Read Moroccan Standard Translation رِسَالَةْ تْسَالُونِيكِي التَّانِيَّة 2 Bible Online

رِسَالَةْ تْسَالُونِيكِي التَّانِيَّة 2 - Moroccan Standard Translation bible

رِسَالَةْ تْسَالُونِيكِي التَّانِيَّة 2

¹الْفَصْلْ التَّانِي آ الْخُوتْ، رَاهْ رَبّْنَا يَسُوعْ الْمَسِيحْ غَيْرْجَعْ وْغَنْتّْجَمْعُو مْعَاهْ. وْعْلَى هَادْشِّي، كَنْطْلَبْ مْنّْكُمْ

²بَاشْ مَا تّْزَعْزْعُوشْ فْأَفْكَارْكُمْ دْغْيَا، وْمَا تّْخَلْعُوشْ بْشِي رُوحْ، وْلَا بْشِي كْلَامْ آخُرْ، وْلَا بْشِي رِسَالَة تّْݣَالْ لِيكُمْ بْلِّي هِيَ مْنْ عَنْدْنَا، وَاخَّا يْخَلِّيكُمْ هَادْشِّي تْضَنُّو بْلِّي نْهَارْ الرَّبّْ وْصَلْ.

³مَا تْخَلِّيوْ حْتَّى وَاحْدْ يْخْدَعْكُمْ بْشِي طَرِيقَة كِمَا بْغَاتْ تْكُونْ، حِيتْ قْبَلْ مَا يْوْصَلْ دَاكْ النّْهَارْ لَابْدّْ مَا يْبَانْ الْكُفْرْ فْاللّْوّْلْ، وْبْنَادْمْ الْمْشْرَارْ اللِّي غَيْتّْهْلَكْ فْجَهْنَّمْ،

⁴هَادَاكْ اللِّي غَيْضَادّْ وْيْدِيرْ رَاسُه فُوقْ ݣَاعْ دَاكْشِّي اللِّي كَيْحَسْبُوهْ النَّاسْ إِلَاهْ وْكَيْعَبْدُوهْ، لْدَرَجْةْ غَيْݣْلَسْ فْبِيتْ اللَّهْ وْغَيْݣُولْ بْلِّي هُوَ اللَّهْ وْغَيْدِيرْ رَاسُه حْسَنْ مْنُّه.

⁵وَاشْ مَا كَتّْفَكّْرُوشْ بْلِّي ݣْلْتْ لِيكُمْ هَادْشِّي مْلِّي كْنْتْ عَنْدْكُمْ؟

⁶وْدَابَا رَاكُمْ عَارْفِينْ أَشْنُو كَيْحَبْسُه بَاشْ مَا يْبَانْشْ، حْتَّى يْوْصَلْ الْوَقْتْ دْيَالُه.

⁷حِيتْ السِّرّْ دْيَالْ الشَّرّْ رَاهْ كَيْخْدَمْ دَابَا، حْتَّى يْتّْحَيّْدْ هَادَاكْ اللِّي كَيْحَبْسُه،

⁸وْدِيكْ السَّاعَة غَيْبَانْ الْمْشْرَارْ، اللِّي غَيْفْنِيهْ الرَّبّْ يَسُوعْ بْنَفْخَة مْنْ فُمُّه، وْغَيْغَبّْرْ لِيهْ لَاتَرْ بْالْقُوَّة دْ الرّْجُوعْ دْيَالُه.

⁹الْمْجِي دْيَالْ الْمْشْرَارْ غَيْكُونْ بْالْقُوَّة دْ الشِّيطَانْ، وْغَيْدِيرْ ݣَاعْ الْمُعْجِزَاتْ وْالْعَلَامَاتْ وْالْعْجَايْبْ اللِّي فِيهُمْ الْخْدِيعَة،

¹⁰وْݣَاعْ نْوَاعْ الشَّرّْ، اللِّي بِيهْ غَيْخْدَعْ هَادُوكْ اللِّي غَيْتّْهَلْكُو، عْلَاحْقَّاشْ مَا قْبْلُوشْ مْحَبَّةْ الْحَقّْ بَاشْ يْنْجَاوْ.

¹¹وْعْلَى هَادْشِّي كَيْصِيفْطْ لِيهُمْ اللَّهْ اللِّي يْغَلّْطْهُمْ بَاشْ يْآمْنُو بْالْكْدُوبْ،

¹²وْهَكَّا غَيْتّْعَاقْبُو ݣَاعْ اللِّي مَا آمْنُوشْ بْالْحَقّْ، وَلَكِنْ فْرْحُو بْالدّْنُوبْ.

¹³وَلَكِنْ حْنَا آ الْخُوتْ الْعْزَازْ عْلَى الرَّبّْ، رَاهْ وَاجْبْ عْلِينَا نْشَكْرُو اللَّهْ دِيمَا عْلَى وْدّْكُمْ، عْلَاحْقَّاشْ اللَّهْ خْتَارْكُمْ مْنْ الْبْدُو بَاشْ تْنْجَاوْ بْالتّْقْدِيسْ دْيَالْ الرُّوحْ الْقُدُسْ، وْبْالْإِيمَانْ دْيَالْكُمْ بْالْحَقّْ.

¹⁴وْعْلَى هَادْشِّي عَيّْطْ لِيكُمْ بْالْإِنْجِيلْ اللِّي خَبّْرْنَاكُمْ بِيهْ، بَاشْ يْكُونْ لِيكُمْ الْعَزّْ دْيَالْ رَبّْنَا يَسُوعْ الْمَسِيحْ.

¹⁵إِيوَا آ الْخُوتْ، تْبْتُو وْشْدُّو فْالْعَادَاتْ اللِّي تْعَلّْمْتُوهَا مْنَّا، سْوَا بْكْلَامْنَا وْلَا بْالرَّسَائِلْ دْيَالْنَا.

¹⁶وْكَنْطْلَبْ رَبّْنَا يَسُوعْ الْمَسِيحْ، وْاللَّهْ بُونَا اللِّي بْغَانَا وْبْالنِّعْمَة دْيَالُه عْطَانَا التَّشْجِيعْ الدَّايْمْ وْالرّْجَا الْمْزْيَانْ،

¹⁷بَاشْ يْشَجّْعْكُمْ وْيْتَبّْتْكُمْ فْݣَاعْ الْأُمُورْ الْمْزْيَانَة اللِّي كَتْدِيرُوهَا وْكَتْݣُولُوهَا.