Read Moroccan Standard Translation رِسَالَةْ تْسَالُونِيكِي اللّْوّْلَى 4 Bible Online

رِسَالَةْ تْسَالُونِيكِي اللّْوّْلَى 4 - Moroccan Standard Translation bible

رِسَالَةْ تْسَالُونِيكِي اللّْوّْلَى 4

¹الْفَصْلْ الرَّابْعْ وْدَابَا آ الْخُوتْ، رَاكُمْ تْعَلّْمْتُو مْنَّا كِيفَاشْ تْعِيشُو بَاشْ تْرْضِيوْ اللَّهْ، وْهَادْشِّي هُوَ اللِّي كَتْدِيرُو، وَلَكِنْ دَابَا كَنْطْلْبُو مْنّْكُمْ وْكَنْتّْرَجَّاوْكُمْ فْإِسْمْ رَبّْنَا يَسُوعْ بَاشْ تْزِيدُو تْدِيرُوهْ كْتَرْ.

²حِيتْ رَاكُمْ كَتْعَرْفُو الْوْصِيَّاتْ اللِّي عْطِينَاكُمْ مْنْ عَنْدْ الرَّبّْ يَسُوعْ.

³وْرَاهْ اللَّهْ بْغَاكُمْ تْعِيشُو مْقَدّْسِينْ، وْتْبَعّْدُو عْلَى الْفْسَادْ،

⁴وْكُلّْ وَاحْدْ فِيكُمْ خَاصُّه يْعْرَفْ كِيفَاشْ يْسْتَخْدَمْ الدَّاتْ دْيَالُه بْالْقَدَاسَة وْالشَّرَفْ،

⁵وْمَا يْعِيشْ فْالشَّهْوَة الْفَاسْدَة بْحَالْ الشّْعُوبْ اللِّي مَا كَيْآمْنُوشْ بْاللَّهْ وْمَا كَيْعَرْفُوهْشْ.

⁶وْحْتَّى وَاحْدْ مَا يْآدِي خُوهْ وْلَا يْضَرُّه فْهَادْشِّي، عْلَاحْقَّاشْ اللَّهْ غَيْعَاقْبْ كُلّْ مْنْ كَيْدِيرْ بْحَالْ هَادْشِّي كِيفْ ݣْلْنَا لِيكُمْ مْنْ قْبَلْ وْنَبّْهْنَاكُمْ.

⁷حِيتْ اللَّهْ مَا خْتَارْنَاشْ بَاشْ نْعِيشُو مْنْجُوسِينْ، وَلَكِنْ بَاشْ نْعِيشُو مْقَدّْسِينْ.

⁸عْلَى هَادْشِّي، رَاهْ اللِّي مَا كَيْقْبَلْشْ هَادْ الْوْصِيَّاتْ مَاشِي مَا كَيْقْبَلْشْ النَّاسْ، وَلَكِنْ مَا كَيْقْبَلْشْ اللَّهْ اللِّي كَيْعْطِيكُمْ الرُّوحْ الْقُدُسْ دْيَالُه.

⁹أَمَّا بْالنّْسْبَة لْمْحَبَّةْ الْخُوتْ، رَاكُمْ مَا مْحْتَاجِينْشْ نْكْتَبْ لِيكُمْ عْلِيهَا، حِيتْ نْتُمَ بْرَاسْكُمْ تْعَلّْمْتُو مْنْ اللَّهْ كِيفَاشْ تْبْغِيوْ بْعْضِيَّاتْكُمْ.

¹⁰وْرَاكُمْ بْالصَّحْ كَتْبْغِيوْ ݣَاعْ الْخُوتْ اللِّي فْمَكِدُونِيَة كُلّْهَا. وَلَكِنْ كَنْطْلْبُو مْنّْكُمْ آ الْخُوتْ تْدِيرُو كْتَرْ مْنْ هَادْشِّي،

¹¹وْتْرَدُّو بَالْكُمْ بَاشْ تْعِيشُو هَانْيِينْ، وْتْدِّيوْهَا فْدَاكْشِّي اللِّي كَيْهَمّْكُمْ، وْتْخَدْمُو بْدْرَاعْكُمْ كِيفْ وْصِّينَاكُمْ،

¹²بَاشْ تْعِيشُو مْحْتَرْمِينْ قُدَّامْ النَّاسْ اللِّي مَاشِي مُومْنِينْ، وْمَا تْحْتَاجُو لْحَدّْ حْتَّى فْشِي حَاجَة.

¹³بْغِينَاكُمْ آ الْخُوتْ تْكُونُو عَارْفِينْ آشْ غَيْجْرَا لْهَادُوكْ اللِّي مَاتُو، بَاشْ مَا تْحَزْنُوشْ بْحَالْ النَّاسْ لْخْرِينْ اللِّي مَا عَنْدْهُمْ رْجَا.

¹⁴حِيتْ إِلَا كَنْآمْنُو بْلِّي يَسُوعْ مَاتْ وْتّْبْعَتْ مْنْ الْمُوتْ، رَاهْ كَنْآمْنُو بْلِّي حْتَّى هَادُوكْ اللِّي مَاتُو غَيْبْعَتْهُمْ اللَّهْ مْعَ يَسُوعْ.

¹⁵وْهَادْشِّي اللِّي كَنْݣُولُوهْ لِيكُمْ رَاهْ هُوَ كْلَامْ الرَّبّْ: حْنَا اللِّي غَنْبْقَاوْ حَيِّينْ حْتَّى لْلْمْجِي دْيَالْ الرَّبّْ مَا غَادِيشْ نْسَبْقُو هَادُوكْ اللِّي مَاتُو.

¹⁶عْلَاحْقَّاشْ الرَّبّْ بْرَاسُه غَادِي يْنْزَلْ مْنْ السّْمَا مْلِّي يْتّْسْمَعْ صُوتْ قْوِي، وْصُوتْ رَئِيسْ الْمَلَايْكَة وْصُوتْ الْبُوقْ دْيَالْ اللَّهْ، وْهَادُوكْ اللِّي مَاتُو وْهُمَ كَيْآمْنُو بْالْمَسِيحْ غَيْتّْبَعْتُو هُمَ اللّْوّْلِينْ.

¹⁷مْنْ بَعْدْ حْنَا اللِّي بَاقْيِينْ حَيِّينْ، غَنْتّْخَطْفُو مْعَاهُمْ فْالسّْحَابْ بَاشْ نْتّْلَاقَاوْ مْعَ الرَّبّْ فْالسّْمَا، وْهَكَّا غَنْكُونُو دِيمَا مْعَ الرَّبّْ.

¹⁸عْلَى هَادْشِّي شَجّْعُو بْعْضِيَّاتْكُمْ بْهَادْ الْكْلَامْ.