Read Moroccan Standard Translation رِسَالَةْ تِيطُسْ 2 Bible Online

رِسَالَةْ تِيطُسْ 2 - Moroccan Standard Translation bible

رِسَالَةْ تِيطُسْ 2

¹الْفَصْلْ التَّانِي أَمَّا نْتَ، عَلّْمْ بْدَاكْشِّي اللِّي كَيْوَافْقْ التَّعْلِيمْ الصّْحِيحْ:

²ݣُولْ لْلرّْجَالْ الْكْبَارْ فْالْعْمَرْ يْكُونُو رْزَانْ، مْحْتَرْمِينْ، شَارْبِينْ عْقَلْهُمْ، وْيْكُونُو قْوِيِّينْ فْالْإِيمَانْ وْالْمْحَبَّة وْالصّْبَرْ.

³وْݣُولْ حْتَّى لْلْعْيَالَاتْ الْكْبَارْ فْالْعْمَرْ يْمْشِيوْ فْطْرِيقْ الْقَدَاسَة، مَا تْكُونْشْ فِيهُمْ النَّمِيمَة وْمَا يْسَكْرُوشْ، وَلَكِنْ يْعَلّْمُو الْحَاجَة الْمْزْيَانَة،

⁴بَاشْ يْنَصْحُو الْعْيَالَاتْ الشَّابَّاتْ يْبْغِيوْ رْجَالْهُمْ وْوْلَادْهُمْ،

⁵وْيْكُونُو شَارْبَاتْ عْقَلْهُمْ، نْقِيَّاتْ، كَيْتّْهَلَّاوْ فْدْيُورْهُمْ، مْزْيَانَاتْ، وْيْطِيعُو رْجَالْهُمْ بَاشْ حْتَّى حَدّْ مَا يْݣُولْ كْلَامْ الْكُفْرْ عْلَى كْلَامْ اللَّهْ.

⁶وْنْصَحْ حْتَّى الشُّبَّانْ بَاشْ يْكُونُو شَارْبِينْ عْقَلْهُمْ،

⁷وْرَاهْ خَاصّْكْ تْكُونْ مْتَالْ فْكُلّْ حَاجَة بْالْأَعْمَالْ الْمْزْيَانَة، وْتْبَيّْنْ بْلِّي التَّعْلِيمْ دْيَالْكْ صْحِيحْ وْمْعْقُولْ.

⁸وْخَاصّْ كْلَامْكْ يْكُونْ مْزْيَانْ مَا فِيهْ عِيبْ، بَاشْ الْعْدُو يْتْحَشّْمْ مْلِّي مَا يْلْقَا حْتَّى حَاجَة خَايْبَة يْݣُولْهَا عْلِينَا.

⁹وْوْصِّي الْعْبِيدْ بَاشْ يْطِيعُو سْيَادْهُمْ، وْيْرْضِيوْهُمْ فْكُلّْشِي وْمَا يْعْصَاوْهُمْشْ،

¹⁰وْمَا يْسَرْقُوشْ، وَلَكِنْ تْكُونْ فِيهُمْ الْأَمَانَة الْكَامْلَة، بَاشْ فْكُلّْشِي يْعْطِيوْ قِيمَة لْلتَّعْلِيمْ دْيَالْ اللَّهْ الْمُنَجِّي دْيَالْنَا.

¹¹حِيتْ بَانْتْ النِّعْمَة دْيَالْ اللَّهْ اللِّي فِيهَا النّْجَا لْݣَاعْ النَّاسْ،

¹²وْاللِّي كَتْعَلّْمْنَا نْبَعّْدُو عْلَى الْفْسَادْ وْعْلَى شَهَوَاتْ الدّْنْيَا، وْنْعِيشُو بْالْعْقَلْ وْالصّْلَاحْ وْالتَّقْوَى فْهَادْ الدّْنْيَا،

¹³وْحْنَا كَنْتّْسَنَّاوْ النّْهَارْ الْمْبَارْكْ اللِّي كَنْتّْرَجَّاوْهْ، وْالْعَزّْ اللِّي غَيْبَانْ دْيَالْ إِلَاهْنَا الْعْظِيمْ وْمُنَجِّينَا يَسُوعْ الْمَسِيحْ،

¹⁴اللِّي عْطَى حْيَاتُه عْلَى وْدّْنَا بَاشْ يْفْدِينَا مْنْ كُلّْ إِتْمْ، وْيْرَدّْنَا شَعْبْ دْيَالُه طَاهْرْ وْمْتّْحَمّْسْ بَاشْ يْدِيرْ أَعْمَالْ الْخِيرْ.

¹⁵إِيوَا تّْكَلّْمْ مْعَاهُمْ بْهَادْ الْأُمُورْ وْشَجّْعْهُمْ، وْخَدّْمْ السُّلْطَة دْيَالْكْ بَاشْ تْخَاصْمْ عْلِيهُمْ، وْمَا تْخَلِّي حَدّْ يْحْتَقْرْكْ.