Read Moroccan Standard Translation رِسَالَةْ كُولُوسِّي 2 Bible Online

رِسَالَةْ كُولُوسِّي 2 - Moroccan Standard Translation bible

رِسَالَةْ كُولُوسِّي 2

¹الْفَصْلْ التَّانِي بْغِيتْكُمْ تْعَرْفُو شْحَالْ كَنْكَافْحْ عْلَى وْدّْكُمْ، وْعْلَى وْدّْ هَادُوكْ اللِّي فْلَاوُدِكِيَّة، وْعْلَى وْدّْ ݣَاعْ هَادُوكْ اللِّي عَمّْرْهُمْ مَا شَافُونِي.

²بَاشْ يْكُونُو مْتْشَجّْعِينْ وْمْتَّاحْدِينْ فْالْمْحَبَّة، وْتْكُونْ عَنْدْهُمْ الْفْهَامَة الْكَامْلَة، وْيْعَرْفُو سِرّْ اللَّهْ اللِّي هُوَ الْمَسِيحْ،

³وْاللِّي فِيهْ مْجْمُوعِينْ ݣَاعْ كْنُوزْ الْحْكْمَة وْالْمَعْرِفَة.

⁴وْرَانِي كَنْݣُولْ هَادْشِّي بَاشْ مَا يْخْدَعْكُمْ حَدّْ بْكْلَامُه الْحْلُو.

⁵حِيتْ وَاخَّا أَنَا مَا حَاضْرْشْ مْعَاكُمْ بْالدَّاتْ دْيَالِي رَانِي حَاضْرْ بْالرُّوحْ، وْرَاهْ كَنْفْرَحْ مْلِّي كَنْشُوفْكُمْ مْنَضّْمِينْ وْتَابْتِينْ فْإِيمَانْكُمْ بْالْمَسِيحْ.

⁶وْكِمَا قْبَلْتُو الْمَسِيحْ يَسُوعْ الرَّبّْ، عِيشُو مْتَّاحْدِينْ مْعَاهْ،

⁷وْكُونُو مْجَدّْرِينْ وْمْبْنِيِّينْ فِيهْ، وْتَابْتِينْ فْالْإِيمَانْ كِمَا تْعَلّْمْتُو، وْكُونُو دِيمَا كَتْشَكْرُو.

⁸رْدُّو بَالْكُمْ لَيْغَلّْطْكُمْ شِي حَدّْ بْالْفْلْسَفَة الْغَالْطَة، وْيْغَرّْكُمْ بْالْبَاطْلْ عْلَى حْسَابْ الْعَادَة دْيَالْ النَّاسْ، وْعْلَى حْسَابْ قُوَّاتْ الشَّرّْ اللِّي فْالدّْنْيَا، وْمَاشِي عْلَى حْسَابْ الْمَسِيحْ.

⁹عْلَاحْقَّاشْ اللَّهْ كُلُّه كَيْسْكُنْ فْالدَّاتْ دْيَالْ الْمَسِيحْ،

¹⁰وْرَاهْ بِيهْ وْلِّيتُو مْكْمُولِينْ، وْهُوَ فُوقْ كُلّْ رِيَاسَة وْسُلْطَة.

¹¹فِيهْ رَاكُمْ تّْخَتّْنْتُو خْتَانَة مَاشِي بْالْيْدّْ، وْهَكَّا تّْحَيّْدَاتْ مْنّْكُمْ طْبِيعْةْ الدَّاتْ دْيَالْ الدّْنُوبْ، وْهَادِي هِيَ الْخْتَانَة دْيَالْ الْمَسِيحْ.

¹²تّْدْفَنْتُو مْعَاهْ فْالْمَعْمُودِيَّة، وْتّْبْعَتُّو مْعَاهْ حْتَّى مْنْ الْمُوتْ حِيتْ آمْنْتُو بْقُدْرَةْ اللَّهْ اللِّي بَعْتُه مْنْ بِينْ الْمُوتَى.

¹³وْكْنْتُو مْيّْتِينْ بْسْبَابْ الدّْنُوبْ وْمَا مْخَتّْنِينْشْ فْالدَّاتْ، وْاللَّهْ حْيَاكُمْ مْعَ الْمَسِيحْ، وْسَامْحْنَا عْلَى ݣَاعْ دْنُوبْنَا.

¹⁴مْلِّي مْحَا الْحُجَّة دْيَالْ الْفْرَايْضْ اللِّي كَانْتْ ضْدّْنَا، حَيّْدْهَا كُلّْهَا، وْسَمّْرْهَا عْلَى الصّْلِيبْ،

¹⁵وْحَيّْدْ لْلرُّؤَسَا وْالسُّلُطَاتْ الرُّوحِيِّينْ، الْقُوَّة دْيَالْهُمْ وْفْضَحْهُمْ قُدَّامْ كُلّْشِي، وْغْلَبْهُمْ بْالصّْلِيبْ.

¹⁶إِيوَا مَا تْخَلِّيوْ حْتَّى وَاحْدْ يْحْكَمْ عْلِيكُمْ مْنْ جِهَة الْمَاكْلَة وْلَا الشّْرَابْ، وْلَا مْنْ جِهْةْ شِي عِيدْ، وْلَا رَاسْ الشّْهَرْ وْلَا يَّامَاتْ السّْبْتْ.

¹⁷رَاهْ ݣَاعْ هَادْشِّي غِيرْ خْيَالْ دْيَالْ الْأُمُورْ اللِّي غَتْجِي مْنْ بَعْدْ، وَلَكِنْ الْحَقِيقَة رَاهْ هِيَ الْمَسِيحْ.

¹⁸مَا تْخَلِّيوْ حْتَّى وَاحْدْ يْحْرَمْكُمْ مْنْ الْجَائِزَة دْيَالْكُمْ، مْنْ هَادُوكْ اللِّي كَيْتّْوَاضْعُو بْالْكْدُوبْ وْكَيْعَبْدُو الْمَلَايْكَة، وْكَيْعْطِيوْ الْقِيمَة لْلرُّؤْيَاتْ دْيَالْهُمْ وْكَيْتّْنَفْخُو بْالْكِبْرْ بْدَاكْشِّي اللِّي كَيْفَكّْرُو فِيهْ بْعْقَلْهُمْ.

¹⁹وْهُمَ مَا تَابْتِينْشْ فْالرَّاسْ، اللِّي بِيهْ كَتّْقُوَّى الدَّاتْ كُلّْهَا وْكَتْوَلِّي مْتَّاحْدَة بْالْمْفَاصْلْ، وْالْعْصَابْ، وْكَتْكْبَرْ كِيفْ بْغَا اللَّهْ.

²⁰وْمَا دَامْ مْتُّو مْعَ الْمَسِيحْ مْنْ جِهْةْ الْقُوَّاتْ دْيَالْ الشَّرّْ اللِّي فْالدّْنْيَا، إِيوَا عْلَاشْ كَتْعِيشُو بْحَالْ إِلَا نْتُمَ مْنْ الدّْنْيَا وْكَتْقَبْلُو تْدِيرُو بْهَادْ الْفْرَايْضْ:

²¹«مَا تَاخْدْشْ، مَا تْدُوقْشْ، مَا تْمَسْشْ؟»

²²هَادْشِّي كُلُّه رَاهْ مَا دَايْمْشْ مْلِّي كَيْتّْدَارْ بِيهْ، حِيتْ هُوَ غِيرْ وْصِيَّاتْ دْيَالْ النَّاسْ وْتَعَالِيمْ دْيَالْهُمْ!

²³رَاهْ كَيْبَانْ بْحَالْ وْصِيَّاتْ دْ الْحْكْمَة، فِيهُمْ نِضَامْ خَاصّْ بْالْعِبَادَة وْالتَّوَاضُعْ اللِّي كَيْعَدّْبْ الدَّاتْ، وْهَادْ الْوْصِيَّاتْ مَا عَنْدْهُمْ قِيمَة وْمَا يْقَدْرُوشْ يْتّْحَكّْمُو فْالشَّهْوَة دْيَالْ الدَّاتْ.