Read Moroccan Standard Translation رِسَالَةْ تْسَالُونِيكِي اللّْوّْلَى 5 Bible Online

رِسَالَةْ تْسَالُونِيكِي اللّْوّْلَى 5 - Moroccan Standard Translation bible

رِسَالَةْ تْسَالُونِيكِي اللّْوّْلَى 5

¹الْفَصْلْ الْخَامْسْ أَمَّا بْالنّْسْبَة لْلزّْمَانْ وْالْوَقْتْ، رَاهْ مَا تْحْتَاجُوشْ آ الْخُوتْ نْكْتَبْ لِيكُمْ عْلِيهُمْ،

²وْرَاكُمْ كَتْعَرْفُو بْالتَّدْقِيقْ بْلِّي النّْهَارْ اللِّي غَيْرْجَعْ فِيهْ الرَّبّْ غَيْجِي بْحَالْ الشّْفَارْ فْاللِّيلْ.

³وْمْلِّي غَيْݣُولُو النَّاسْ: «وْلَّى الْهْنَا وْالْأَمَانْ»، دِيكْ السَّاعَة غَيْنْزَلْ عْلِيهُمْ الْهْلَاكْ عْلَى غَفْلَة، بْحَالْ الْوْجَعْ دْ الْمْرَاة الْحَامْلَة اللِّي غَتْوْلَدْ، وْمَا غَيْقَدْرُوشْ يْهَرْبُو.

⁴وَلَكِنْ نْتُمَ آ الْخُوتْ، رَاكُمْ مَاشِي فْالضّْلَامْ بَاشْ يْجِيكُمْ دَاكْ النّْهَارْ عْلَى غَفْلَة بْحَالْ الشّْفَارْ.

⁵كُلّْكُمْ وْلَادْ النُّورْ وْوْلَادْ النّْهَارْ. رَاهْ حْنَا مَاشِي دْيَالْ اللِّيلْ وْلَا دْيَالْ الضّْلَامْ.

⁶هَادْشِّي عْلَاشْ مَا خَاصّْنَاشْ نّْعْسُو بْحَالْ لْخْرِينْ، وَلَكِنْ خَاصّْنَا نْسَهْرُو وْنْكُونُو عْلَى بَالْ.

⁷حِيتْ اللِّي كَيْنَعْسُو، كَيْنَعْسُو بْاللِّيلْ، وْاللِّي كَيْسَكْرُو، كَيْسَكْرُو بْاللِّيلْ.

⁸أَمَّا حْنَا اللِّي دْيَالْ النّْهَارْ، رَاهْ خَاصّْنَا نْكُونُو فَايْقِينْ، لَابْسِينْ الضّْرَّاݣَة دْ الْإِيمَانْ وْالْمْحَبَّة، وْالْكَاسْكْ اللِّي هُوَ الرّْجَا دْيَالْ النّْجَا.

⁹عْلَاحْقَّاشْ اللَّهْ مَا خْتَارْنَاشْ بَاشْ يْنَزّْلْ عْلِينَا الْغَضَبْ، وَلَكِنْ بَاشْ يْكُونْ لِينَا النّْجَا بْرَبّْنَا يَسُوعْ الْمَسِيحْ،

¹⁰اللِّي مَاتْ عْلَى وْدّْنَا بَاشْ نْحْيَاوْ كُلّْنَا مْعَاهْ سْوَا كْنَّا حَيِّينْ وْلَا مْيّْتِينْ.

¹¹عْلَى دَاكْشِّي شَجّْعُو بْعْضِيَّاتْكُمْ وْبْنِيوْ بْعْضِيَّاتْكُمْ كِمَا كَتْدِيرُو.

¹²آ الْخُوتْ، كَنْطْلْبُو مْنّْكُمْ بَاشْ تْحْتَرْمُو اللِّي كَيْخَدْمُو بِينَاتْكُمْ فْالْكْنِيسَة وْاللِّي مْسْؤُولِينْ عْلِيكُمْ فْالرَّبّْ وْكَيْنَبّْهُوكُمْ،

¹³حْتَرْمُوهُمْ بْزَّافْ وْبْغِيوْهُمْ عْلَى وْدّْ الْخْدْمَة دْيَالْهُمْ. عِيشُو فْالْهْنَا مْعَ بْعْضِيَّاتْكُمْ.

¹⁴وْكَنْطْلْبُو مْنّْكُمْ آ الْخُوتْ بَاشْ تْنَبّْهُو الْمْعْݣَازِينْ، وْتْشَجّْعُو اللِّي كَيْخَافُو، وْتْعَاوْنُو الْمْحْتَاجِينْ، وْتْصَبْرُو مْعَ ݣَاعْ النَّاسْ.

¹⁵رْدُّو بَالْكُمْ بَاشْ حْتَّى وَاحْدْ مَا يْجَازِي لَاخُرْ عْلَى الشَّرّْ بْالشَّرّْ، وَلَكِنْ بْغِيوْ دِيمَا الْخِيرْ لْبَعْضِيَّاتْكُمْ وْلْݣَاعْ النَّاسْ.

¹⁶كُونُو دِيمَا فْرْحَانِينْ،

¹⁷دَاوْمُو عْلَى الصّْلَاة،

¹⁸شْكْرُو اللَّهْ كِمَا بْغَا يْكُونْ الْحَالْ، حِيتْ هَادَا هُوَ مُرَادْ اللَّهْ لِيكُمْ نْتُمَ اللِّي فْالْمَسِيحْ يَسُوعْ.

¹⁹مَا تْطْفِيوْشْ الرُّوحْ الْقُدُسْ،

²⁰مَا تْحْتَقْرُوشْ كْلَامْ النُّبُوَّاتْ.

²¹جَرّْبُو كُلّْشِي، وْشْدُّو فْالْحَاجَة الْمْزْيَانَة.

²²بَعّْدُو عْلَى كُلّْ حَاجَة كَتْشْبَهْ لْلشَّرّْ.

²³وْإِلَاهْ الْهْنَا بْرَاسُه يْقَدّْسْكُمْ، وْيْحْفَضْ رُوحْكُمْ وْنْفْسْكُمْ وْدَاتْكُمْ، بَاشْ تْكُونُو بْلَا لُومْ مْلِّي يْرْجَعْ رَبّْنَا يَسُوعْ الْمَسِيحْ.

²⁴وْرَاهْ هَادَاكْ اللِّي كَيْعَيّْطْ لِيكُمْ أَمِينْ وْغَيْوْفِي بْكْلْمْتُه.

²⁵آ الْخُوتْ، صْلِّيوْ مْنْ جِهْتْنَا.

²⁶سَلّْمُو عْلَى الْخُوتْ كُلّْهُمْ بْبُوسَة مْقَدّْسَة.

²⁷وْرَانِي كَنْرْغَبْكُمْ فْإِسْمْ الرَّبّْ بَاشْ تْقْرَاوْ هَادْ الرِّسَالَة عْلَى ݣَاعْ الْخُوتْ.

²⁸وْالنِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَاكُمْ.