Read Moroccan Standard Translation رِسَالَةْ تِيمُوتَاوُسْ اللّْوّْلَى 1 Bible Online

رِسَالَةْ تِيمُوتَاوُسْ اللّْوّْلَى 1 - Moroccan Standard Translation bible

رِسَالَةْ تِيمُوتَاوُسْ اللّْوّْلَى 1

¹الْفَصْلْ اللّْوّْلْ مْنْ بُولُسْ، رَسُولْ الْمَسِيحْ يَسُوعْ، عْلَى حْسَابْ الْأَمْرْ دْيَالْ اللَّهْ مُنَجِّينَا وْالْمَسِيحْ يَسُوعْ رْجَانَا،

²لْتِيمُوتَاوُسْ وْلْدِي الْحْقِيقِي فْالْإِيمَانْ، النِّعْمَة وْالرَّحْمَة وْالْهْنَا مْنْ اللَّهْ الْآبْ وْالْمَسِيحْ يَسُوعْ رَبّْنَا.

³مْلِّي كْنْتْ غَادِي لْمَكِدُونِيَة، طْلَبْتْ مْنّْكْ تْبْقَى فْأَفَسُسْ، بَاشْ تْوَصِّي شِي وْحْدِينْ مَا يْعَلّْمُوشْ شِي تَعْلِيمْ آخُرْ،

⁴وْمَا يْدِّيوْهَاشْ فْالْخْرَايْفْ، وْالْأَصْلْ دْيَالْ جْدُودْهُمْ اللِّي مَا لِيهْ حَدّْ، حِيتْ هَادْ الْأُمُورْ كَتْجْبَدْ غِيرْ الصّْدَاعْ، وْمَا كَتْخَلِّيشْ خْدْمَةْ اللَّهْ اللِّي مْبْنِيَة عْلَى الْإِيمَانْ تْزِيدْ.

⁵وْرَاهْ الْمْزِيَّة دْيَالْ هَادْ الْوْصِيَّة، هِيَ الْمْحَبَّة مْنْ قَلْبْ صَافِي، وْضَمِيرْ نْقِي، وْإِيمَانْ مَا فِيهْشْ النِّفَاقْ.

⁶وْشِي وْحْدِينْ رَاهُمْ بَعّْدُو عْلَى هَادْ الْأُمُورْ وْدَّاوْهَا غِيرْ فْالْكْلَامْ الْخَاوِي،

⁷وْبْغَاوْ يْكُونُو عُلَمَا دْ الشّْرَعْ، وْهُمَ مَا كَيْفَهْمُو لَا دَاكْشِّي اللِّي كَيْݣُولُوهْ وَلَا دَاكْشِّي اللِّي كَيْأَكّْدُو عْلِيهْ.

⁸وَلَكِنْ حْنَا كَنْعَرْفُو بْلِّي الشّْرَعْ نَافْعْ إِلَا خَدّْمْنَاهْ كِيفْ خَاصُّه يْكُونْ،

⁹حِيتْ كَنْعَرْفُو بْلِّي الشّْرَعْ مَاشِي لْلنَّاسْ اللِّي مْتَّاقْيِينْ اللَّهْ وَلَكِنْ لْهَادُوكْ اللِّي مَا كَيْطِيعُوهْشْ وْاللِّي مْتْمَرّْدِينْ، وْلْلْكُفَّارْ وْالْمُدْنِبِينْ، وْلْهَادُوكْ اللِّي مَا كَيْحْتَرْمُو لَا اللَّهْ وَلَا الْحَاجَة الْمْقَدّْسَة، وْلْهَادُوكْ اللِّي كَيْقْتْلُو بَّاوَاتْهُمْ وْمَّاوَاتْهُمْ، وْلْلْقْتَّالَا،

¹⁰وْلْهَادُوكْ اللِّي كَيْفَسْدُو، وْلْلرّْجَالْ اللِّي كَيْفَسْدُو مْعَ بْعْضِيَّاتْهُمْ، وْلْهَادُوكْ اللِّي كَيْتَاجْرُو فْالْعْبِيدْ، وْلْلْكْدَّابِينْ، وْلْهَادُوكْ اللِّي كَيْحَلْفُو عْلَى الْبَاطْلْ، وْلْكُلّْ وَاحْدْ كَيْضَادّْ التَّعْلِيمْ الصّْحِيحْ

¹¹اللِّي كَيْوَافْقْ الْإِنْجِيلْ اللِّي أَمّْنِّي عْلِيهْ اللَّهْ، إِنْجِيلْ اللَّهْ الْمُبَارَكْ، لِيهْ الْعَزّْ.

¹²كَنْشْكَرْ الْمَسِيحْ يَسُوعْ رَبّْنَا اللِّي عْطَانِي الْقُوَّة، وْشَافْ بْلِّي نْسْتَاهْلْ نْكُونْ أَمِينْ، وْخْتَارْنِي لْخْدَمْتُه،

¹³أَنَا اللِّي كْنْتْ مْنْ قْبَلْ كَنْتّْكَلّْمْ بْكْلَامْ الْكُفْرْ وْكَنْتّْعَدَّى عْلَى النَّاسْ اللِّي آمْنُو بِيهْ وْكَنْعَايْرْهُمْ. وَلَكِنْ اللَّهْ رْحَمْنِي عْلَاحْقَّاشْ مَا كَنْتْشْ عَارْفْ أَشْنُو كَنْدِيرْ وْمَا كَنْتْشْ كَنْآمْنْ بْالْمَسِيحْ.

¹⁴وْفَاضْتْ عْلِيَّ النِّعْمَة دْيَالْ رَبّْنَا، وْمْعَاهَا الْإِيمَانْ وْالْمْحَبَّة اللِّي فْالْمَسِيحْ يَسُوعْ.

¹⁵رَاهْ هَادْ الْكْلَامْ اللِّي غَنْݣُولْ صَادْقْ، وْيْسْتَاهْلْ يْتّْقْبَلْ كَامْلْ: الْمَسِيحْ يَسُوعْ جَا لْلدّْنْيَا بَاشْ يْنَجِّي الْمُدْنِبِينْ، اللِّي أَنَا اللّْوّْلْ فِيهُمْ.

¹⁶وَلَكِنْ اللَّهْ رْحَمْنِي، بَاشْ يْبَانْ فِيَّ أَنَا اللّْوّْلْ الصّْبَرْ الْكْبِيرْ دْيَالْ الْمَسِيحْ يَسُوعْ، وْنْكُونْ مْتَالْ لْهَادُوكْ اللِّي قَرّْبُو يْآمْنُو بِيهْ وْتْكُونْ لِيهُمْ الْحَيَاةْ الدَّايْمَة.

¹⁷وْلْلْمَلِكْ الدَّايْمْ، الْإِلَاهْ الْوَاحْدْ اللِّي مَا كَيْفْنَاشْ وْمَا كَيْتّْشَافْشْ، الْكَرَامَة وْالْعَزّْ دِيمَا وْعْلَى الدّْوَامْ. آمِينْ.

¹⁸هَادِي هِيَ وْصِيْتِي لِيكْ آ وْلْدِي تِيمُوتَاوُسْ، وْرَاهَا كَتْتَّافْقْ مْعَ النُّبُوَّاتْ اللِّي تّْݣَالُو عْلِيكْ مْنْ قْبَلْ. إِيوَا دِيرْ بِيهُمْ بَاشْ تْكَافْحْ الْكِفَاحْ الْمْزْيَانْ،

¹⁹وْتْبَتْ فْالْإِيمَانْ وْالضَّمِيرْ النّْقِي اللِّي مَا قْبْلُوهْشْ شِي وْحْدِينْ وْضَيّْعُو إِيمَانْهُمْ.

²⁰وْمْنّْهُمْ هِيمِينَايُسْ وْالْإِسْكَنْدَرْ، اللِّي عْطِيتْهُمْ لْلشِّيطَانْ بَاشْ يْتْرَبَّاوْ وْمَا يْعَاوْدُوشْ يْݣُولُو كْلَامْ الْكُفْرْ.