Read Moroccan Standard Translation رِسَالَةْ تْسَالُونِيكِي اللّْوّْلَى 1 Bible Online

رِسَالَةْ تْسَالُونِيكِي اللّْوّْلَى 1 - Moroccan Standard Translation bible

رِسَالَةْ تْسَالُونِيكِي اللّْوّْلَى 1

¹الْفَصْلْ اللّْوّْلْ مْنْ بُولُسْ وْسِلْوَانُسْ وْتِيمُوتَاوُسْ، لْلْمُومْنِينْ دْيَاوْلْ كْنِيسْةْ تْسَالُونِيكِي، اللِّي هُمَ دْيَالْ اللَّهْ الْآبْ وْالرَّبّْ يَسُوعْ الْمَسِيحْ: النِّعْمَة وْالْهْنَا لِيكُمْ.

²دِيمَا كَنْشَكْرُو اللَّهْ مْنْ جِهْتْكُمْ كُلّْكُمْ، وْكَنْتّْفَكّْرُوكُمْ فْصْلَاتْنَا.

³وْكَنْتّْفَكّْرُو قُدَّامْ اللَّهْ بَّانَا الْخْدْمَة دْ إِيمَانْكُمْ، وْالْكِفَاحْ دْ مْحَبّْتْكُمْ، وْكِيفَاشْ نْتُمَ تَابْتِينْ فْالرّْجَا اللِّي عَنْدْكُمْ فْرَبّْنَا يَسُوعْ الْمَسِيحْ.

⁴وْرَاهْ حْنَا عَارْفِينْ آ الْخُوتْ الْعْزَازْ عَنْدْ اللَّهْ، بْلِّي اللَّهْ خْتَارْكُمْ،

⁵عْلَاحْقَّاشْ الْإِنْجِيلْ اللِّي خَبّْرْنَاكُمْ بِيهْ مَا كَانْشْ غِيرْ بْالْهَضْرَة، وَلَكِنْ كَانْ بْالدَّلِيلْ الْقْوِي وْبْالرُّوحْ الْقُدُسْ، وْحْنَا مْتْيِقّْنِينْ مْنُّه، وْنْتُمَ كَتْعَرْفُو كِيفَاشْ كْنَّا مْعَاكُمْ عْلَى وْدّْ مْصْلَحْتْكُمْ.

⁶وْرَاكُمْ تْعَلّْمْتُو تْعِيشُو بْحَالْنَا وْبْحَالْ الرَّبّْ، مْلِّي قْبَلْتُو كْلَامْ اللَّهْ فْوَسْطْ الْمْحْنَة الْكْبِيرَة بْالْفَرْحَة اللِّي عْطَاهَا لِيكُمْ الرُّوحْ الْقُدُسْ.

⁷وْهَكَّا وْلِّيتُو مْتَالْ لْݣَاعْ هَادُوكْ اللِّي كَيْآمْنُو فْمَكِدُونِيَة وْفْأَخَائِيَة.

⁸حِيتْ مْنْ عَنْدْكُمْ دَاعْ كْلَامْ الرَّبّْ، مَاشِي غِيرْ فْمَكِدُونِيَة وْأَخَائِيَة، وَلَكِنْ خْبَارْ إِيمَانْكُمْ بْاللَّهْ دَاعْ فْكُلّْ بْلَاصَة حْتَّى مَا بْقَى لِينَا مَا نْݣُولُو.

⁹عْلَاحْقَّاشْ ݣَاعْ النَّاسْ كَيْعَاوْدُو عْلَى كِيفَاشْ رَحّْبْتُو بِينَا مْلِّي كْنَّا عَنْدْكُمْ، وْكِيفَاشْ رْجَعْتُو لْطْرِيقْ اللَّهْ وْمَا بْقِيتُوشْ كَتْعَبْدُو الْأَصْنَامْ، بَاشْ تْخَدْمُو لْلَّهْ الْحَيّْ وْالْحْقِيقِي.

¹⁰وْبَاشْ تّْسْنَّاوْ مْنْ السَّمَاوَاتْ الْمْجِي دْ الْوَلْدْ دْيَالُه، اللِّي بَعْتُه مْنْ بِينْ الْمُوتَى، يَسُوعْ اللِّي كَيْنَجِّينَا مْنْ الْغَضَبْ اللِّي جَايْ دْيَالْ اللَّهْ.