Read Moroccan Standard Translation رِسَالَةْ تِيمُوتَاوُسْ اللّْوّْلَى 5 Bible Online

رِسَالَةْ تِيمُوتَاوُسْ اللّْوّْلَى 5 - Moroccan Standard Translation bible

رِسَالَةْ تِيمُوتَاوُسْ اللّْوّْلَى 5

¹الْفَصْلْ الْخَامْسْ مَا تْخَاصْمْشْ عْلَى الرَّاجْلْ الْكْبِيرْ فْالْعْمَرْ، وَلَكِنْ نْصْحُه بْحَالْ إِلَا كَتْنْصَحْ بَّاكْ. وْتّْعَامْلْ مْعَ الشُّبَّانْ بْحَالْ إِلَا هُمَ خُوتْكْ،

²وْتّْعَامْلْ مْعَ الْعْيَالَاتْ الْكْبَارْ بْحَالْ إِلَا كَتّْعَامْلْ مْعَ مُّكْ، وْبْقَلْبْ نْقِي تّْعَامْلْ مْعَ الشَّابَّاتْ بْحَالْ إِلَا هُمَ خْوَاتَاتْكْ.

³تّْهَلَّى فْالْهْجَّالَاتْ اللِّي مَا عَنْدْهُمْ اللِّي يْصْرَفْ عْلِيهُمْ.

⁴وَلَكِنْ إِلَا كَانْتْ شِي هْجَّالَة عَنْدْهَا الْوْلَادْ وْلَا الْحْفَادْ، رَاهْ خَاصّْهُمْ هُمَ اللّْوّْلِينْ يْتّْعَلّْمُو يْدِيرُو الْخِيرْ فْمَّالِينْ دَارْهُمْ وْيْجَازِيوْ وَالِدِيهُمْ، حِيتْ هَادْشِّي مْقْبُولْ عَنْدْ اللَّهْ.

⁵الْهْجَّالَة اللِّي مَا عَنْدْهَا اللِّي يْصْرَفْ عْلِيهَا وْبْقَاتْ وْحْدَانِيَّة، رَاهَا دَارْتْ رْجَاهَا فْاللَّهْ وْكَتْدَاوْمْ عْلَى الصّْلَاة لِيلْ وْنْهَارْ وْكَتْطْلْبُه يْعَاوْنْهَا.

⁶أَمَّا الْهْجَّالَة اللِّي كَتْدِّيهَا فْمْتَاعْ الدّْنْيَا، رَاهَا مْيّْتَة وَاخَّا هِيَ حَيَّة.

⁷إِيوَا وْصِّيهُمْ بْهَادْشِّي بَاشْ مَا يْكُونْ عْلِيهُمْ حْتَّى لُومْ.

⁸وْإِلَا شِي وَاحْدْ مَا كَيْدِّيهَاشْ فْعَائِلْتُه وْخُصُوصًا فْمَّالِينْ دَارُه، رَاهْ نْكَرْ إِيمَانُه وْوْلَّى كْفَسْ مْنْ اللِّي مَاشِي مُومْنْ.

⁹مَا خَاصّْشْ الْمْرَاة الْهْجَّالَة تّْقَيّْدْ مْعَ الجّْمَاعَة دْ الْهْجَّالَاتْ إِلَا مَا كَانْشْ فْعْمَرْهَا عْلَى الْأَقَلّْ سْتِّينْ عَامْ، وْكَانْتْ مْزَوّْجَة غِيرْ بْرَاجْلْ وَاحْدْ.

¹⁰وْخَاصّْ يْكُونُو النَّاسْ كَيْشَهْدُو لِيهَا بْلِّي دَارْتْ الْخِيرْ: رْبَّاتْ وْلَادْهَا تَرْبِيَّة مْزْيَانَة، وْضَايْفَاتْ الْبْرَّانِيِّينْ، وْغْسْلَاتْ رْجْلِينْ الْخُوتْ الْمُومْنِينْ، وْعَاوْنَاتْ الْمْحْتَاجِينْ، وْدَارْتْ ݣَاعْ الْأَعْمَالْ الْمْزْيَانَة.

¹¹أَمَّا الْهْجَّالَاتْ الشَّابَّاتْ مَا تْقَيّْدْهُمْشْ مْعَ الجّْمَاعَة دْيَالْ الْهْجَّالَاتْ، حِيتْ مْلِّي يْفَكّْرُو فْالشَّهْوَة غَيْبَعّْدُو عْلَى الْمَسِيحْ وْغَيْبْغِيوْ يْتّْزَوّْجُو.

¹²وْبْهَادْشِّي غَيْحَكْمُو عْلَى رَاسْهُمْ عْلَاحْقَّاشْ سْمْحُو فْالْعَهْدْ دْيَالْهُمْ اللّْوّْلْ.

¹³وْزْيَادَة عْلَى هَادْشِّي، رَاهْ مَا كَيْبْقَى عَنْدْهُمْ مَا يْدِيرُو، وْكَيْوَلّْفُو يْضُورُو مْنْ دَارْ لْدَارْ، وْكْتَرْ مْنْ هَادْشِّي كَيْتّْعَلّْمُو الْهَضْرَة بْزَّافْ وْالْفْضُولْ، وْكَيْتّْكَلّْمُو بْكْلَامْ مَا لَايْقْشْ.

¹⁴عْلَى هَادْشِّي، كَنْوَصِّي الْهْجَّالَاتْ الشَّابَّاتْ يْعَاوْدُو يْتّْزَوّْجُو وْيْوَلْدُو الْوْلَادْ وْيْقَابْلُو دْيُورْهُمْ، بَاشْ مَا يْعْطِيوْشْ الْفُرْصَة لْلْعْدْيَانْ فِينْ يْݣُولُو عْلِينَا كْلَامْ خَايْبْ،

¹⁵حِيتْ فَاتْ لْشِي هْجَّالَاتْ خَرْجُو عْلَى الطّْرِيقْ وْتْبْعُو الشِّيطَانْ.

¹⁶إِلَا شِي مُومْنَة عَنْدْهَا الْهْجَّالَاتْ فْعَائِلْتْهَا، رَاهْ وَاجْبْ عْلِيهَا تْصْرَفْ عْلِيهُمْ وْمَا تَّقّْلْشْ عْلَى الْكْنِيسَة، بَاشْ تْقْدَرْ الْكْنِيسَة تْعَاوْنْ الْهْجَّالَاتْ اللِّي مَا عَنْدْهُمْ اللِّي يْصْرَفْ عْلِيهُمْ.

¹⁷رَاهْ الْمْسْؤُولِينْ دْ الْكْنِيسَة اللِّي كَيْدِيرُو خْدَمْتْهُمْ مْزْيَانْ، كَيْسْتَاهْلُو يْتّْعْطَاهُمْ كْتَرْ، خُصُوصًا اللِّي عَنْدْهُمْ مْسْؤُولِيَة كْبِيرَة فْالْوَعْظْ وْالتَّعْلِيمْ،

¹⁸حِيتْ كْتَابْ اللَّهْ كَيْݣُولْ: «مَا تْسَدّْشْ فُمّْ التُّورْ وْهُوَ كَيْدْرَسْ». وْكَيْݣُولْ عَاوْتَانِي: «اللِّي كَيْخْدَمْ كَيْسْتَاهْلْ الْخْلَاصْ دْيَالُه».

¹⁹مَا تْقْبَلْشْ شِي تُهْمَة عْلَى شِي مْسْؤُولْ دْ الْكْنِيسَة، مْنْ غِيرْ إِلَا كَانُو جُوجْ شْهُودْ وْلَا تْلَاتَة.

²⁰وْهَادُوكْ اللِّي كَيْدَنْبُو، نَبّْهْهُمْ قُدَّامْ ݣَاعْ النَّاسْ، بَاشْ غِيرْهُمْ يْخَافْ.

²¹وْكَنْطْلَبْ مْنّْكْ بْكُلّْ قُوَّة قُدَّامْ اللَّهْ وْالْمَسِيحْ يَسُوعْ وْالْمَلَايْكَة الْمْخْتَارِينْ، بَاشْ تْدِيرْ بْهَادْ الْوْصِيَّاتْ بْلَا مَا تّْحَازْ لْشِي حَدّْ وْلَا تْدِيرْ الْوْجْهِيَّاتْ.

²²مَا تْزْرَبْشْ وْتْحَطّْ يْدِّيكْ عْلَى شِي حَدّْ، وْمَا تْشَارْكْشْ لْخْرِينْ فْدْنُوبْهُمْ، وْخْلِّي رَاسْكْ بْلَا عِيبْ.

²³مَا تْبْقَاشْ تْشْرَبْ غِيرْ الْمَا، وَلَكِنْ شْرَبْ شْوِيَّة دْيَالْ الْخْمَرْ عْلَى وْدّْ الْمَعْدَة دْيَالْكْ وْالْمَرْضْ الْكْتِيرْ اللِّي فِيكْ.

²⁴الدّْنُوبْ دْيَالْ شِي نَاسْ بَايْنِينْ حْتَّى قْبَلْ مَا يْتّْحَاكْمُو، وَلَكِنْ وْحْدِينْ خْرِينْ مَا كَيْبَانُو دْنُوبْهُمْ حْتَّى لْمْنْ بَعْدْ.

²⁵وْهَكَّاكْ، حْتَّى الْأَعْمَالْ الْمْزْيَانَة بَايْنَة، وْإِلَا مَا كَانْتْشْ بَايْنَة رَاهْ مَا يْمْكَنْشْ تْبْقَى مْخَبّْيَة.