Read Moroccan Standard Translation رِسَالَةْ تِيمُوتَاوُسْ التَّانِيَّة 2 Bible Online

رِسَالَةْ تِيمُوتَاوُسْ التَّانِيَّة 2 - Moroccan Standard Translation bible

رِسَالَةْ تِيمُوتَاوُسْ التَّانِيَّة 2

¹الْفَصْلْ التَّانِي وْنْتَ آ وْلْدِي، كُونْ قْوِي بْالنِّعْمَة اللِّي فْالْمَسِيحْ يَسُوعْ.

²وْالْكْلَامْ اللِّي سْمَعْتِيهْ مْنِّي قُدَّامْ بْزَّافْ دْ الشّْهُودْ، خَلِّيهْ أَمَانَة لْلنَّاسْ الْأُمَنَا، اللِّي غَيْكُونُو قَادْرِينْ حْتَّى هُمَ يْعَلّْمُوهْ لْوْحْدِينْ خْرِينْ.

³شَارْكْ حْتَّى نْتَ فْالْعْدَابْ بْحَالْ شِي عَسْكْرِي أَمِينْ لْلْمَسِيحْ يَسُوعْ.

⁴رَاهْ مَا كَايْنْشْ شِي عَسْكْرِي دْخَلْ لْلْعَسْكَرْ وْكَيْدِّيهَا فْأُمُورْ الدّْنْيَا، كَيْرْضِي الْقَايْدْ دْيَالُه.

⁵وْهَكَّا حْتَّى الرِّيَاضِي اللِّي كَيْشَارْكْ فْشِي مُبَارَاة، مَا يْقْدَرْشْ يَرْبَحْ الْجَائِزَة إِلَا مَا حْتَرْمْشْ الْقَوَانِينْ دْ اللَّعْبْ.

⁶وْالْفْلَّاحْ اللِّي كَيْضْرَبْ تَمَارَة، خَاصُّه هُوَ اللّْوّْلْ اللِّي يَاخُدْ حَقُّه مْنْ الْغْلَّة.

⁷فَكّْرْ فْهَادْ الْكْلَامْ اللِّي كَنْݣُولُه، وْالرَّبّْ يْعْطِيكْ الْفَهْمْ بَاشْ تْفْهَمْ كُلّْشِي.

⁸تْفَكّْرْ يَسُوعْ الْمَسِيحْ اللِّي مْنْ تْرِّيكْةْ دَاوُدْ، وْاللِّي تّْبْعَتْ مْنْ الْمُوتْ كِمَا كَنْخَبّْرْ بِيهْ فْالْإِنْجِيلْ،

⁹اللِّي عْلَى وْدُّه كَنْقَاسِي الْعْدَابْ، حْتَّى تّْشَدِّيتْ فْالْحَبْسْ بْحَالْ شِي مُجْرِمْ. وَلَكِنْ كْلَامْ اللَّهْ مَا كَيْتّْحْبَسْشْ.

¹⁰عْلَى هَادْشِّي كَنْتّْحَمّْلْ كُلّْ حَاجَة عْلَى وْدّْ هَادُوكْ اللِّي تّْخْتَارُو، بَاشْ يَاخْدُو حْتَّى هُمَ النّْجَا اللِّي فْالْمَسِيحْ يَسُوعْ وْيَاخْدُو الْعَزّْ الدَّايْمْ.

¹¹هَادْ الْكْلَامْ رَاهْ صَادْقْ: «إِلَا مْتْنَا مْعَ يَسُوعْ، غَنْحْيَاوْ مْعَاهْ،

¹²وْإِلَا بْقِينَا تَابْتِينْ فِيهْ، غَنْمَلْكُو مْعَاهْ. وْإِلَا نْكَرْنَاهْ، غَيْنْكَرْنَا حْتَّى هُوَ.

¹³وْإِلَا مَا كْنَّاشْ أُمَنَا، هُوَ غَيْبْقَى أَمِينْ، حِيتْ مَا يْمْكَنْشْ يْنْكَرْ رَاسُه».

¹⁴فَكّْرْهُمْ بْهَادْ الْأُمُورْ، وْطْلَبْ مْنّْهُمْ بْكُلّْ قُوَّة قُدَّامْ اللَّهْ بَاشْ مَا يْدْخْلُوشْ فْالْمُنَاقَشَاتْ الْخَاوْيِينْ اللِّي مَا كَيْصْلَاحُو لْوَالُو، وْغِيرْ كَيْخَرّْبُو هَادُوكْ اللِّي كَيْسَمْعُوهُمْ.

¹⁵دِيرْ جَهْدْكْ بَاشْ تْكُونْ مْقْبُولْ عَنْدْ اللَّهْ بْحَالْ الْخْدَّامْ اللِّي مَا كَيْحْشَمْشْ مْنْ الْخْدْمَة دْيَالُه، وْكَيْفَسّْرْ كْلَامْ الْحَقّْ تَفْسِيرْ صْحِيحْ.

¹⁶وَلَكِنْ الْكْلَامْ الْخَاوِي الْمْنْجُوسْ بَعّْدْ عْلِيهْ، حِيتْ مَّالِيهْ كَيْزِيدُو يْكْفْرُو.

¹⁷وْكْلَامْهُمْ كَيْسْرَحْ بْحَالْ الْمَرْضْ الْخَايْبْ. وْمْنّْهُمْ هِيمِينَايُسْ وْفِيلِيتُسْ،

¹⁸اللِّي خَرْجُو عْلَى طْرِيقْ الْحَقّْ، حِيتْ كَيْݣُولُو بْلِّي الْبَعْتْ دْيَالْ الْمُوتَى وْقَعْ، وْهَكَّا كَيْخَرّْبُو الْإِيمَانْ دْيَالْ شِي وْحْدِينْ.

¹⁹وَلَكِنْ السَّاسْ الصّْحِيحْ اللِّي بْنَاهْ اللَّهْ كَيْبْقَى تَابْتْ وْمْرْشُومْ بْهَادْ الْكْلَامْ: «الرَّبّْ كَيْعْرَفْ النَّاسْ دْيَالُه». وْبْكْلَامُه عَاوْتَانِي: «كُلّْ وَاحْدْ كَيْعْبَدْ الرَّبّْ خَاصُّه يْبَعّْدْ مْنْ الْإِتْمْ».

²⁰رَاهْ فْشِي دَارْ كْبِيرَة، مَا كَيْكُونُوشْ غِيرْ الْمَّاعْنْ دْيَالْ الدّْهَبْ وْالْفْضَّة، وَلَكِنْ حْتَّى الْمَّاعْنْ دْيَالْ الْخْشَبْ وْالطِّينْ، اللّْوّْلِينْ كَيْخَدْمُو بِيهُمْ فْالْمُنَاسَبَاتْ وْلْخْرِينْ فْالْخْدْمَة الْعَادِيَّة.

²¹إِيوَا إِلَا نْقَّى شِي وَاحْدْ رَاسُه مْنْ هَادْ الْأُمُورْ، غَيْكُونْ بْحَالْ شِي مَاعُونْ نْقِي وْمْقَدّْسْ، نَافْعْ لْسِيدُه، مُوجُودْ لْكُلّْ خْدْمَة مْزْيَانَة.

²²بَعّْدْ مْنْ الشَّهَوَاتْ دْيَالْ الشُّبَّانْ، وْتْبَعْ التَّقْوَى وْالْإِيمَانْ وْالْمْحَبَّة وْالْهْنَا مْعَ هَادُوكْ اللِّي كَيْطْلْبُو الرَّبّْ بْقَلْبْ نْقِي.

²³وْالْمُنَاقَشَاتْ الْخَاوْيِينْ وْاللِّي مَا فِيهُمْ فَايْدَة بَعّْدْ مْنّْهُمْ، رَاكْ كَتْعْرَفْ بْلِّي كَيْجَبْدُو الْخْصَامْ.

²⁴وْالْعَبْدْ دْ الرَّبّْ مَا خَاصُّوشْ يْتّْخَاصْمْ، وَلَكِنْ خَاصُّه يْكُونْ ضْرِيفْ مْعَ كُلّْشِي، قَادْرْ يْعَلّْمْ وْصْبَّارْ،

²⁵وْخَاصُّه يْصَحّْحْ اللِّي كَيْعَارْضُوهْ غِيرْ بْالضّْرَافَة، لَعَلَّ وَعَسَى اللَّهْ يْهْدِيهُمْ بَاشْ يْعَرْفُو الْحَقّْ،

²⁶وْيْرْجْعُو لْعْقَلْهُمْ وْيْهَرْبُو مْنْ الْمْصِيدَة دْيَالْ إِبْلِيسْ اللِّي صَيّْدْهُمْ بَاشْ يْدِيرُو الْمُرَادْ دْيَالُه.