Read Moroccan Standard Translation رِسَالَةْ كُولُوسِّي 3 Bible Online

رِسَالَةْ كُولُوسِّي 3 - Moroccan Standard Translation bible

رِسَالَةْ كُولُوسِّي 3

¹الْفَصْلْ التَّالْتْ إِيوَا إِلَا تّْبْعَتُّو مْعَ الْمَسِيحْ، قَلّْبُو عْلَى الْأُمُورْ اللِّي الْفُوقْ، فِينْ ݣَالْسْ الْمَسِيحْ عْلَى لِيمْنْ دْيَالْ اللَّهْ.

²دِّيوْهَا فْالْأُمُورْ اللِّي الْفُوقْ مَاشِي فْالْأُمُورْ اللِّي فْالْأَرْضْ،

³حِيتْ رَاكُمْ مْتُّو وْحْيَاتْكُمْ مْسْتُورَة مْعَ الْمَسِيحْ فْاللَّهْ.

⁴وْمْلِّي غَيْبَانْ الْمَسِيحْ اللِّي هُوَ حْيَاتْكُمْ، دِيكْ السَّاعَة رَاهْ حْتَّى نْتُمَ غَتْبَانُو مْعَاهْ فْالْعَزّْ دْيَالُه.

⁵إِيوَا قْتْلُو الطّْبِيعَة دْيَالْ الدّْنْيَا اللِّي فِيكُمْ، اللِّي هِيَ الْفْسَادْ، وْالْأُمُورْ الْمْنْجُوسَة، وْالشَّهْوَة، وْالرَّغْبَة الْقْبِيحَة، وْالطّْمَعْ اللِّي هُوَ الْعِبَادَة دْيَالْ الْأَصْنَامْ،

⁶عْلَاحْقَّاشْ بْسْبَابْ هَادْشِّي كَيْنْزَلْ غَضَبْ اللَّهْ عْلَى النَّاسْ اللِّي مَا كَيْطِيعُوهْشْ.

⁷وْرَاكُمْ كْنْتُو بْحَالْ هَكَّا مْنْ قْبَلْ، مْلِّي كْنْتُو كَتْعِيشُو فْهَادْشِّي.

⁸وَلَكِنْ دَابَا رْمِيوْ عْلِيكُمْ ݣَاعْ هَادْ الْأُمُورْ: الْغَضَبْ، السَّخْطْ، الْخُبْتْ، السّْبَّانْ، وْالْكْلَامْ الْقْبِيحْ اللِّي كَيْخْرُجْ مْنْ فُمّْكُمْ.

⁹وْمَا تْكَدْبُوشْ عْلَى بْعْضِيَّاتْكُمْ، حِيتْ رَاكُمْ حَيّْدْتُو عْلِيكُمْ الطّْبِيعَة الْقْدِيمَة وْفْعَايْلْهَا،

¹⁰وْلْبَسْتُو الطّْبِيعَة الجّْدِيدَة اللِّي كَتّْجَدّْدْ فْالْمَعْرِفَة عْلَى حْسَابْ الصُّورَة دْيَالْ هَادَاكْ اللِّي خْلَقْهَا،

¹¹وْهَكَّا، رَاهْ مَا كَايْنْشْ الْفَرْقْ بِينْ الْيُونَانِي وْلِيهُودِي، اللِّي مْخَتّْنْ وْاللِّي مَا مْخَتّْنْشْ، اللِّي مَا كَيْتّْكَلّْمْشْ بْالْيُونَانِيَّة وْاللِّي مَا مْتْحَضّْرْشْ، الْعَبْدْ وْالْحُرّْ، وَلَكِنْ الْمَسِيحْ هُوَ كُلّْشِي وْفْكُلّْشِي.

¹²رَاهْ اللَّهْ خْتَارْكُمْ وْقَدّْسْكُمْ وْكَيْبْغِيكُمْ، هَادْشِّي عْلَاشْ خَاصّْكُمْ تْلَبْسُو الرَّحْمَة، وْاللّْطَافَة، وْالتَّوَاضُعْ، وْالضّْرَافَة، وْالصّْبَرْ،

¹³تّْحَمّْلُو بْعْضِيَّاتْكُمْ، وْسَامْحُو بْعْضِيَّاتْكُمْ إِلَا كَانْتْ عَنْدْ شِي وَاحْدْ شْكْوَى ضْدّْ لَاخُرْ، كِمَا غْفَرْ لِيكُمْ الرَّبّْ، هَكَّا خَاصّْكُمْ حْتَّى نْتُمَ تْدِيرُو.

¹⁴وْفُوقْ هَادْشِّي كُلُّه لْبْسُو الْمْحَبَّة حِيتْ هِيَ اللِّي كَتْوَحّْدْ فْالْكَمَالْ.

¹⁵وْخَلِّيوْ الْهْنَا دْيَالْ الْمَسِيحْ يْسْكُنْ فْقْلُوبْكُمْ، اللِّي عْلَى وْدُّه عَيّْطْ لِيكُمْ اللَّهْ فْدَاتْ وَحْدَة، وْخَاصّْكُمْ تْشَكْرُوهْ.

¹⁶خَلِّيوْ الْكْلْمَة دْ الْمَسِيحْ تْسْكُنْ فِيكُمْ بْالْكْتْرَة، عَلّْمُو وْنَبّْهُو بْعْضِيَّاتْكُمْ بْكُلّْ حْكْمَة، وْغَنِّيوْ وْشْكْرُو اللَّهْ مْنْ قْلُوبْكُمْ بْالْمَزَامِيرْ وْالتَّرَانِيمْ وْالْأَغَانِي الرُّوحِيَّة.

¹⁷وْݣَاعْ دَاكْشِّي اللِّي كَتْݣُولُوهْ وْلَا كَتْدِيرُوهْ، دِيرُوهْ بْإِسْمْ الرَّبّْ يَسُوعْ، وْبِيهْ شْكْرُو اللَّهْ الْآبْ.

¹⁸آ الْعْيَالَاتْ، طِيعُو رْجَالْكُمْ كِيفْ خَاصّْ يْكُونْ قُدَّامْ الرَّبّْ،

¹⁹آ الرّْجَالْ، بْغِيوْ عْيَالَاتْكُمْ وْمَا تْكُونُوشْ قَاسْحِينْ مْعَاهُمْ.

²⁰آ الْوْلَادْ، طِيعُو وَالِدِيكُمْ فْكُلّْشِي حِيتْ هَادْشِّي كَيْرْضِي الرَّبّْ.

²¹آ الْوَالِدِينْ، مَا تْقَهْرُوشْ وْلَادْكُمْ بَاشْ مَا يْفَشْلُوشْ.

²²آ الْعْبِيدْ، طِيعُو سْيَادْكُمْ دْيَالْ الدّْنْيَا فْكُلّْشِي، مَاشِي غِيرْ مْلِّي كَيْكُونُو مْرَاقْبِينْكُمْ بَاشْ تْرْضِيوْ النَّاسْ، وَلَكِنْ طِيعُوهُمْ بْقَلْبْ صَادْقْ وْخَافُو الرَّبّْ،

²³وْݣَاعْ دَاكْشِّي اللِّي كَتْدِيرُوهْ، دِيرُوهْ مْنْ قَلْبْكُمْ، بْحَالْ إِلَا دْرْتُوهْ لْلرَّبّْ مَاشِي لْلنَّاسْ،

²⁴وْدِيرُو فْبَالْكُمْ بْلِّي الرَّبّْ هُوَ اللِّي غَيْجَازِيكُمْ بْالْوَرْتْ مْنْ عَنْدُه، حِيتْ كَتْخَدْمُو لْلرَّبّْ الْمَسِيحْ.

²⁵وَلَكِنْ الضَّالْمْ غَادِي يْتّْعَاقْبْ عْلَى الضُّلْمْ اللِّي دَارُه، وْرَاهْ اللَّهْ مَا كَيْدِيرْشْ الْوْجْهِيَّاتْ.