Read Moroccan Standard Translation رِسَالَةْ تْسَالُونِيكِي التَّانِيَّة 3 Bible Online

رِسَالَةْ تْسَالُونِيكِي التَّانِيَّة 3 - Moroccan Standard Translation bible

رِسَالَةْ تْسَالُونِيكِي التَّانِيَّة 3

¹الْفَصْلْ التَّالْتْ وْفْاللّْخْرْ آ الْخُوتْ، صْلِّيوْ مْنْ جِهْتْنَا، بَاشْ كْلَامْ الرَّبّْ يْوْصَلْ دْغْيَا، وْبَاشْ يْتّْعْطَى لِيهْ الْعَزّْ كِمَا تّْعْطَى لِيهْ عَنْدْكُمْ حْتَّى نْتُمَ،

²وْبَاشْ اللَّهْ يْعْتَقْنَا مْنْ النَّاسْ الْمْشْرَارِينْ وْالْقْبَاحْ. حِيتْ مَاشِي ݣَاعْ النَّاسْ مُومْنِينْ.

³وَلَكِنْ الرَّبّْ رَاهْ أَمِينْ، وْهُوَ اللِّي غَيْتَبّْتْكُمْ وْغَيْحْفَضْكُمْ مْنْ الشِّيطَانْ.

⁴وْعَنْدْنَا التِّقَة فْالرَّبّْ مْنْ جِهْتْكُمْ بْلِّي رَاكُمْ كَتْدِيرُو دَاكْشِّي اللِّي وْصِّينَاكُمْ بِيهْ وْغَتْبْقَاوْ تْدِيرُوهْ.

⁵وْالرَّبّْ يْهْدِيكُمْ بَاشْ تْبْغِيوْ اللَّهْ، وْبَاشْ يْكُونْ عَنْدْكُمْ الصّْبَرْ دْيَالْ الْمَسِيحْ.

⁶وْنْوَصِّيكُمْ آ الْخُوتْ، فْإِسْمْ رَبّْنَا يَسُوعْ الْمَسِيحْ، بَاشْ تْبَعّْدُو عْلَى كُلّْ خُو مْعْݣَازْ، وْمَا كَيْدِيرْشْ بْدَاكْشِّي اللِّي تْعَلّْمُه مْنَّا.

⁷وْرَاكُمْ كَتْعَرْفُو مْزْيَانْ كِيفَاشْ خَاصّْكُمْ تْكُونُو بْحَالْنَا، عْلَاحْقَّاشْ مَا كْنَّاشْ مْعْݣَازِينْ مْلِّي كْنَّا مْعَاكُمْ،

⁸وْعَمّْرْنَا مَا عْشْنَا عْلَى حْسَابْ شِي حَدّْ، وَلَكِنْ كْنَّا كَنْخَدْمُو وْكَنْكَافْحُو لِيلْ وْنْهَارْ بَاشْ مَا نْتَقّْلُو عْلَى حْتَّى وَاحْدْ فِيكُمْ.

⁹مَاشِي حِيتْ مَا عَنْدْنَاشْ الْحَقّْ فْالْمُعَاوَنَة دْيَالْكُمْ، وَلَكِنْ حِيتْ بْغِينَا نْكُونُو مْتَالْ لِيكُمْ وْتْكُونُو بْحَالْنَا.

¹⁰حِيتْ حْتَّى مْلِّي كْنَّا عَنْدْكُمْ، وْصِّينَاكُمْ بْهَادْشِّي: «اللِّي مَا بْغَاشْ يْخْدَمْ، رَاهْ مَا خَاصُّوشْ يَاكُلْ».

¹¹وْݣْلْنَا هَادْشِّي حِيتْ سْمَعْنَا بْلِّي شِي وْحْدِينْ مْنّْكُمْ مْعْݣَازِينْ وْمَا عَنْدْهُمْ حْتَّى خْدْمَة وْفْضُولِيِّينْ.

¹²بْحَالْ هَادْ النَّاسْ كَنْوَصِّيوْهُمْ وْكَنْرَغْبُوهُمْ فْالرَّبّْ يَسُوعْ الْمَسِيحْ بَاشْ يْدِّيوْهَا فْخْدَمْتْهُمْ، وْيَاكْلُو خُبْزْهُمْ بْعْرَقْ كْتَافْهُمْ.

¹³أَمَّا نْتُمَ آ الْخُوتْ، مَا تْعْيَاوْشْ مْنْ عَمَلْ الْخِيرْ.

¹⁴وْإِلَا مَا بْغَاشْ شِي وَاحْدْ يْدِيرْ بْكْلَامْنَا اللِّي فْهَادْ الرِّسَالَة، عْزْلُوهْ وْمَا تْبْقَاوْشْ تْتْعَامْلُو مْعَاهْ بَاشْ يْحْشَمْ،

¹⁵وْمَا تْحَسْبُوهْشْ بْحَالْ عْدُوكُمْ، وَلَكِنْ نَبّْهُوهْ بْحَالْ خُوكُمْ.

¹⁶وْكَنْطْلَبْ رَبّْ الْهْنَا بْنَفْسُه يْعْطِيكُمْ الْهْنَا عْلَى الدّْوَامْ كِمَا بْغَا يْكُونْ الْحَالْ. وْالرَّبّْ يْكُونْ مْعَاكُمْ كُلّْكُمْ.

¹⁷وْهَادَا سْلَامِي مْكْتُوبْ بْخَطّْ يْدِّي أَنَا بُولُسْ، وْهُوَ الْعَلَامَة بَاشْ تْمَيّْزُو الرَّسَائِلْ دْيَالِي. رَاهْ هَكَّا كَنْكْتَبْ.

¹⁸وْالنِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَاكُمْ كُلّْكُمْ.