Read Moroccan Standard Translation رِسَالَةْ تْسَالُونِيكِي اللّْوّْلَى 3 Bible Online

رِسَالَةْ تْسَالُونِيكِي اللّْوّْلَى 3 - Moroccan Standard Translation bible

رِسَالَةْ تْسَالُونِيكِي اللّْوّْلَى 3

¹الْفَصْلْ التَّالْتْ وْحِيتْ مَا قْدَرْنَاشْ نْتّْحَمّْلُو، فَكّْرْنَا بْلِّي حْسَنْ نْبْقَاوْ بُوحْدْنَا فْأَتِينَا.

²وْصِيفْطْنَا خُونَا تِيمُوتَاوُسْ اللِّي كَيْخْدَمْ لْلَّهْ وْكَيْعَاوْنَّا نْخَبّْرُو بْإِنْجِيلْ الْمَسِيحْ، بَاشْ يْقَوِّيكُمْ وْيْشَجّْعْكُمْ فْإِيمَانْكُمْ،

³وْبَاشْ حْتَّى وَاحْدْ فِيكُمْ مَا يْرْجَعْ عْلَى إِيمَانُه بْسْبَابْ هَادْ الْمْحَايْنْ. وْرَاكُمْ كَتْعَرْفُو بْلِّي تّْخْتَارِينَا لْهَادْشِّي.

⁴حِيتْ مْلِّي كْنَّا عَنْدْكُمْ، سْبَقْ وْݣْلْنَا لِيكُمْ بْلِّي غَنْتّْمَحّْنُو، وْهَادْشِّي نِيتْ اللِّي جْرَا كِيفْ كَتْعَرْفُو.

⁵وْعْلَى وْدّْ هَادْشِّي، مْلِّي مَا قْدَرْتْشْ مَازَالْ نْصْبَرْ، صِيفْطْتْ لِيكُمْ تِيمُوتَاوُسْ بَاشْ نْعْرَفْ فِينْ وْصَلْ إِيمَانْكُمْ، حِيتْ كْنْتْ خَايْفْ لَيْكُونْ الشِّيطَانْ جَرّْبْكُمْ، وْتْوَلِّي تَمَارَة اللِّي ضْرَبْنَاهَا عْلَى وْدّْكُمْ بْلَا فَايْدَة.

⁶وَلَكِنْ دَابَا رْجَعْ تِيمُوتَاوُسْ مْنْ عَنْدْكُمْ، وْخَبّْرْنَا عْلَى إِيمَانْكُمْ وْمْحَبّْتْكُمْ، وْبْلِّي كَتّْفَكّْرُونَا دِيمَا بْالْخِيرْ، وْمْشْتَاقِينْ تْشُوفُونَا كِمَا حْتَّى حْنَا مْشْتَاقِينْ نْشُوفُوكُمْ،

⁷عْلَى هَادْشِّي، تْشَجّْعْنَا مْنْ جِهْتْكُمْ آ الْخُوتْ عْلَى وْدّْ إِيمَانْكُمْ، وَاخَّا حْنَا فْوَسْطْ الْمْحَايْنْ وْالْعْدَابْ.

⁸عْلَاحْقَّاشْ دَابَا كَنْعِيشُو هَانْيِينْ مَا دَامْ نْتُمَ تَابْتِينْ فْالرَّبّْ.

⁹إِيوَا كِيفَاشْ نْقَدْرُو نْشَكْرُو اللَّهْ مْنْ جِهْتْكُمْ عْلَى وْدّْ الْفَرْحَة الْكْبِيرَة اللِّي كَنْحَسُّو بِيهَا بْسْبَابْكُمْ قُدَّامْ إِلَاهْنَا؟

¹⁰وْرَاهْ كَنْطْلْبُو اللَّهْ لِيلْ وْنْهَارْ بَاشْ نْشُوفُوكُمْ، وْنْكَمّْلُو دَاكْشِّي اللِّي مَازَالْ نَاقْصْ فْإِيمَانْكُمْ.

¹¹وْكَنْطْلَبْ مْنْ اللَّهْ بَّانَا بْنَفْسُه وْرَبّْنَا يَسُوعْ، بَاشْ يْوَجّْدْ لِينَا الطّْرِيقْ نْجِيوْ لْعَنْدْكُمْ.

¹²وْكَنْطْلَبْ مْنْ الرَّبّْ يْزِيدْ يْكَبّْرْكُمْ وْيْكَتّْرْ فِيكُمْ الْمْحَبَّة لْبَعْضِيَّاتْكُمْ وْلْݣَاعْ النَّاسْ، بْحَالْ مْحَبّْتْنَا لِيكُمْ حْتَّى حْنَا،

¹³بَاشْ يْتَبّْتْ قْلُوبْكُمْ وْتْكُونُو مْقَدّْسِينْ وْبْلَا لُومْ قُدَّامْ اللَّهْ بَّانَا مْلِّي غَيْرْجَعْ رَبّْنَا يَسُوعْ مْعَ ݣَاعْ الْمُومْنِينْ الْمْقَدّْسِينْ دْيَالُه. [آمِينْ]