Read Moroccan Standard Translation رِسَالَةْ فِيلِبِّي 4 Bible Online

رِسَالَةْ فِيلِبِّي 4 - Moroccan Standard Translation bible

رِسَالَةْ فِيلِبِّي 4

¹الْفَصْلْ الرَّابْعْ آ خُوتِي الْعْزَازْ، وْاللِّي تْوَحّْشْتْ نْشُوفْهُمْ، رَاكُمْ الْفَرْحَة دْيَالِي وْتَاجْ رَاسِي، إِيوَا بْقَاوْ تَابْتِينْ فْإِيمَانْكُمْ بْالرَّبّْ.

²كَنْطْلَبْ مْنْ أَفُودِيَة وْسِنْتِيخِي بَاشْ يْكُونُو مْتَّاحْدِينْ فْالرَّبّْ.

³وْكَنْطْلَبْ مْنّْكْ حْتَّى نْتَ، آ شْرِيكِي اللِّي كَنْتِيقْ فِيهْ بْزَّافْ، بَاشْ تْعَاوْنْهُمْ حِيتْ كَافْحُو مْعَايَ فْالْخْدْمَة دْيَالْ الْإِنْجِيلْ، هُمَ وْأَكْلِيمَنْدُسْ وْݣَاعْ الْخُوتْ لْخْرِينْ اللِّي عَاوْنُونِي فْالْخْدْمَة، وْاللِّي سْمِيَّاتْهُمْ مْكْتُوبِينْ فْكْتَابْ الْحَيَاةْ.

⁴فْرْحُو دِيمَا فْالرَّبّْ، وْعَاوْتَانِي كَنْݣُولْ لِيكُمْ فْرْحُو.

⁵خَلِّيوْ الضّْرَافَة اللِّي فِيكُمْ تّْعْرَفْ عَنْدْ النَّاسْ كُلّْهُمْ. رَاهْ الرَّبّْ قْرِيبْ.

⁶مَا تْرَفْدُو الْهَمّْ لْحْتَّى حَاجَة، وَلَكِنْ طْلْبُو كُلّْشِي مْنْ اللَّهْ بْالصّْلَاة وْالدَّعَوَاتْ وْالشُّكْرْ، وْخَلِّيوْ دَاكْشِّي اللِّي كَتْطْلْبُوهْ مْعْرُوفْ عَنْدْ اللَّهْ.

⁷وْالْهْنَا دْيَالْ اللَّهْ اللِّي قْوَى مْنْ كُلّْ حَاجَة، يْحْفَضْ قْلُوبْكُمْ وْأَفْكَارْكُمْ فْالْمَسِيحْ يَسُوعْ.

⁸وْفْاللّْخْرْ آ الْخُوتْ، دِّيوْهَا فْهَادْ الْأُمُورْ: ݣَاعْ دَاكْشِّي اللِّي صْحِيحْ، ݣَاعْ دَاكْشِّي اللِّي كَيْسْتَاهْلْ يْتّْحْتَرْمْ، ݣَاعْ دَاكْشِّي اللِّي حَقّْ، ݣَاعْ دَاكْشِّي اللِّي نْقِي، ݣَاعْ دَاكْشِّي اللِّي نْقَدْرُو نْبْغِيوْهْ، ݣَاعْ دَاكْشِّي اللِّي السُّمْعَة دْيَالُه مْزْيَانَة، وْݣَاعْ دَاكْشِّي اللِّي مْزْيَانْ وْكَيْسْتَاهْلْ يْشَكْرُوهْ النَّاسْ.

⁹وْدِيرُو بْدَاكْشِّي اللِّي تْعَلّْمْتُوهْ وْخْدِيتُوهْ وْسْمَعْتُوهْ وْشْفْتُوهْ فِيَّ. وْاللَّهْ اللِّي كَيْعْطِي الْهْنَا يْكُونْ مْعَاكُمْ.

¹⁰رَانِي فْرَحْتْ بْزَّافْ فْالرَّبّْ، حِيتْ دَابَا رْجَعْتُو مْنْ جْدِيدْ كَتّْهَلَّاوْ فِيَّ، وْرَاكُمْ كْنْتُو بَاغْيِينْ تّْهَلَّاوْ فِيَّ مْنْ قْبَلْ وَلَكِنْ مَا لْقِيتُوشْ الْوْجْبَة.

¹¹مَا كَنْݣُولْشْ هَادْشِّي حِيتْ أَنَا مْحْتَاجْ، عْلَاحْقَّاشْ تْعَلّْمْتْ نْقْنَعْ بْدَاكْشِّي اللِّي عَنْدِي.

¹²تْعَلّْمْتْ نْعِيشْ فْوَقْتْ الْحْزَّة وْفْوَقْتْ الشّْبْعَة. تْعَلّْمْتْ نْعِيشْ كِمَا كَانْ الْحَالْ، سْوَا كْنْتْ شْبْعَانْ وْلَا جِيعَانْ، سْوَا كَانْ عَنْدِي الْكْتِيرْ وْلَا الْقْلِيلْ.

¹³وْأَنَا قَادْرْ نْدِيرْ كُلّْشِي بْهَادَاكْ اللِّي كَيْعْطِينِي الْقُوَّة.

¹⁴وَلَكِنْ وَاخَّا هَكَّاكْ، دْرْتُو شِي حَاجَة مْزْيَانَة مْلِّي شَارْكْتُونِي فْالْمْحْنَة دْيَالِي.

¹⁵وْرَاكُمْ كَتْعَرْفُو آ سُكَّانْ فِيلِبِّي، بْلِّي فْاللّْوّْلْ فَاشْ بْدِيتْ كَنْخَبّْرْ بْالْإِنْجِيلْ، مْلِّي خْرَجْتْ مْنْ بْلَادْ مَكِدُونِيَة، حْتَّى كْنِيسَة مَا كَانْتْ كَتْعَاوْنِّي فْالْمْدْخُولْ دْيَالِي وْفْالْمْصْرُوفْ مْنْ غِيرْكُمْ نْتُمَ بُوحْدْكُمْ.

¹⁶وْحْتَّى مْلِّي كْنْتْ فْتْسَالُونِيكِي، صِيفْطْتُو لِيَّ كْتَرْ مْنْ مَرَّة دَاكْشِّي اللِّي كْنْتْ مْحْتَاجْ لِيهْ.

¹⁷وْرَانِي مَا كَنْقَلّْبْشْ عْلَى الْهْدِيَّاتْ، وَلَكِنْ بْغِيتْ الْغْلَّة دْيَالْكُمْ تْكْتَرْ.

¹⁸وْرَاهْ وْصَلْنِي دَاكْشِّي اللِّي كْنْتْ مْحْتَاجْ لِيهْ وْكْتَرْ. وْدَابَا عَنْدِي اللِّي يْكْفِينِي حِيتْ أَبَفْرُودِتُسْ جَابْ لِيَّ ݣَاعْ دَاكْشِّي اللِّي صِيفْطْتُوهْ لِيَّ، رَاهْ هُوَ بْحَالْ الرِّيحَة الْمْزْيَانَة دْيَالْ شِي دْبِيحَة مْقْبُولَة عَنْدْ اللَّهْ وْكَتْرْضِيهْ.

¹⁹وْالْإِلَاهْ دْيَالِي غَيْعْطِيكُمْ كُلّْ مَا كَتْحْتَاجُو عْلَى حْسَابْ الْعَزّْ دْيَالُه الْكْتِيرْ بْالْمَسِيحْ يَسُوعْ.

²⁰الْعَزّْ لْلَّهْ بُونَا عْلَى الدّْوَامْ. آمِينْ.

²¹سَلّْمُو عْلَى ݣَاعْ الْمُومْنِينْ الْمْقَدّْسِينْ بْالْمَسِيحْ يَسُوعْ، وْرَاهْ الْخُوتْ اللِّي مْعَايَ كَيْسَلّْمُو عْلِيكُمْ.

²²وْكَيْسَلّْمُو عْلِيكُمْ الْمُومْنِينْ الْمْقَدّْسِينْ اللِّي هْنَا كُلّْهُمْ، وْبْالْخُصُوصْ اللِّي كَيْخَدْمُو عَنْدْ قَيْصَرْ.

²³وْالنِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَاكُمْ.