Read Moroccan Standard Translation رِسَالَةْ كُولُوسِّي 1 Bible Online

رِسَالَةْ كُولُوسِّي 1 - Moroccan Standard Translation bible

رِسَالَةْ كُولُوسِّي 1

¹الْفَصْلْ اللّْوّْلْ مْنْ بُولُسْ، رَسُولْ الْمَسِيحْ يَسُوعْ بْمُرَادْ اللَّهْ، وْمْنْ خُونَا تِيمُوتَاوُسْ،

²لْلْمُومْنِينْ الْمْقَدّْسِينْ فْكُولُوسِّي، وْالْخُوتْ الْأُمَنَا فْالْمَسِيحْ، النِّعْمَة وْالْهْنَا لِيكُمْ مْنْ اللَّهْ بَّانَا.

³كَنْشَكْرُو اللَّهْ بُو رَبّْنَا يَسُوعْ الْمَسِيحْ، وَقْتْمَا صْلِّينَا مْنْ جِهْتْكُمْ،

⁴مْلِّي سْمَعْنَا عْلَى إِيمَانْكُمْ بْالْمَسِيحْ يَسُوعْ، وْمْحَبّْتْكُمْ لْݣَاعْ الْمُومْنِينْ الْمْقَدّْسِينْ،

⁵عْلَى وْدّْ الرّْجَا اللِّي كَيْتّْسْنَّاكُمْ فْالسَّمَاوَاتْ، اللِّي سْمَعْتُو بِيهْ مْنْ قْبَلْ فْكْلَامْ الْحَقّْ دْ الْإِنْجِيلْ،

⁶اللِّي وْصَلْ لِيكُمْ كِمَا وْصَلْ لْلدّْنْيَا كُلّْهَا، وْعْطَى الْغْلَّة وْكْبْرَاتْ كِمَا كْبْرَاتْ فِيكُمْ حْتَّى نْتُمَ مْنْ الْوَقْتْ اللِّي فِيهْ سْمَعْتُو وْعْرَفْتُو بْالْحَقّْ نِعْمَةْ اللَّهْ.

⁷وْهَادْشِّي رَاكُمْ تْعَلّْمْتُوهْ مْنْ أَبَفْرَاسْ صَاحْبْنَا الْعْزِيزْ اللِّي كَيْخْدَمْ مْعَانَا، وْاللِّي أَمِينْ فْخْدَمْتُه لْلْمَسِيحْ عْلَى وْدّْكُمْ.

⁸وْرَاهْ هُوَ اللِّي خْبَرْنَا عْلَى الْمْحَبَّة اللِّي عْطَاهَا لِيكُمْ الرُّوحْ الْقُدُسْ.

⁹وْهَادْشِّي عْلَاشْ حْتَّى حْنَا، مْنْ نْهَارْ سْمَعْنَا هَادْشِّي وْحْنَا كَنْصَلِّيوْ مْنْ جِهْتْكُمْ، وْكَنْطْلْبُو اللَّهْ بَاشْ تْعَرْفُو مْزْيَانْ الْمُرَادْ دْيَالُه بْالْحْكْمَة وْالْفْهَامَة اللِّي كَيْعْطِيهَا الرُّوحْ الْقُدُسْ،

¹⁰وْهَكَّا غَتْقَدْرُو تْعِيشُو كِيفْ كَيْبْغِي الرَّبّْ، وْتْدِيرُو ݣَاعْ دَاكْشِّي اللِّي كَيْرْضِيهْ، وْتْكْتَرْ غَلّْتْكُمْ فْكُلّْ خْدْمَة مْزْيَانَة، وْتْكَبْرُو فْمَعْرِفَةْ اللَّهْ،

¹¹وْتّْقُوَّاوْ بْكُلّْ قُوَّة عْلَى حْسَابْ الْقُدْرَة دْ الْعَزّْ دْيَالُه، بَاشْ تْكُونُو قَادْرِينْ تْصَبْرُو عْلَى كُلّْشِي. وْبْالْفَرْحَة

¹²تْشَكْرُو الْآبْ اللِّي رْدّْكُمْ قَادْرِينْ تْشَارْكُو مْعَ الْمُومْنِينْ الْمْقَدّْسِينْ فْالْوَرْتْ دْيَالْ مَمْلَكَةْ النُّورْ.

¹³وْرَاهْ هُوَ اللِّي عْتَقْنَا مْنْ السُّلْطَة دْيَالْ الضّْلَامْ، وْجَابْنَا لْمَمْلَكَةْ وَلْدُه الْحْبِيبْ،

¹⁴اللِّي بِيهْ تّْفْدِينَا، وْتّْغَفْرُو دْنُوبْنَا.

¹⁵هُوَ صُورْةْ اللَّهْ اللِّي مَا كَيْتّْشَافْشْ، وْهُوَ الْبْكَرْ فْݣَاعْ الْمْخْلُوقَاتْ.

¹⁶عْلَاحْقَّاشْ بِيهْ تّْخْلَقْ كُلّْشِي فْالسَّمَاوَاتْ وْفْالْأَرْضْ، اللِّي كَيْتّْشَافْ وْاللِّي مَا كَيْتّْشَافْشْ، الْقُوَّاتْ الرُّوحِيَّة، وْالْمْسْؤُولِينْ، وْالرِّيَاسَاتْ، وْالسُّلُطَاتْ. كُلّْشِي بِيهْ وْلِيهْ تّْخْلَقْ.

¹⁷وْرَاهْ هُوَ قْبَلْ مْنْ كُلّْشِي، وْبِيهْ كَايْنْ كُلّْشِي.

¹⁸وْهُوَ رَاسْ الدَّاتْ، يَعْنِي الْكْنِيسَة. وْهُوَ الْبْدُو، وْاللّْوّْلْ اللِّي تّْبْعَتْ مْنْ بِينْ الْمُوتَى، بَاشْ يْكُونْ هُوَ اللّْوّْلْ فْكُلّْشِي.

¹⁹عْلَاحْقَّاشْ اللَّهْ بْغَا الْكَمَالْ كُلُّه يْكُونْ فْالْمَسِيحْ،

²⁰وْبِيهْ بْغَا اللَّهْ يْصَالْحْ كُلّْشِي مْعَاهْ، وْبْالدّْمْ دْيَالُه اللِّي سَالْ عْلَى الصّْلِيبْ دَارْ الْهْنَا مْعَ كُلّْشِي، سْوَا اللِّي فْالْأَرْضْ وْلَا اللِّي فْالسَّمَاوَاتْ.

²¹وْحْتَّى نْتُمَ اللِّي كْنْتُو مْنْ قْبَلْ بْعَادْ عْلَى اللَّهْ، وْكْنْتُو عْدْيَانْ دْيَالُه بْسْبَابْ أَفْكَارْكُمْ وْأَعْمَالْكُمْ دْيَالْ الشَّرّْ،

²²رَاهْ دَابَا تّْصَالْحْ مْعَاكُمْ بْالْمُوتْ دْيَالْ وَلْدُه بْالدَّاتْ اللِّي كَتْفْنَى، بَاشْ يْجِيبْكُمْ قُدَّامُه وْنْتُمَ مْقَدّْسِينْ وْنْقِيِّينْ وْبْلَا عِيبْ.

²³وَلَكِنْ خَاصّْكُمْ تّْبْتُو فْإِيمَانْكُمْ اللِّي مْبْنِي عْلَى السَّاسْ الصّْحِيحْ، بْلَا مَا تْبَعّْدُو عْلَى الرّْجَا دْيَالْ الْإِنْجِيلْ اللِّي سْمَعْتُوهْ، وْاللِّي تّْخَبّْرُو بِيهْ ݣَاعْ الْمْخْلُوقَاتْ اللِّي تَحْتْ السّْمَا، الْإِنْجِيلْ اللِّي وْلِّيتْ أَنَا بُولُسْ كَنْخْدَمْ لِيهْ.

²⁴وْدَابَا رَانِي فْرْحَانْ بْالْعْدَابْ اللِّي كَنْقَاسِيهْ عْلَى وْدّْكُمْ، وْرَاهْ بَاقِي كَنْشَارْكْ فْعْدَابْ الْمَسِيحْ فْالدَّاتْ دْيَالِي عْلَى وْدّْ الدَّاتْ دْيَالُه، اللِّي هِيَ الْكْنِيسَة،

²⁵اللِّي وْلِّيتْ كَنْخْدَمْ لِيهَا، عْلَى حْسَابْ الْخْدْمَة دْ اللَّهْ اللِّي تّْعْطَاتْنِي عْلَى وْدّْكُمْ، بَاشْ نْخَبّْرْ بْكْلَامْ اللَّهْ،

²⁶اللِّي هُوَ السِّرّْ الْمْخْفِي مْنْ قْدِيمْ الزّْمَانْ مْنْ جِيلْ لْجِيلْ، وَلَكِنْ دَابَا اللَّهْ بَيّْنُه لْلْمُومْنِينْ الْمْقَدّْسِينْ دْيَالُه.

²⁷وْبْغَاهُمْ يْعَرْفُو أَشْنُو هِيَ الْقِيمَة وْالْعَزّْ دْيَالْ هَادْ السِّرّْ بِينْ ݣَاعْ الشّْعُوبْ، وْهَادْ السِّرّْ هُوَ الْمَسِيحْ اللِّي فِيكُمْ، وْهُوَ الرّْجَا دْيَالْ الْعَزّْ.

²⁸وْرَاهْ بِيهْ كَنْخَبّْرُو، وْكَنّْصْحُو وْنْعَلّْمُو ݣَاعْ النَّاسْ بْكُلّْ حْكْمَة، بَاشْ نْرَدُّو كُلّْ وَاحْدْ مْكْمُولْ فْالْمَسِيحْ.

²⁹وْعْلَى هَادْشِّي كَنْضْرَبْ تَمَارَة وْكَنْكَافْحْ بْفْضَلْ الْقُدْرَة دْيَالْ الْمَسِيحْ اللِّي كَتْخْدَمْ فِيَّ بْالْقُوَّة.