Read Moroccan Standard Translation رِسَالَةْ تِيطُسْ 1 Bible Online

رِسَالَةْ تِيطُسْ 1 - Moroccan Standard Translation bible

رِسَالَةْ تِيطُسْ 1

¹الْفَصْلْ اللّْوّْلْ مْنْ بُولُسْ الْعَبْدْ دْيَالْ اللَّهْ وْالرَّسُولْ دْيَالْ يَسُوعْ الْمَسِيحْ، عْلَى وْدّْ هَادُوكْ اللِّي خْتَارْهُمْ اللَّهْ، بَاشْ يْآمْنُو وْيْعَرْفُو الْحَقّْ اللِّي عْلَى حْسَابْ التَّقْوَى،

²وْهَكَّا غَيْكُونْ عَنْدْهُمْ الرّْجَا دْيَالْ الْحَيَاةْ الدَّايْمَة اللِّي وَاعْدْنَا بِيهَا اللَّهْ مْنْ اللّْوّْلْ دْ الزّْمَانْ، وْهُوَ رَاهْ صَادْقْ.

³وْفْالْوَقْتْ اللِّي بْغَا اللَّهْ الْمُنَجِّي دْيَالْنَا، بَيّْنْ الْكْلْمَة دْيَالُه بْالْبْشَارَة اللِّي أَمّْنِّي عْلِيهَا وْآمْرْنِي بَاشْ نْخَبّْرْ بِيهَا.

⁴كَنْصِيفْطْ هَادْ الرِّسَالَة لْتِيطُسْ وْلْدِي الْحْقِيقِي فْالْإِيمَانْ اللِّي كَيْجْمَعْنَا. النِّعْمَة وْالْهْنَا مْنْ اللَّهْ الْآبْ وْالْمَسِيحْ يَسُوعْ الْمُنَجِّي دْيَالْنَا.

⁵رَانِي خَلِّيتْكْ فْجَزِيرَةْ كِرِيتْ بَاشْ تْكَمّْلْ التَّرْتِيبْ دْيَالْ الْأُمُورْ اللِّي نَاقْصَة، وْتْخْتَارْ فْكُلّْ مْدِينَة شْيُوخْ دْ الْكْنِيسَة كِمَا وْصِّيتْكْ.

⁶خَاصّْ كُلّْ وَاحْدْ مْنّْهُمْ يْكُونْ مَا عْلِيهْ لُومْ، مْزَوّْجْ بْمْرَاة وَحْدَة، وْيْكُونُو وْلَادُه مُومْنِينْ، حْتَّى وَاحْدْ مَا كَيْتَّهْمْهُمْ بْالْفْسَادْ، وْمَا يْكُونُوشْ مْتْمَرّْدِينْ.

⁷حِيتْ الرَّاعِي دْ الْكْنِيسَة اللِّي مْسْؤُولْ عْلَى خْدْمَةْ اللَّهْ، خَاصُّه يْكُونْ مَا عْلِيهْ لُومْ، مَا مْتْكَبّْرْشْ، مَا كَيْتّْقَلّْقْشْ، مَا كَيْسْكَرْشْ، مَا كَيْجْبَدْشْ الصّْدَاعْ، وْمَا كَيْطْمَعْشْ فْالرّْبَحْ دْ الْحْرَامْ،

⁸وَلَكِنْ خَاصُّه يْكُونْ كَيْضَايْفْ النَّاسْ الْبْرَّانِيِّينْ وْكَيْبْغِي الْخِيرْ، شَارْبْ عَقْلُه، وْيْكُونْ كَيْطِيعْ اللَّهْ وْمْتَّاقِي، كَيْتّْحَكّْمْ فْرَاسُه،

⁹شَادّْ فْكْلَامْ اللَّهْ اللِّي تْعَلّْمُه، بَاشْ يْكُونْ قَادْرْ يْشَجّْعْ الْمُومْنِينْ بْالتَّعْلِيمْ الصّْحِيحْ، وْيْرَدّْ عْلَى اللِّي كَيْضَادُّوهْ.

¹⁰حِيتْ كَايْنِينْ تْمَّ بْزَّافْ اللِّي أَصْلْهُمْ يْهُودْ، مْتْمَرّْدِينْ وْكَيْتّْكَلّْمُو بْالْبَاطْلْ مْعَ النَّاسْ وْكَيْخَدْعُوهُمْ.

¹¹هَادُو خَاصّْكْ تْسَدّْ لِيهُمْ فُمّْهُمْ، حِيتْ غَيْخَرْجُو عْلَى عَائِلَاتْ كَامْلَة بْالتَّعْلِيمْ اللِّي مَا خَاصُّوشْ يْكُونْ، وْهَادْشِّي بَاشْ يْرَبْحُو الْحْرَامْ.

¹²وْرَاهْ ݣَالْ وَاحْدْ مْنّْهُمْ اللِّي كَيْحَسْبُوهْ بْحَالْ النّْبِي: «الْكِرِيتِيِّينْ دِيمَا كْدَّابِينْ، وْهُمَ وْحُوشْ قْبِيحَة، مْعْݣَازِينْ وْكَيْفَكّْرُو غِيرْ فْكْرُوشْهُمْ».

¹³وْهَادْ الشّْهَادَة رَاهَا صْحِيحَة، وْعْلَى هَادْشِّي خَاصّْكْ تْوَبَّخْهُمْ بْزَّافْ بَاشْ يْكُونْ إِيمَانْهُمْ صْحِيحْ،

¹⁴وْبَاشْ مَا يْسَمْعُوشْ لْلْخُرَافَاتْ دْيَالْ لِيهُودْ، وْالْوْصِيَّاتْ دْيَالْ النَّاسْ اللِّي رْجْعُو عْلَى طْرِيقْ الْحَقّْ.

¹⁵رَاهْ كُلّْشِي نْقِي لْلنَّاسْ النّْقِيِّينْ، أَمَّا الْمْنْجُوسِينْ وْاللِّي مَاشِي مُومْنِينْ رَاهْ حْتَّى حَاجَة مَا نْقِيَّة لِيهُمْ، حِيتْ عْقَلْهُمْ وْلَّا مْنْجُوسْ وْحْتَّى ضَمِيرْهُمْ.

¹⁶كَيْعْتَرْفُو بْلِّي هُمَ كَيْعَرْفُو اللَّهْ، وَلَكِنْ بْفْعَايْلْهُمْ كَيْنَكْرُوهْ، رَاهُمْ مْكْرُوهِينْ وْمَا كَيْطِيعُوشْ، وْمَا كَيْقَدْرُو يْدِيرُو حْتَّى حَاجَة مْزْيَانَة.