Read Moroccan Standard Translation رِسَالَةْ تْسَالُونِيكِي التَّانِيَّة 1 Bible Online

رِسَالَةْ تْسَالُونِيكِي التَّانِيَّة 1 - Moroccan Standard Translation bible

رِسَالَةْ تْسَالُونِيكِي التَّانِيَّة 1

¹الْفَصْلْ اللّْوّْلْ مْنْ بُولُسْ وْسِلْوَانُسْ وْتِيمُوتَاوُسْ، لْكْنِيسْةْ تْسَالُونِيكِي، اللِّي هِيَ دْيَالْ اللَّهْ بَّانَا وْالرَّبّْ يَسُوعْ الْمَسِيحْ،

²النِّعْمَة وْالْهْنَا لِيكُمْ مْنْ اللَّهْ بَّانَا وْالرَّبّْ يَسُوعْ الْمَسِيحْ.

³خَاصّْنَا نْشَكْرُو اللَّهْ دِيمَا مْنْ جِهْتْكُمْ آ الْخُوتْ كِمَا كَيْلِيقْ، عْلَاحْقَّاشْ إِيمَانْكُمْ كَيْكْبَرْ بْزَّافْ، وْالْمْحَبَّة دْيَالْكُمْ لْبَعْضِيَّاتْكُمْ كَتْزِيدْ تْكْتَرْ فِيكُمْ كُلّْكُمْ.

⁴وْحْنَا بْرَاسْنَا وْلِّينَا كَنْفْتَخْرُو بِيكُمْ فْكْنَايْسْ اللَّهْ، مْنْ جِهْةْ صْبَرْكُمْ وْإِيمَانْكُمْ فْوَسْطْ ݣَاعْ التَّعَدُّو وْالْمْحَايْنْ اللِّي كَتّْحَمّْلُوهُمْ.

⁵وْهَادْشِّي رَاهْ حُجَّة بْلِّي اللَّهْ كَيْحْكَمْ بْالْعَدْلْ، وْعْلِيهَا كَتْسْتَاهْلُو مَمْلَكَةْ اللَّهْ اللِّي عْلَى وْدّْهَا كَتّْعَدّْبُو.

⁶وْحِيتْ اللَّهْ عَادْلْ فْالْحُكْمْ دْيَالُه، عَنْدُه الْحَقّْ يْمَحّْنْ هَادُوكْ اللِّي كَيْمَحّْنُوكُمْ،

⁷وْيْعْطِيكُمْ الرَّاحَة نْتُمَ اللِّي كَتّْمَحّْنُو كِمَا غَيْعْطِيهَا لِينَا حْتَّى حْنَا، مْلِّي يْجِي الرَّبّْ يَسُوعْ مْنْ السّْمَا مْعَ الْمَلَايْكَة دْيَالُه الْقْوِيِّينْ،

⁸فْوَسْطْ شْعَّالَة دْ الْعَافْيَة، بَاشْ يْعَاقْبْ هَادُوكْ اللِّي مَا كَيْعَرْفُوشْ اللَّهْ وْاللِّي مَا كَيْطِيعُوشْ إِنْجِيلْ رَبّْنَا يَسُوعْ.

⁹هَادُو رَاهُمْ غَيْتّْعَاقْبُو بْالْهْلَاكْ الدَّايْمْ، وْغَيْكُونُو بْعَادْ عْلَى الرَّبّْ وْعْلَى الْعَزّْ دْيَالْ قُوّْتُه،

¹⁰مْلِّي غَيْرْجَعْ فْهَادَاكْ النّْهَارْ، بَاشْ يْعْطِيوْهْ الْمْقَدّْسِينْ دْيَالُه الْعَزّْ وْيْتّْعَجّْبُو مْنُّه ݣَاعْ الْمُومْنِينْ اللِّي حْتَّى نْتُمَ مْنّْهُمْ، عْلَاحْقَّاشْ آمْنْتُو بْالْكْلَامْ اللِّي خَبّْرْنَاكُمْ بِيهْ.

¹¹وْهَادْشِّي عْلَاشْ كَنْصَلِّيوْ دِيمَا مْنْ جِهْتْكُمْ، بَاشْ يْرَدّْكُمْ إِلَاهْنَا تْسْتَاهْلُو تْعِيشُو دَاكْشِّي اللِّي عْلَى وْدُّه عَيّْطْ لِيكُمْ، وْبَاشْ يْكَمّْلْ بْالْقُوَّة دْيَالُه ݣَاعْ الْحْوَايْجْ الْمْزْيَانِينْ اللِّي كَتْبْغِيوْ تْدِيرُوهُمْ، وْيْرَدّْ الْخْدْمَة دْ إِيمَانْكُمْ مْكْمُولَة.

¹²وْهَكَّا غَيْتّْعْطَى الْعَزّْ لْإِسْمْ رَبّْنَا يَسُوعْ بِيكُمْ، وْحْتَّى نْتُمَ غَيْكُونْ لِيكُمْ الْعَزّْ، وْهَادْشِّي بْفْضَلْ نِعْمَةْ إِلَاهْنَا وْالرَّبّْ يَسُوعْ الْمَسِيحْ.