Read Moroccan Standard Translation رِسَالَةْ تِيمُوتَاوُسْ التَّانِيَّة 4 Bible Online

رِسَالَةْ تِيمُوتَاوُسْ التَّانِيَّة 4 - Moroccan Standard Translation bible

رِسَالَةْ تِيمُوتَاوُسْ التَّانِيَّة 4

¹الْفَصْلْ الرَّابْعْ كَنْطْلَبْ مْنّْكْ بْكُلّْ قُوَّة قُدَّامْ اللَّهْ وْالْمَسِيحْ يَسُوعْ، اللِّي غَيْحْكَمْ عْلَى الْحَيِّينْ وْالْمْيّْتِينْ مْلِّي غَيْرْجَعْ فْالْمَمْلَكَة دْيَالُه،

²بَاشْ تْخَبّْرْ بْكْلَامْ اللَّهْ، وْتْكُونْ مُوجُودْ فْالْوَقْتْ اللِّي مْنَاسْبْ وْاللِّي مَا مْنَاسْبْشْ، وْبَاشْ تْخَاصْمْ، وْتْنَبّْهْ وْتْشَجّْعْ بْالصّْبَرْ الْكْتِيرْ وْنْتَ كَتْعَلّْمْ.

³حِيتْ غَيْجِي وَاحْدْ الْوَقْتْ مَا غَيْسْتَحْمْلُوشْ فِيهْ النَّاسْ التَّعْلِيمْ الصّْحِيحْ، وَلَكِنْ غَيْتْبْعُو الشَّهَوَاتْ دْيَالْهُمْ، وْغَيْضُورُو بِيهُمْ مُعَلِّمِينْ غَيْݣُولُو لِيهُمْ دَاكْشِّي اللِّي بْغَاوْ يْسَمْعُوهْ.

⁴وْغَيْسَدُّو وْدْنِيهُمْ عْلَى الْحَقّْ، وْغَيْتْبْعُو الْخْرَايْفْ.

⁵وَلَكِنْ نْتَ، كُونْ مْوَݣّْضْ فْكُلّْ حَاجَة، وْصْبَرْ لْلْعْدَابْ، وْدِيرْ الْخْدْمَة دْيَالْ الْمُبَشِّرْ، وْكَمّْلْ الْخْدْمَة دْيَالْكْ.

⁶حِيتْ بْالنّْسْبَة لِيَّ أَنَا، رَانِي عْطِيتْ حْيَاتِي مْنْ قْبَلْ، وْجَا الْوَقْتْ اللِّي خَاصّْنِي نْمْشِي فِيهْ.

⁷رَانِي دْرْتْ جْهْدِي وْكَافْحْتْ مْزْيَانْ، وْكَمّْلْتْ اللِّي عْلِيَّ، وْحَافْضْتْ عْلَى الْإِيمَانْ،

⁸وْدَابَا رَاهْ كَيْتّْسْنَّانِي تَاجْ التَّقْوَى اللِّي غَيْعْطِيهْ لِيَّ فْدَاكْ النّْهَارْ، الرَّبّْ اللِّي كَيْحْكَمْ بْالْعَدْلْ، وْمَا غَيْعْطِيهْشْ لِيَّ غِيرْ أَنَا، وَلَكِنْ لْݣَاعْ هَادُوكْ اللِّي مْشْتَاقِينْ لْلرّْجُوعْ دْيَالُه.

⁹دِيرْ جَهْدْكْ بَاشْ تْجِي لْعَنْدِي دْغْيَا،

¹⁰حِيتْ دِيمَاسْ سْمَحْ فِيَّ بْسْبَابْ الْمْحَبَّة دْيَالُه لْهَادْ الدّْنْيَا وْسَافْرْ لْتْسَالُونِيكِي، أَمَّا كِرِيسْكِيسْ رَاهْ مْشَى لْغَلَاطِيَّة، وْتِيطُسْ مْشَى لْدَلْمَاطِيَّة.

¹¹لُوقَا بُوحْدُه هُوَ اللِّي بْقَى مْعَايَ. سِيرْ عَنْدْ مَرْقُسْ وْجِيبُه مْعَاكْ، حِيتْ كَيْنْفَعْنِي فْالْخْدْمَة.

¹²أَمَّا تِيخِيكُسْ رَانِي صِيفْطْتُه لْأَفَسُسْ.

¹³مْلِّي تْكُونْ جَايْ، جِيبْ لِيَّ مْعَاكْ السّْلْهَامْ اللِّي خَلِّيتُه عَنْدْ كَارْبُسْ فْمْدِينْةْ تَرْوَاسْ، وْالْكْتُبْ حْتَّى هُمَ وْبْالْخُصُوصْ الْكْتُبْ دْيَالْ الجّْلْدْ.

¹⁴رَاهْ إِسْكَنْدَرْ الصّْنَايْعِي دْ النّْحَاسْ غْلَطْ بْزَّافْ فْحَقِّي، وْالرَّبّْ غَيْجَازِيهْ عْلَى فْعَايْلُه.

¹⁵رَدّْ بَالْكْ مْنُّه حْتَّى نْتَ، حِيتْ رَاهْ وْقَفْ ضْدّْ التَّعْلِيمْ دْيَالْنَا.

¹⁶مْلِّي دَافْعْتْ عْلَى رَاسِي أَوَّلْ مَرَّة حْتَّى وَاحْدْ مَا وْقَفْ مْعَايَ، وَلَكِنْ كُلّْشِي تّْخَلَّى عْلِيَّ. وْكَنْطْلَبْ مْنْ اللَّهْ بَاشْ مَا يْحَاسْبْهُمْشْ!

¹⁷وَلَكِنْ الرَّبّْ وْقَفْ مْعَايَ وْعْطَانِي الْقُوَّة، وْقْدَرْتْ نْخَبّْرْ بْالْبْشَارَة بَاشْ يْسَمْعُوهَا ݣَاعْ النَّاسْ اللِّي مَا كَيْآمْنُوشْ بْاللَّهْ، وْنْجِيتْ مْنْ فُمّْ السّْبَعْ.

¹⁸وْغَيْنَجِّينِي الرَّبّْ مْنْ ݣَاعْ أَعْمَالْ الشَّرّْ، وْغَيْحْفَضْنِي حْتَّى يْدِّينِي لْمَمْلَكْتُه فْالسّْمَا، لِيهْ الْعَزّْ دِيمَا وْعْلَى الدّْوَامْ. آمِينْ.

¹⁹سَلّْمْ عْلَى بِرِيسْكِلَّا وْأَكِيلَا وْعْلَى عَائِلْةْ أُونِيسِيفُورُسْ.

²⁰أَرَاسْتُسْ رَاهْ بْقَى فْكُورِنْتُوسْ، وَلَكِنْ تْرُوفِيمُسْ خَلِّيتُه مْرِيضْ فْمِيلِيتُسْ.

²¹دِيرْ جَهْدْكْ بَاشْ تْجِي قْبَلْ مْنْ وَقْتْ الشّْتَا. كَيْسَلّْمْ عْلِيكْ أُوبُولُوسْ وْبُودِيسْ وْلِينُسْ وْكْلُودْيَة وْݣَاعْ الْخُوتْ.

²²الرَّبّْ يْكُونْ مْعَاكْ. وْالنِّعْمَة دْيَالْ اللَّهْ تْكُونْ مْعَاكُمْ كُلّْكُمْ!