Read Moroccan Standard Translation رِسَالَةْ فِيلِبِّي 3 Bible Online

رِسَالَةْ فِيلِبِّي 3 - Moroccan Standard Translation bible

رِسَالَةْ فِيلِبِّي 3

¹الْفَصْلْ التَّالْتْ وْدَابَا آ خُوتِي، فْرْحُو فْالرَّبّْ. رَاهْ مَا غَادِيشْ يْتَقّْلْ عْلِيَّ إِلَا كْتَبْتْ لِيكُمْ نَفْسْ الْأُمُورْ، وْهَادْشِّي غَيْنْفَعْكُمْ كْتَرْ.

²رْدُّو بَالْكُمْ مْنْ الْكْلَابْ! رْدُّو بَالْكُمْ مْنْ هَادُوكْ اللِّي كَيْدِيرُو الشَّرّْ! رْدُّو بَالْكُمْ مْنْ هَادُوكْ اللِّي كَيْعْطِيوْ الْأَهَمِّيَة لْلْخْتَانَة!

³حِيتْ حْنَا هُمَ مَّالِينْ الْخْتَانَة، عْلَاحْقَّاشْ كَنْعَبْدُو اللَّهْ بْالرُّوحْ الْقُدُسْ، وْكَنْفْتَخْرُو بْالْمَسِيحْ يَسُوعْ، وْمَا كَنْعَوّْلُوشْ عْلَى الدَّاتْ.

⁴وَاخَّا مْنْ حَقِّي حْتَّى أَنَا نْعَوّْلْ عْلَى دَاتِي. وْإِلَا فَكّْرْ شِي وَاحْدْ آخُرْ بْلِّي عَنْدُه الْحَقّْ يْعَوّْلْ عْلَى دَاتُه، رَاهْ عَنْدِي الْحَقّْ كْتَرْ مْنُّه.

⁵مْنْ جِهْةْ الْخْتَانَة رَانِي مْخَتّْنْ فْالنّْهَارْ التَّامْنْ، وْأَنَا إِسْرَائِيلِي مْأَصّْلْ مْنْ قْبِيلْةْ بْنْيَامِينْ، وْعِبْرَانِي مْنْ الْعِبْرَانِيِّينْ، وْمْنْ جِهْةْ الشّْرَعْ أَنَا فْرِّيسِي،

⁶وْمْنْ جِهْةْ الْغِيرَة، كْنْتْ كَنْتّْعَدَّى عْلَى النَّاسْ دْ الْكْنِيسَة، وْمْنْ جِهْةْ التَّقْوَى اللِّي فْرَضْهَا الشّْرَعْ، مَا عْلِيَّ لُومْ.

⁷وَلَكِنْ الْأُمُورْ اللِّي كَانْتْ عَنْدِي رْبَحْ، وْلَّاتْ عَنْدِي خْسْرَانْ عْلَى وْدّْ الْمَسِيحْ.

⁸وْمَاشِي غِيرْ هَادْشِّي، وَلَكِنْ كَنْحْسَبْ كُلّْشِي خْسْرَانْ قُدَّامْ مَعْرِفَةْ الْمَسِيحْ يَسُوعْ الرَّبّْ دْيَالِي، اللِّي عْلَى وْدُّه خْسَرْتْ كُلّْشِي، وْكَنْعْتَبْرْ كُلّْشِي زْبَلْ بَاشْ نْرْبَحْ الْمَسِيحْ،

⁹وْنْكُونْ فِيهْ، وْمَا نْكُونْشْ مْتَّاقِي بْفْضَلْ الشّْرَعْ، وَلَكِنْ بْفْضَلْ الْإِيمَانْ بْالْمَسِيحْ، بْالتَّقْوَى اللِّي كَتْجِي مْنْ عَنْدْ اللَّهْ عْلَى حْسَابْ الْإِيمَانْ.

¹⁰وْنْعَرْفُه، وْنْعْرَفْ قُوَّةْ الْبَعْتْ دْيَالُه وْالشّْرْكَة فْالْعْدَابْ دْيَالُه، وْنْوَلِّي كَنْشْبَهْ لِيهْ فْالْمُوتْ دْيَالُه،

¹¹لَعَلَّ وَعَسَى نْتّْبْعَتْ مْنْ الْمُوتْ لْلْحَيَاةْ.

¹²وْرَانِي مَا كَنْݣُولْشْ بْلِّي رْبَحْتْ وْلَا وْلِّيتْ كَامْلْ، وَلَكِنْ كَنْدِيرْ جْهْدِي بَاشْ نْرْبَحْ دَاكْشِّي اللِّي عْلَى وْدُّه رْبَحْنِي الْمَسِيحْ يَسُوعْ مْنْ قْبَلْ.

¹³وْفْالْحَقِيقَة آ الْخُوتْ، رَاهْ مَا كَنْحْسَبْشْ رَاسِي رْبَحْتْ، وَلَكِنْ كَنْدِيرْ حَاجَة وَحْدَة: كَنّْسَى دَاكْشِّي اللِّي وْرَايَ وْكَنْدِيرْ جْهْدِي كُلُّه بَاشْ نْوْصَلْ لْدَاكْشِّي اللِّي قُدَّامِي.

¹⁴كَنْجَرِّي لْجِهْةْ الْغَرَضْ اللِّي بْغِيتْ نْوْصَلْ لِيهْ، بَاشْ نْرْبَحْ الْجَائِزَة اللِّي عَيّْطْ لِيَّ عْلِيهَا اللَّهْ مْنْ السّْمَا بْالْمَسِيحْ يَسُوعْ.

¹⁵وْحْنَا اللِّي كَامْلِينْ، خَاصّْنَا نْفَكّْرُو بْهَادْ الطَّرِيقَة، وْإِلَا فَكّْرْتُو بْشِي طَرِيقَة خْرَى، رَاهْ اللَّهْ غَيْبَيّْنْ لِيكُمْ هَادْ الْأُمُورْ.

¹⁶وَاخَّا هَكَّاكْ، خَلِّيوْنَا نْكَمّْلُو فْنَفْسْ الطّْرِيقْ اللِّي تْبَعْنَاهَا مْنْ قْبَلْ.

¹⁷آ خُوتِي، كُونُو كُلّْكُمْ بْحَالِي، وْتْعَلّْمُو مْزْيَانْ مْنْ النَّاسْ اللِّي كَيْعِيشُو عْلَى حْسَابْ الطَّرِيقَة اللِّي وْرِّينَاهُمْ يْعِيشُو بِيهَا.

¹⁸وْرَانِي ݣْلْتْ لِيكُمْ بْزَّافْ دْ الْمَرَّاتْ هَادْشِّي، وْدَابَا غَنْعَاوْدْ نْݣُولُو لِيكُمْ وْأَنَا كَنْبْكِي: بْزَّافْ دْ النَّاسْ كَيْعِيشُو وْهُمَ عْدْيَانْ دْ الصّْلِيبْ دْيَالْ الْمَسِيحْ.

¹⁹هَادُو، رَاهْ الْعَاقِبَة دْيَالْهُمْ الْهْلَاكْ، حِيتْ الْإِلَاهْ دْيَالْهُمْ هُوَ كَرْشْهُمْ، وْالْعَزّْ دْيَالْهُمْ هُوَ دَاكْشِّي اللِّي خَاصّْهُمْ يْحَشْمُو مْنُّه، وْكَيْفَكّْرُو غِيرْ فْالْأُمُورْ دْيَالْ هَادْ الدّْنْيَا.

²⁰أَمَّا حْنَا، رَاهْ كَنْفَكّْرُو فْالْأُمُورْ دْيَالْ السّْمَا، اللِّي مْنّْهَا كَنْتّْسَنَّاوْ مُنَجِّي هُوَ الرَّبّْ يَسُوعْ الْمَسِيحْ،

²¹اللِّي غَيْبَدّْلْ الدَّاتْ دْيَالْنَا اللِّي مَا عَنْدْهَا قِيمَة بَاشْ تْكُونْ عْلَى صُورْةْ الدَّاتْ دْ الْعَزّْ دْيَالُه، بْالْقُوَّة دْيَالُه اللِّي كَتْخَلِّي كُلّْ حَاجَة تَحْتْ حْكَامُه.