Read Moroccan Standard Translation رِسَالَةْ كُولُوسِّي 4 Bible Online

رِسَالَةْ كُولُوسِّي 4 - Moroccan Standard Translation bible

رِسَالَةْ كُولُوسِّي 4

¹الْفَصْلْ الرَّابْعْ آ الْسْيَادْ، تْعَامْلُو مْعَ عْبِيدْكُمْ بْالْحَقّْ وْالْعَدْلْ، وْتّْفَكّْرُو بْلِّي حْتَّى نْتُمَ عَنْدْكُمْ سِيّْدْ فْالسّْمَا.

²دَاوْمُو عْلَى الصّْلَاة، وْكُونُو دِيمَا مُوجُودِينْ بَاشْ تْشَكْرُو اللَّهْ فْصْلَاتْكُمْ.

³وْصَلِّيوْ مْنْ جِهْتْنَا حْتَّى حْنَا بَاشْ يْحَلّْ لِينَا اللَّهْ الْبَابْ لْلْكْلَامْ دْيَالُه، وْنْخَبّْرُو بْالسِّرّْ دْ الْمَسِيحْ اللِّي عْلَى وْدُّه أَنَا مْشْدُودْ فْالْحَبْسْ،

⁴وْهَكَّا غَادِي نْبَيّْنُه كِيفْ وَاجْبْ عْلِيَّ نْدِيرْ.

⁵عِيشُو بْالْحْكْمَة مْعَ النَّاسْ اللِّي مَاشِي مُومْنِينْ، وْغْتَنْمُو الْفُرْصَة.

⁶خَلِّيوْ كْلَامْكُمْ مْقْبُولْ وْفِيهْ الْفَايْدَة، بَاشْ تْعَرْفُو كِيفَاشْ خَاصّْكُمْ تْجَاوْبُو كُلّْ وَاحْدْ.

⁷رَاهْ ݣَاعْ الْخْبَارْ دْيَالِي غَادِي يْخَبّْرْكُمْ بِيهَا خُويَا الْعْزِيزْ تِيخِيكُسْ اللِّي أَمِينْ فْخْدَمْتُه، وْكَيْشَارْكْ مْعَايَ فْخْدْمَةْ الرَّبّْ.

⁸رَانِي صِيفْطْتُه لِيكُمْ عْلَى وْدّْ هَادْشِّي، بَاشْ يْوَصّْلْ لِيكُمْ خْبَارْنَا وْيْشَجّْعْ قْلُوبْكُمْ،

⁹وْمْعَاهْ أُنِسِيمُسْ الْخُو الْأَمِينْ وْالْعْزِيزْ اللِّي هُوَ وَاحْدْ مْنّْكُمْ. وْهُمَ غَيْعَاوْدُو لِيكُمْ عْلَى كُلّْ مَا كَيْجْرَا هْنَا.

¹⁰كَيْسَلّْمْ عْلِيكُمْ أَرِسْتَرْخُسْ اللِّي مْشْدُودْ مْعَايَ فْالْحَبْسْ، وْمَرْقُسْ اللِّي مْنْ عَائِلْةْ بَرْنَابَا اللِّي وْصِّيتْكُمْ عْلِيهْ، إِيوَا إِلَا جَا عَنْدْكُمْ رَحّْبُو بِيهْ.

¹¹وْكَيْسَلّْمْ عْلِيكُمْ يَشُوعْ اللِّي مْكَنِّي يُسْطُسْ، رَاهْ هَادُو أَصْلْهُمْ مْنْ لِيهُودْ، وْهُمَ بُوحْدْهُمْ اللِّي كَيْخَدْمُو مْعَايَ فْمَمْلَكَةْ اللَّهْ، وْهُمَ اللِّي كَيْشَجّْعُونِي.

¹²كَيْسَلّْمْ عْلِيكُمْ أَبَفْرَاسْ اللِّي هُوَ وَاحْدْ مْنّْكُمْ وْهُوَ عَبْدْ دْ الْمَسِيحْ يَسُوعْ، رَاهْ دِيمَا كَيْكَافْحْ بْالصّْلَاة عْلَى وْدّْكُمْ، بَاشْ تْبْقَاوْ تَابْتِينْ وْنْتُمَ مْكْمُولِينْ وْعَنْدْكُمْ تِقَة كْبِيرَة فْمُرَادْ اللَّهْ.

¹³وْرَانِي كَنْشْهَدْ لِيهْ بْلِّي كَيْضْرَبْ تَمَارَة بْزَّافْ عْلَى وْدّْكُمْ، وْعْلَى وْدّْ هَادُوكْ اللِّي فْلَاوُدِكِيَّة وْفْهِيَرَابُولِيسْ.

¹⁴كَيْسَلّْمْ عْلِيكُمْ لُوقَا الطّْبِيبْ الْعْزِيزْ، وْدِيمَاسْ.

¹⁵سَلّْمُو عْلَى الْخُوتْ اللِّي فْلَاوُدِكِيَّة، وْعْلَى نِمْفَاسْ وْالْكْنِيسَة اللِّي كَتّْجْمَعْ فْدَارْهَا.

¹⁶وْمْلِّي تّْقْرَا عَنْدْكُمْ هَادْ الرِّسَالَة، صِيفْطُوهَا بَاشْ تّْقْرَا حْتَّى فْالْكْنِيسَة دْيَالْ لَاوُدِكِيَّة، وْالرِّسَالَة اللِّي صِيفْطْتْ لْلَاوُدِكِيَّة قْرَاوْهَا حْتَّى نْتُمَ.

¹⁷وْݣُولُو لْأَرْخِبُّسْ: «رَدّْ بَالْكْ مْزْيَانْ بَاشْ تْكَمّْلْ الْخْدْمَة اللِّي قْبَلْتِيهَا مْنْ عَنْدْ الرَّبّْ».

¹⁸السّْلَامْ كَنْكَتْبُه لِيكُمْ بْيْدِّي أَنَا بُولُسْ. تّْفَكّْرُو بْلِّي رَانِي مْشْدُودْ فْالْحَبْسْ، وْنِعْمَةْ اللَّهْ تْكُونْ مْعَاكُمْ.