Read Moroccan Standard Translation رِسَالَةْ تِيمُوتَاوُسْ اللّْوّْلَى 2 Bible Online

رِسَالَةْ تِيمُوتَاوُسْ اللّْوّْلَى 2 - Moroccan Standard Translation bible

رِسَالَةْ تِيمُوتَاوُسْ اللّْوّْلَى 2

¹الْفَصْلْ التَّانِي كَنْطْلَبْ مْنّْكُمْ قْبَلْ مْنْ كُلّْشِي، بَاشْ تْطْلْبُو اللَّهْ، وْتْصَلِّيوْ، وْتْدْعِيوْ، وْتْشَكْرُوهْ عْلَى وْدّْ ݣَاعْ النَّاسْ،

²وْعْلَى وْدّْ الْمُلُوكْ وْكُلّْ هَادُوكْ اللِّي عَنْدْهُمْ السُّلْطَة، بَاشْ نْعِيشُو حَيَاةْ مْرْتَاحَة وْهَانْيَة بْالتَّقْوَى وْالْإِحْتِرَامْ،

³هَادْشِّي مْزْيَانْ وْمْقْبُولْ عَنْدْ اللَّهْ الْمُنَجِّي دْيَالْنَا،

⁴اللِّي كَيْبْغِي ݣَاعْ النَّاسْ يْنْجَاوْ وْيْعَرْفُو الْحَقّْ،

⁵حِيتْ كَايْنْ إِلَاهْ وَاحْدْ، وْوَسِيطْ وَاحْدْ بِينْ اللَّهْ وْالنَّاسْ، هُوَ الْإِنْسَانْ الْمَسِيحْ يَسُوعْ،

⁶اللِّي عْطَى حْيَاتُه بَاشْ يْفْدِي النَّاسْ كُلّْهُمْ. وْهَادْ الشّْهَادَة جَاتْ فْوَقْتْهَا.

⁷وْعْلَى وْدّْهَا دَارْنِي اللَّهْ رَسُولْ كَنْخَبّْرْ بْكْلَامُه، وْكَنْݣُولْ الْحَقّْ وْمَا كَنْكْدَبْشْ، وْكَنْعَلّْمْ النَّاسْ اللِّي مَاشِي يْهُودْ بْالْإِيمَانْ وْالْحَقّْ.

⁸هَادْشِّي عْلَاشْ بْغِيتْ الرّْجَالْ يْصَلِّيوْ فْكُلّْ مُوضْعْ، وْهُمَ هَازِّينْ كْفُوفْ نْقِيِّينْ بْلَا غَضَبْ وْبْلَا خْصُومَة.

⁹وْبْغِيتْ حْتَّى الْعْيَالَاتْ يْلَبْسُو لْبَاسْ مْأَدّْبْ وْيْتّْزَيّْنُو بْشْكَلْ فِيهْ الْحْيَا وْالْحْشْمَة، وْمَا يْضَفْرُوشْ شْعَرْهُمْ بْشْكَلْ مْعَجّْبْ، وْمَا يْدِيرُوشْ الدّْهَبْ وْالجُّوهْرْ، وْمَا يْلَبْسُوشْ حْوَايْجْ غَالْيِينْ،

¹⁰وَلَكِنْ يْتّْزَيّْنُو بْالْأَعْمَالْ اللِّي كَتْرْضِي اللَّهْ كِمَا كَيْلِيقْ بْالْعْيَالَاتْ اللِّي مْتَّاقْيِينْ اللَّهْ.

¹¹وْخَاصّْ الْمْرَاة تّْعَلّْمْ بْالسّْكَاتْ وْالطَّاعَة.

¹²وْرَانِي مَا مْوَافْقْشْ بَاشْ الْمْرَاة تْعَلّْمْ وَلَا تْحْكَمْ فْالرَّاجْلْ، وَلَكِنْ خَاصّْهَا تْبْقَى سَاكْتَة.

¹³حِيتْ آدَمْ تّْخْلَقْ هُوَ اللّْوّْلْ وْعَادْ تّْخَلْقَاتْ حَوَّاءْ.

¹⁴وْمَاشِي آدَمْ هُوَ اللِّي تّْغَرّْ، وَلَكِنْ الْمْرَاة هِيَ اللِّي تّْغْرَّاتْ وْعْصَاتْ أَمْرْ اللَّهْ.

¹⁵وْرَاهَا غَتْنْجَا بْالْوْلَادَة دْيَالْ الدّْرَارِي، إِلَا بْقَاتْ تَابْتَة فْالْإِيمَانْ وْالْمْحَبَّة وْالْقَدَاسَة بْالتَّوَاضُعْ.