمَة دْيَالْ إِيمَانْكُمْ، غَنْكُونْ فْرْحَانْ وْغَنْفْرَحْ بْزَّافْ مْعَاكُمْ كَامْلِينْ.

¹⁸إِيوَا هَكَّا فْرْحُو وْسَعْدُو حْتَّى نْتُمَ مْعَايَ.

¹⁹كَنْتّْمَنَّى بْمُرَادْ الرَّبّْ يَسُوعْ، نْصِيفْطْ لِيكُمْ تِيمُوتَاوُسْ دْغْيَا بَاشْ نْفْرَحْ إِلَا عْرَفْتْ خْبَارْكُمْ.

²⁰حِيتْ مَا عَنْدِي حَدّْ بْحَالُه اللِّي كَيْدِّيهَا فِيكُمْ بْقَلْبْ صَافِي.

²¹عْلَاحْقَّاشْ كُلّْشِي كَيْقَلّْبْ غِيرْ عْلَى مْصْلَحْتُه، مَاشِي عْلَى الْأُمُورْ دْيَالْ يَسُوعْ الْمَسِيحْ.

²²أَمَّا تِيمُوتَاوُسْ، رَاكُمْ كَتْعَرْفُو الْحْوَايْجْ اللِّي دَازْ مْنّْهُمْ، عْلَاحْقَّاشْ خْدَمْ مْعَايَ بْحَالْ الْوَلْدْ مْعَ بَّاهْ بَاشْ يْزِيدُو النَّاسْ يْسَمْعُو عْلَى الْإِنْجِيلْ.

²³هَادَا هُوَ اللِّي كَنْتّْمَنَّى نْصِيفْطُه لِيكُمْ مْلِّي نْعْرَفْ أَشْنُو غَيْجْرَا لِيَّ.

²⁴وْرَاهْ عَنْدِي التِّقَة فْالرَّبّْ بْلِّي حْتَّى أَنَا قْرِيبْ نْجِي لْعَنْدْكُمْ.

²⁵وَلَكِنْ شْفْتْ بْلِّي خَاصّْنِي نْصِيفْطْ لِيكُمْ خُويَا فْالْإِيمَانْ أَبَفْرُودِتُسْ، اللِّي عَاوْنِّي فْالْخْدْمَة وْكَافْحْ مْعَايَ، وْاللِّي صِيفْطْتُوهْ لْعَنْدِي بَاشْ يْعَاوْنِّي فْدَاكْشِّي اللِّي كَنْحْتَاجْ لِيهْ.

²⁶رَاهْ كَانْ مْشْتَاقْ بْزَّافْ يْشُوفْكُمْ كَامْلِينْ، وْكَانْ مْغْمُومْ عْلَاحْقَّاشْ سْمَعْتُو بْالْمَرْضْ دْيَالُه.

²⁷حِيتْ كَانْ مْرِيضْ وْقْرِيبْ يْمُوتْ، وَلَكِنْ اللَّهْ شَافْ مْنْ حَالُه، وْشَافْ مْنْ حَالِي حْتَّى أَنَا بَاشْ مَا نْزِيدْشْ هَمّْ عْلَى هَمّْ.

²⁸عْلَى هَادْشِّي صِيفْطْتُه لِيكُمْ دْغْيَا، بَاشْ مْلِّي تْشُوفُوهْ تْفَرْحُو مَرَّة خْرَى وْيْنْقَصْ عْلِيَّ الْهَمّْ.

²⁹إِيوَا رَحّْبُو بِيهْ بْالْفَرْحَة بْحَالْ خُوكُمْ فْالرَّبّْ، وْتّْهَلَّاوْ فْكُلّْ وَاحْدْ بْحَالُه،

³⁰عْلَاحْقَّاشْ عْلَى وْدّْ الْخْدْمَة دْيَالْ الْمَسِيحْ كَانْ قْرِيبْ يْمُوتْ، وْغَامْرْ بْحْيَاتُه بَاشْ يْكَمّْلْ دَاكْشِّي اللِّي كَانْ نَاقْصْ فْخْدَمْتْكُمْ لِيَّ.