Read Moroccan Standard Translation رِسَالَةْ تِيمُوتَاوُسْ اللّْوّْلَى 4 Bible Online

رِسَالَةْ تِيمُوتَاوُسْ اللّْوّْلَى 4 - Moroccan Standard Translation bible

رِسَالَةْ تِيمُوتَاوُسْ اللّْوّْلَى 4

¹الْفَصْلْ الرَّابْعْ وْالرُّوحْ الْقُدُسْ كَيْݣُولْ بْصَرَاحَة، بْلِّي شِي وْحْدِينْ غَيْرْجْعُو عْلَى إِيمَانْهُمْ فْاللّْخْرْ دْ الزّْمَانْ، وْغَيْتْبْعُو الْأَرْوَاحْ اللِّي غَيْتَلّْفُوهُمْ عْلَى الطّْرِيقْ، وْغَيْتْبْعُو التَّعَالِيمْ دْيَالْ الشَّيَاطِينْ،

²اللِّي كَيْعَلّْمُوهَا شِي وْحْدِينْ مُنَافِقِينْ وْكْدَّابِينْ، الضَّمِيرْ دْيَالْهُمْ مْيّْتْ بْحَالْ إِلَا مْكْوِي بْالْعَافْيَة،

³وْكَيْحَرّْمُو الزّْوَاجْ، وْكَيْآمْرُو النَّاسْ مَا يَاكْلُوشْ شِي نْوَاعْ دْ الْمَاكْلَة اللِّي خْلَقْهَا اللَّهْ بَاشْ يَاكْلُوهَا اللِّي مْآمْنِينْ وْعَارْفِينْ الْحَقّْ وْيْشَكْرُوهْ عْلِيهَا.

⁴عْلَاحْقَّاشْ ݣَاعْ دَاكْشِّي اللِّي خَلْقُه اللَّهْ مْزْيَانْ، وْمَا خَاصّْنَا نْرَفْضُو حْتَّى حَاجَة، وَلَكِنْ خَاصّْنَا نْقَبْلُوهَا وْحْنَا كَنْشَكْرُو اللَّهْ،

⁵حِيتْ بْكْلَامْ اللَّهْ وْبْالصّْلَاة كَتْوَلِّي الْمَاكْلَة مْقَدّْسَة.

⁶إِلَا بَيّْنْتِي هَادْ الْأُمُورْ لْلْخُوتْ غَتْكُونْ خْدَّامْ مْزْيَانْ دْيَالْ الْمَسِيحْ يَسُوعْ، وْغَتْبَيّْنْ بْلِّي رَاكْ مْرْبِّي بْكْلَامْ الْإِيمَانْ وْالتَّعْلِيمْ الصّْحِيحْ اللِّي تْبَعْتِيهْ.

⁷وَلَكِنْ بَعّْدْ عْلَى الْخْرَايْفْ اللِّي ضْدّْ الْإِيمَانْ وْاللِّي كَيْعَاوْدُوهَا الْعْݣَايْزْ، وْدَرّْبْ رَاسْكْ عْلَى التَّقْوَى.

⁸حِيتْ إِلَا كَانْتْ الرّْيَاضَة كَتْنْفَعْ غِيرْ شْوِيَّة، التَّقْوَى رَاهَا نَافْعَة لْكُلّْشِي، حِيتْ فِيهَا الْوَعْدْ دْيَالْ اللَّهْ بْالْحَيَاةْ فْالدّْنْيَا وْفْالْآخِرَة.

⁹هَادْ الْكْلَامْ صَادْقْ وْكَيْسْتَاهْلْ يْتّْقْبَلْ كَامْلْ.

¹⁰حِيتْ عْلَى وْدّْ هَادْشِّي، كَنْكَافْحُو وْكَنْعْيَاوْ، عْلَاحْقَّاشْ دْرْنَا رْجَانَا فْاللَّهْ الْحَيّْ اللِّي هُوَ الْمُنَجِّي دْيَالْ النَّاسْ كُلّْهُمْ، وْبْالْخُصُوصْ الْمُومْنِينْ.

¹¹وْصِّي وْعَلّْمْ هَادْ الْأُمُورْ.

¹²وْمَا تْخَلِّي حْتَّى شِي وَاحْدْ يْحْتَقْرْكْ بْسْبَابْ الصّْغُرْ دْيَالْكْ، وَلَكِنْ كُونْ مْتَالْ لْلْمُومْنِينْ فْالْكْلَامْ، وْالتَّصَرُّفْ، وْالْمْحَبَّة، وْالْإِيمَانْ، وْالنّْقَاوَة.

¹³وْعْلَى مَا نْجِي، دَاوْمْ عْلَى الْقْرَايَة دْ كْلَامْ اللَّهْ، وْعْلَى الْوَعْظْ، وْعْلَى التَّعْلِيمْ.

¹⁴مَا تْفَرّْطْشْ فْالْمَوْهِبَة اللِّي عَنْدْكْ، وْاللِّي تّْعْطَاتْ لِيكْ بْالنُّبُوَة مْلِّي حَطُّو عْلِيكْ شْيُوخْ الْكْنِيسَة يْدِّيهُمْ.

¹⁵طَبّْقْ هَادْ الْأُمُورْ وْدِيرْ فِيهَا جَهْدْكْ، بَاشْ كُلّْشِي يْشُوفْ النَّجَاحْ دْيَالْكْ.

¹⁶رَدّْ الْبَالْ لْرَاسْكْ وْلْلتَّعْلِيمْ دْيَالْكْ وْدَاوْمْ عْلَى هَادْشِّي، حِيتْ إِلَا دْرْتِي هَكَّا غَتْنَجِّي رَاسْكْ وْتْنَجِّي اللِّي كَيْسَمْعُوكْ.