Read Moroccan Standard Translation رِسَالَةْ تِيمُوتَاوُسْ اللّْوّْلَى 3 Bible Online

رِسَالَةْ تِيمُوتَاوُسْ اللّْوّْلَى 3 - Moroccan Standard Translation bible

رِسَالَةْ تِيمُوتَاوُسْ اللّْوّْلَى 3

¹الْفَصْلْ التَّالْتْ هَادْ الْكْلَامْ اللِّي غَنْݣُولْ رَاهْ صَادْقْ: إِلَا بْغَا شِي وَاحْدْ يْكُونْ رَاعِي دْ الْكْنِيسَة، رَاهْ كَيْتّْمَنَّى مْسْؤُولِيَة مْزْيَانَة.

²عْلَى هَادْشِّي وَاجْبْ عْلَى الرَّاعِي دْ الْكْنِيسَة يْكُونْ مَا عْلِيهْ لُومْ، مْزَوّْجْ بْمْرَاة وَحْدَة، رْزِينْ، بْعَقْلُه، مْحْتَرْمْ، كَيْضَايْفْ النَّاسْ الْبْرَّانِيِّينْ، قَادْرْ يْعَلّْمْ،

³وْمَا يْكُونْشْ سْكَايْرِي، وْلَا كَيْجْبَدْ الصّْدَاعْ، وَلَكِنْ يْكُونْ ضْرِيّْفْ، وْمْهَدّْنْ، وْمَا يْكُونْشْ قَلْبُه عْلَى الْفْلُوسْ،

⁴وْيْكُونْ مْسَيّْرْ دَارُه مْزْيَانْ، وْيْكُونُو وْلَادُه مْرَبّْيِينْ وْخَاضْعِينْ لِيهْ بْاحْتِرَامْ.

⁵حِيتْ إِلَا كَانْ شِي وَاحْدْ مَا كَيْعْرَفْشْ يْسَيّْرْ دَارُه، كِيفَاشْ غَادِي يْتّْهَلَّى فْكْنِيسْةْ اللَّهْ؟

⁶وْخَاصّْ الرَّاعِي دْ الْكْنِيسَة مَا يْكُونْشْ جْدِيدْ فْالْإِيمَانْ، بَاشْ مَا يْتّْنْفَخْشْ بْالْكِبْرْ وْيْنْزَلْ عْلِيهْ الْعِقَابْ اللِّي نْزَلْ عْلَى إِبْلِيسْ.

⁷وْخَاصّْ تْكُونْ السُّمْعَة دْيَالُه مْزْيَانَة بِينْ النَّاسْ اللِّي مَاشِي مُومْنِينْ، بَاشْ مَا يْلُومُه حَدّْ وْمَا يْطِيحْشْ فْالْمْصِيدَة دْيَالْ إِبْلِيسْ.

⁸وْحْتَّى الْمُدَبِّرِينْ وَاجْبْ عْلِيهُمْ يْكُونُو مْحْتَرْمِينْ، عَنْدْهُمْ كْلْمَة وَحْدَة، مَاشِي سْكَايْرِيَّة، وْمَا كَيْطَمْعُوشْ فْالرّْبَحْ دْ الْحْرَامْ،

⁹وْخَاصّْهُمْ يْبْقَاوْ مْحَافْضِينْ عْلَى سِرّْ الْإِيمَانْ بْضَمِيرْ نْقِي.

¹⁰وْرَاهْ خَاصّْ الْكْنِيسَة تْجَرّْبْهُمْ فْاللّْوّْلْ، وْإِلَا مَا كَانْ عْلِيهُمْ لُومْ، يْقَدْرُو يْوَلِّيوْ مُدَبِّرِينْ.

¹¹وْحْتَّى الْعْيَالَاتْ الْمُدَبِّرَاتْ وَاجْبْ عْلِيهُمْ يْكُونُو مْوَقّْرَاتْ، مَا فِيهُمْشْ النَّمِيمَة، مْرَزّْنَاتْ وْأَمِينَاتْ فْكُلّْ حَاجَة.

¹²وْرَاهْ خَاصّْ كُلّْ مُدَبِّرْ يْكُونْ مْزَوّْجْ بْمْرَاة وَحْدَة، كَيْعْرَفْ يْسَيّْرْ وْلَادُه وْدَارُه مْزْيَانْ.

¹³حِيتْ الْمُدَبِّرِينْ اللِّي كَيْخَدْمُو مْزْيَانْ، كَيْكُونُو مْحْتَرْمِينْ عَنْدْ النَّاسْ، وْيْقَدْرُو يْتّْكَلّْمُو بْتِقَة كْبِيرَة عْلَى إِيمَانْهُمْ بْالْمَسِيحْ يَسُوعْ.

¹⁴كَنْكْتَبْ لِيكْ هَادْشِّي، وْأَنَا كَنْتّْمَنَّى نْجِي لْعَنْدْكْ دْغْيَا،

¹⁵وَلَكِنْ إِلَا تْعَطّْلْتْ، رَاهْ هَادْ الْكْلَامْ غَيْعَاوْنْكْ بَاشْ تْعْرَفْ كِيفَاشْ تْتْعَامْلْ فْبِيتْ اللَّهْ، اللِّي هُوَ كْنِيسْةْ اللَّهْ الْحَيّْ، وْالرّْكِيزَة وْالسَّاسْ دْيَالْ الْحَقّْ.

¹⁶وْبْلَا شْكّْ رَاهْ السِّرّْ دْ التَّقْوَى دْيَالْنَا كْبِيرْ: «اللَّهْ بَانْ فْالدَّاتْ دْيَالْ بْنَادْمْ، وْالرُّوحْ الْقُدُسْ أَكّْدْ بْلِّي هُوَ حَقّْ، وْشَافُوهْ الْمَلَايْكَة، وْتْخَبّْرْ بِيهْ فْوَسْطْ الشّْعُوبْ اللِّي مَاشِي يْهُودْ، وْآمْنُو بِيهْ النَّاسْ فْالدّْنْيَا، وْتّْرْفَعْ فْالْعَزّْ لْلسّْمَا».