Read Moroccan Standard Translation رِسَالَةْ تْسَالُونِيكِي اللّْوّْلَى 2 Bible Online

رِسَالَةْ تْسَالُونِيكِي اللّْوّْلَى 2 - Moroccan Standard Translation bible

رِسَالَةْ تْسَالُونِيكِي اللّْوّْلَى 2

¹الْفَصْلْ التَّانِي آ الْخُوتْ، رَاكُمْ كَتْعَرْفُو مْزْيَانْ بْلِّي الْمْجِي دْيَالْنَا لْعَنْدْكُمْ مَا كَانْشْ بْلَا فَايْدَة.

²وْوَاخَّا تْعَدّْبْنَا مْنْ قْبَلْ وْعَايْرُونَا فْمْدِينْةْ فِيلِبِّي كِيفْ كَتْعَرْفُو، رَاهْ اللَّهْ شَجّْعْنَا بَاشْ نْخَبّْرُوكُمْ بْالْإِنْجِيلْ دْيَالُه فْوَسْطْ بْزَّافْ دْ الْمَشَاكِيلْ.

³حِيتْ التَّعْلِيمْ دْيَالْنَا مَاشِي غَالْطْ، وْلَا مْنْجُوسْ، وْلَا فِيهْ الْخْدِيعَة،

⁴وَلَكِنْ اللَّهْ جَرّْبْنَا بَاشْ يْأَمّْنَّا عْلَى كْلَامُه، وْهَا حْنَا كَنْخَبّْرُو، مَاشِي بَاشْ نْرْضِيوْ النَّاسْ، وَلَكِنْ بَاشْ نْرْضِيوْ اللَّهْ اللِّي كَيْمْتَحْنْ قْلُوبْنَا.

⁵وْكِيفْ كَتْعَرْفُو، رَاهْ عَمّْرْنَا مَا نَافْقْنَاكُمْ وَلَا فَكّْرْنَا نْطَمْعُو فْشِي حَدّْ، وْاللَّهْ شَاهْدْ.

⁶وْمَا عَمّْرْنَا قَلّْبْنَا عْلَى الْعَزّْ مْنْ عَنْدْ النَّاسْ، لَا مْنْ عَنْدْكُمْ وَلَا مْنْ عَنْدْ غِيرْكُمْ،

⁷وَاخَّا كَانْ مْنْ حَقّْنَا نْلَزّْمُو عْلِيكُمْ رَاسْنَا حِيتْ حْنَا رُسُلْ دْ الْمَسِيحْ، وَلَكِنْ حْنِّينَا عْلِيكُمْ مْلِّي كْنَّا مْعَاكُمْ كِيفْ كَتْحَنّْ الْأُمْ عْلَى وْلَادْهَا،

⁸وْبْسْبَابْ الْمْحَنَّة دْيَالْنَا، كْنَّا مُوجُودِينْ مَاشِي غِيرْ بَاشْ نْعْطِيوْكُمْ الْإِنْجِيلْ دْ اللَّهْ، وَلَكِنْ بَاشْ نْعْطِيوْ حْتَّى حْيَاتْنَا عْلَى قْبَلْكُمْ، عْلَاحْقَّاشْ وْلِّيتُو عْزَازْ عْلِينَا.

⁹وْرَاكُمْ عْقَلْتُو آ الْخُوتْ، شْحَالْ كَافْحْنَا وْدْمَرْنَا فْالْخْدْمَة لِيلْ وْنْهَارْ بَاشْ مَا نْتَقّْلُو عْلَى حْتَّى وَاحْدْ فِيكُمْ، مْلِّي كْنَّا كَنْخَبّْرُوكُمْ بْإِنْجِيلْ اللَّهْ.

¹⁰وْنْتُمَ شْهُودْ، وْاللَّهْ حْتَّى هُوَ شَاهْدْ عْلَى كِيفَاشْ كْنَّا كَنْتّْعَامْلُو مْعَاكُمْ نْتُمَ الْمُومْنِينْ بْالنّْقَاوَة وْالتَّقْوَى وْبْلَا لُومْ.

¹¹وْرَاكُمْ كَتْعَرْفُو بْلِّي كْنَّا مْعَ كُلّْ وَاحْدْ فِيكُمْ بْحَالْ الْبُو مْعَ وْلَادُه،

¹²وْنْصَحْنَاكُمْ، وْشَجّْعْنَاكُمْ، وْرْغَبْنَاكُمْ بَاشْ تْعِيشُو كِيفْ كَيْبْغِي اللَّهْ اللِّي عَيّْطْ لِيكُمْ بَاشْ تْشَارْكُو فْمَمْلَكْتُه وْالْعَزّْ دْيَالُه.

¹³وْهَادْشِّي عْلَاشْ كَنْشَكْرُو اللَّهْ دِيمَا، حِيتْ مْلِّي خَبّْرْنَاكُمْ بْكْلَامْ اللَّهْ، سْمَعْتُوهْ وْقْبَلْتُوهْ مَاشِي بْحَالْ إِلَا هُوَ كْلَامْ النَّاسْ، وَلَكِنْ قْبَلْتُوهْ كِمَا هُوَ فْالْحَقِيقَة، قْبَلْتُو بْلِّي هُوَ كْلَامْ اللَّهْ اللِّي كَيْخْدَمْ فِيكُمْ نْتُمَ الْمُومْنِينْ.

¹⁴وْرَاكُمْ آ الْخُوتْ وْلِّيتُو بْحَالْ كْنَايْسْ اللَّهْ اللِّي فْبْلَادْ الْيَهُودِيَّة، اللِّي هُمَ فْالْمَسِيحْ يَسُوعْ، عْلَاحْقَّاشْ حْتَّى نْتُمَ تْعَدّْبْتُو عْلَى يْدِّينْ وْلَادْ قْبِيلْتْكُمْ، كِيفْ تّْعَدّْبُو حْتَّى هُمَ عْلَى يْدّْ لِيهُودْ،

¹⁵اللِّي قْتْلُو الرَّبّْ يَسُوعْ وْالْأَنْبِيَا دْيَاوْلْهُمْ، وْتّْعَدَّاوْ عْلِينَا حْنَا، وْمَا كَيْرْضِيوْشْ اللَّهْ وْمْعَادْيِينْ مْعَ النَّاسْ كُلّْهُمْ.

¹⁶وْمَا كَيْخَلِّيوْنَاشْ نْخَبّْرُو الشّْعُوبْ اللِّي مَاشِي يْهُودْ بْكْلَامْ اللَّهْ بَاشْ يْنْجَاوْ، وْهَكَّا كَيْزِيدُو فْدْنُوبْهُمْ كُلّْ وَقْتْ، وَلَكِنْ فْاللّْخْرْ نْزَلْ عْلِيهُمْ غَضَبْ اللَّهْ.

¹⁷أَمَّا حْنَا آ الْخُوتْ، رَاهْ مْلِّي بَعّْدْنَا عْلِيكُمْ شِي وَقْتْ بْالْوْجَهْ مَاشِي بْالْقَلْبْ، دْرْنَا كْتَرْ مْنْ جَهْدْنَا بَاشْ نْشُوفُوكُمْ حِيتْ كْنَّا مْشْتَاقِينْ لِيكُمْ.

¹⁸عْلَى هَادْشِّي كْنَّا بَاغْيِينْ نْجِيوْ لْعَنْدْكُمْ بْزَّافْ دْ الْمَرَّاتْ، بْالْخُصُوصْ أَنَا بُولُسْ، وَلَكِنْ الشِّيطَانْ حْصَرْنَا.

¹⁹حِيتْ شْكُونْ هُوَ رْجَانَا وْالْفَرْحَة دْيَالْنَا، وْتَاجْنَا اللِّي غَنْفْتَخْرُو بِيهْ قُدَّامْ رَبّْنَا يَسُوعْ الْمَسِيحْ نْهَارْ يْرْجَعْ، وَاشْ مَاشِي نْتُمَ؟

²⁰رَاهْ نْتُمَ الْعَزّْ دْيَالْنَا وْالْفَرْحَة دْيَالْنَا.