Read Moroccan Standard Translation رِسَالَةْ تِيمُوتَاوُسْ التَّانِيَّة 3 Bible Online

رِسَالَةْ تِيمُوتَاوُسْ التَّانِيَّة 3 - Moroccan Standard Translation bible

رِسَالَةْ تِيمُوتَاوُسْ التَّانِيَّة 3

¹الْفَصْلْ التَّالْتْ وْخَاصّْكْ تْعْرَفْ بْلِّي فْلِيَّامْ اللّْخْرَة غَيْجِي وَاحْدْ الْوَقْتْ صْعِيبْ،

²حِيتْ غَيْكُونُو النَّاسْ كَيْبْغِيوْ غِيرْ رَاسْهُمْ وْكَيْبْغِيوْ الْفْلُوسْ، مْتْكَبّْرِينْ وْكَيْفْتَخْرُو بْرَاسْهُمْ، كَيْتّْكَلّْمُو بْكْلَامْ الْكُفْرْ، مَا كَيْطِيعُوشْ وَالِدِيهُمْ، كَيْنَكْرُو الْخِيرْ، فَاسْدِينْ،

³مَا فِيهُمْشْ الْمْحَنَّة، فِيهُمْ الْعْنَادْ وْالنَّمِيمَة، مَا كَيْتّْحَكّْمُوشْ فْرَاسْهُمْ، هَمَجِيِّينْ، مَا كَيْبْغِيوْشْ الْخِيرْ،

⁴خَايْنِينْ، طَايْشِينْ، مْنْفُوخِينْ بْالْكِبْرْ، كَيْبْغِيوْ الْمَلَدَّاتْ كْتَرْ مَا كَيْبْغِيوْ اللَّهْ،

⁵كَتْبَانْ عْلِيهُمْ صِفْةْ التَّقْوَى وَلَكِنْ كَيْرَفْضُو الْقُوَّة دْيَالْهَا. إِيوَا بَعّْدْ مْنْ هَادُو.

⁶حِيتْ شِي وْحْدِينْ مْنّْهُمْ كَيْدَخْلُو لْلدّْيُورْ بْالتّْخَبْيَة، وْكَيْغَرُّو الْعْيَالَاتْ الضّْعَافْ اللِّي مْتَقّْلِينْ بْالدّْنُوبْ وْتَابْعِينْ ݣَاعْ شْكَالْ الشَّهْوَة،

⁷وْوَاخَّا هَادْ الْعْيَالَاتْ دِيمَا كَيْتّْعَلّْمُو، عَمّْرْهُمْ مَا قَدْرُو يْعَرْفُو الْحَقّْ.

⁸وْكِمَا وْقَفْ يَنِّيسْ وْيَمْبِرِيسْ ضْدّْ مُوسَى، حْتَّى هَادْ النَّاسْ كَيْوَقْفُو ضْدّْ الْحَقّْ. رَاهْ عْقُولْهُمْ فَاسْدَة، وْمَا كَيْسْتَاهْلُوشْ الْإِيمَانْ.

⁹وَلَكِنْ مَا غَيْزِيدُوشْ لْلْقُدَّامْ، حِيتْ الْحْمَاقْ دْيَالْهُمْ غَيْوَلِّي بَايْنْ لْلنَّاسْ كُلّْهُمْ، كِمَا بَانْ الْحْمَاقْ دْيَالْ يَنِّيسْ وْيَمْبِرِيسْ.

¹⁰وَلَكِنْ نْتَ، رَاكْ تْبَعْتِي التَّعْلِيمْ دْيَالِي، وْالْحَيَاةْ دْيَالِي، وْفِينْ بَاغِي نْوْصَلْ، وْإِيمَانِي، وْالصّْبَرْ دْيَالِي، وْمْحَبّْتِي، وْالتَّبَاتْ دْيَالِي فْالْوَقْتْ الصّْعِيبْ،

¹¹وْالتَّعَدُّو وْالْعْدَابْ اللِّي دَزْتْ فِيهُمْ. وْرَاكْ عَارْفْ فَاشْ دَزْتْ مْلِّي كْنْتْ فْأَنْطَاكْيَة وْأَيْقُونِيَّة وْلِسْتْرَة. رَانِي قَاسِيتْ بْزَّافْ دْيَالْ التَّعَدُّو، وَلَكِنْ الرَّبّْ نْجَّانِي مْنْ كُلّْشِي.

¹²وْاللِّي بْغَا يْعِيشْ بْالتَّقْوَى فْالْمَسِيحْ يَسُوعْ، غَادِي يْتّْعَدَّاوْ عْلِيهْ النَّاسْ.

¹³أَمَّا النَّاسْ اللِّي فِيهُمْ الشَّرّْ وْالْغْشّْ، غَيْوَلِّيوْ كْفَسْ مْنْ دَاكْشِّي اللِّي هُمَ فِيهْ، رَاهْ كَيْخَدْعُو غِيرْهُمْ وْهُمَ بْرَاسْهُمْ مْخْدُوعِينْ.

¹⁴وَلَكِنْ نْتَ بْقَى تَابْتْ فْالْأُمُورْ اللِّي تْعَلّْمْتِيهَا وْآمْنْتِي بِيهَا، وْرَاكْ عَارْفْ عْلَى يْدّْ مْنْ تْعَلّْمْتِي.

¹⁵وْمْنْ صْغْرَكْ وْنْتَ عَارْفْ كْتُبْ اللَّهْ الْمْقَدّْسَة اللِّي تْقْدَرْ تْرَدّْكْ حْكِيمْ بَاشْ تْوْصَلْ لْلنّْجَا بْالْإِيمَانْ فْالْمَسِيحْ يَسُوعْ.

¹⁶وْكْتَابْ اللَّهْ كُلُّه جَا بْالْوَحْيْ مْنْ عَنْدْ اللَّهْ، وْنَافْعْ لْلتَّعْلِيمْ وْالتَّنْبِيهْ وْالتَّصْحِيحْ وْالتَّأْدِيبْ فْدَاكْشِّي اللِّي كَيْرْضِي اللَّهْ،

¹⁷بَاشْ يْكُونْ رَاجُلْ اللَّهْ قَادْرْ عْلَى كُلّْشِي وْمُوجُودْ يْدِيرْ كُلّْ خْدْمَة مْزْيَانَة.