Read Moroccan Standard Translation رِسَالَةْ تِيمُوتَاوُسْ التَّانِيَّة 1 Bible Online

رِسَالَةْ تِيمُوتَاوُسْ التَّانِيَّة 1 - Moroccan Standard Translation bible

رِسَالَةْ تِيمُوتَاوُسْ التَّانِيَّة 1

¹الْفَصْلْ اللّْوّْلْ مْنْ بُولُسْ، رَسُولْ الْمَسِيحْ يَسُوعْ بْمُرَادْ اللَّهْ، عْلَى حْسَابْ الْوَعْدْ دْيَالْ الْحَيَاةْ اللِّي عَنْدْنَا فْالْمَسِيحْ يَسُوعْ.

²لْتِيمُوتَاوُسْ وْلْدِي الْعْزِيزْ، النِّعْمَة وْالرَّحْمَة وْالْهْنَا مْنْ اللَّهْ الْآبْ وْالْمَسِيحْ يَسُوعْ رَبّْنَا.

³كَنْشْكَرْ اللَّهْ اللِّي كَنْعَبْدُه بْضَمِيرْ نْقِي، كِمَا كَانُو كَيْعَبْدُوهْ جْدُودِي، وْكَنْتّْفَكّْرْكْ دِيمَا فْصْلَاتِي لِيلْ وْنْهَارْ.

⁴وْمْلِّي كَنْتّْفَكّْرْ دْمُوعْكْ، كَنْشْتَاقْ نْشُوفْكْ بَاشْ يْعْمَرْ قَلْبِي بْالْفَرْحَة.

⁵وْكَنْتّْفَكّْرْ إِيمَانْكْ اللِّي مَا فِيهْشْ النِّفَاقْ، الْإِيمَانْ اللِّي كَانْ فْاللّْوّْلْ عَنْدْ جْدَّاتْكْ لَوْئِيسْ وْعَنْدْ مُّكْ أَفْنِيكَة، وْأَنَا مْتْيِقّْنْ بْلِّي عَنْدْكْ حْتَّى نْتَ.

⁶هَادْشِّي عْلَاشْ كَنْفَكّْرَكْ بَاشْ تْحْيِي الْمَوْهِبَة اللِّي عْطَاهَا لِيكْ اللَّهْ مْلِّي حَطِّيتْ عْلِيكْ يْدِّيَّ.

⁷حِيتْ اللَّهْ مَا عْطَانَاشْ رُوحْ الْحْشْمَة، وَلَكِنْ عْطَانَا رُوحْ الْقُوَّة وْالْمْحَبَّة وْالتَّحَكُّمْ فْالدَّاتْ.

⁸إِيوَا مَا تْحْشَمْشْ بَاشْ تْشْهَدْ لْرَبّْنَا، وْمَا تْحْشَمْشْ بِيَّ أَنَا اللِّي مْسْجُونْ عْلَى وْدُّه، وَلَكِنْ شَارْكْ مْعَايَ فْالْعْدَابْ عْلَى وْدّْ الْإِنْجِيلْ، وْتْوَكّْلْ عْلَى قُوَّةْ اللَّهْ

⁹اللِّي نْجَّانَا وْعَيّْطْ عْلِينَا بَاشْ نْكُونُو دْيَالُه، مَاشِي عْلَى حْسَابْ أَعْمَالْنَا، وَلَكِنْ عْلَى حْسَابْ الْمُرَادْ وْالنِّعْمَة دْيَالُه اللِّي عْطَاهَا لِينَا بْالْمَسِيحْ يَسُوعْ قْبَلْ الْبْدُو دْ الزّْمَانْ،

¹⁰هَادْ النِّعْمَة اللِّي بَانْتْ لِينَا دَابَا مْلِّي بَانْ الْمُنَجِّي دْيَالْنَا يَسُوعْ الْمَسِيحْ اللِّي غْلَبْ الْمُوتْ، وْنَوّْرْ الْحَيَاةْ الدَّايْمَة اللِّي مَا كَتْفْنَاشْ بْالْإِنْجِيلْ،

¹¹اللِّي خْتَارْنِي بَاشْ نْخَبّْرْ بِيهْ وْدَارْنِي رَسُولْ وْمُعَلِّمْ.

¹²وْعْلَى قْبَلْ هَادْ الْأُمُورْ كَنْتْعَدّْبْ. وَلَكِنْ مَا حْشْمَانْشْ، حِيتْ عَارْفْ بْشْكُونْ آمْنْتْ، وْمْتْيِقّْنْ بْلِّي هُوَ قَادْرْ يْحْفَضْ دَاكْشِّي اللِّي أَمّْنِّي عْلِيهْ حْتَّى لْدَاكْ النّْهَارْ.

¹³إِيوَا دِيرْ بْالْكْلَامْ الصّْحِيحْ اللِّي سْمَعْتِيهْ مْنِّي، فْالْإِيمَانْ وْالْمْحَبَّة اللِّي فْالْمَسِيحْ يَسُوعْ.

¹⁴حَافْضْ عْلَى الْأَمَانَة الْمْزْيَانَة اللِّي تّْعْطَاتْ لِيكْ بْالْعْوِينْ دْيَالْ الرُّوحْ الْقُدُسْ اللِّي سَاكْنْ فِينَا.

¹⁵رَاكْ كَتْعْرَفْ بْلِّي ݣَاعْ هَادُوكْ اللِّي فْبْلَادْ آسْيَا تّْخْلَّاوْ عْلِيَّ، وْمْنّْهُمْ فِيجَلُّسْ وْهَرْمُوجَانِسْ.

¹⁶وْكَنْطْلَبْ مْنْ الرَّبّْ يْنَزّْلْ الرَّحْمَة دْيَالُه عْلَى عَائِلْةْ أُونِيسِيفُورُسْ، حِيتْ بْزَّافْ دْ الْمَرَّاتْ رَيّْحْنِي وْعَمّْرُه مَا حْشَمْ بِيَّ وْأَنَا فْالْحَبْسْ،

¹⁷وْمْلِّي وْصَلْ لْرُومَا دَارْ جْهْدُه وْقَلّْبْ عْلِيَّ حْتَّى لْقَانِي.

¹⁸كَنْطْلَبْ مْنْ الرَّبّْ يْنَزّْلْ عْلِيهْ الرَّحْمَة دْيَالُه فْدَاكْ النّْهَارْ. وْرَاكْ كَتْعْرَفْ مْزْيَانْ شْحَالْ عَاوْنِّي مْلِّي كْنْتْ فْأَفَسُسْ.