Read Moroccan Standard Translation رِسَالَةْ تِيطُسْ 3 Bible Online

رِسَالَةْ تِيطُسْ 3 - Moroccan Standard Translation bible

رِسَالَةْ تِيطُسْ 3

¹الْفَصْلْ التَّالْتْ فَكّْرْ الْمُومْنِينْ يْخَضْعُو لْلْرُّؤَسَا وْلْصْحَابْ السُّلْطَة وْيْطِيعُوهُمْ، وْيْكُونُو دِيمَا مُوجُودِينْ يْدِيرُو أَعْمَالْ الْخِيرْ.

²وْمَا يْسَبُّو حْتَّى وَاحْدْ، وْمَا يْتّْخَاصْمُوشْ، وَلَكِنْ يْكُونُو ضْرِيّْفِينْ وْمْزْيَانِينْ مْعَ ݣَاعْ النَّاسْ.

³حِيتْ حْتَّى حْنَا كْنَّا مْنْ قْبَلْ حْمَّاقْ، مَا كَنْطِيعُو حَدّْ، مُّوضّْرِينْ، وْكْنَّا عْبِيدْ لْلشَّهَوَاتْ وْلْبْزَّافْ دْ الْمَلَدَّاتْ، عَايْشِينْ فْالنِّفَاقْ وْالْحْسَدْ، وْحْتَّى حَدّْ مَا كَانْ كَيْبْغِينَا، وْكْنَّا كَنْكَرْهُو بْعْضِيَّاتْنَا.

⁴وَلَكِنْ مْلِّي بَانْ لُطْفْ اللَّهْ مُنَجِّينَا، وْمْحَبّْتُه لْلنَّاسْ،

⁵نْجَّانَا مَاشِي عْلَى وْدّْ الْأَعْمَالْ الْمْزْيَانَة اللِّي دْرْنَاهَا، وَلَكِنْ بْالرَّحْمَة دْيَالُه، وْبْالْمَعْمُودِيَّة عْطَانَا حَيَاةْ جْدِيدَة وْجَدّْدْنَا بْالرُّوحْ الْقُدُسْ

⁶اللِّي فَاضْ عْلِينَا بْالْكْتْرَة بْفْضَلْ يَسُوعْ الْمَسِيحْ مُنَجِّينَا.

⁷بَاشْ حْتَّى إِلَا وْلِّينَا مْتَّاقْيِينْ اللَّهْ بْالنِّعْمَة دْيَالُه، نْوَرْتُو الْحَيَاةْ الدَّايْمَة بْالرّْجَا.

⁸هَادْ الْكْلَامْ رَاهْ صَادْقْ. وْنْبْغِيكْ تْأَكّْدْ عْلَى هَادْ الْأُمُورْ بَاشْ هَادُوكْ اللِّي آمْنُو بْاللَّهْ يْدِيرُو أَعْمَالْ الْخِيرْ. هَادْ الْأُمُورْ رَاهَا مْزْيَانَة وْغَتْنْفَعْ النَّاسْ.

⁹وَلَكِنْ خَاصّْكْ تْبَعّْدْ عْلَى الْهَضْرَة الْخَاوْيَة وْمَا تْدِّيهَاشْ فْالْأَصْلْ دْيَالْ الجّْدُودْ، وْفْالْمْضَارْبَاتْ وْالْمْخَاصْمَاتْ عْلَى وْدّْ الشّْرَعْ، حِيتْ هَادْشِّي مَا كَيْنْفَعْشْ وْمَا عَنْدُه فَايْدَة.

¹⁰وْهَادَاكْ اللِّي كَيْفَرّْقْ بِينْ النَّاسْ، نَبّْهُه الْمَرَّة اللّْوّْلَى وْالتَّانْيَة، وْمْنْ بَعْدْ تّْفْرَقْ عْلِيهْ.

¹¹رَاكْ عَارْفْ بْلِّي بْحَالْ هَادَا خْرَجْ عْلَى طْرِيقْ الْحَقّْ وْكَيْدِيرْ الدّْنُوبْ، وْرَاهْ حْكَمْ عْلَى رَاسُه بْرَاسُه.

¹²وْمْلِّي نْصِيفْطْ لِيكْ أَرْتِيمَاسْ وْلَا تِيخِيكُسْ، دِيرْ جَهْدْكْ بَاشْ تْجِي عَنْدِي لْنِيكُوبُولِيسْ، حِيتْ رَانِي قَرّْرْتْ نْدَوّْزْ الشّْتْوَا تْمَّ.

¹³دِيرْ جَهْدْكْ بَاشْ تْعَاوْنْ زِينَاسْ عَالِمْ الشّْرَعْ وْأَبُلُّوسْ يْوَجّْدُو لْلسّْفَرْ، بَاشْ حْتَّى حَاجَة مَا تّْخَصّْهُمْ.

¹⁴وْرَاهْ خَاصّْ الْمُومْنِينْ دْيَالْنَا حْتَّى هُمَ يْتّْعَلّْمُو يْدِيرُو خْدْمَة مْزْيَانَة بَاشْ يْرَبْحُو دَاكْشِّي اللِّي كَيْحْتَاجُو لِيهْ، وْهَكَّا مَا غَتْكُونْشْ حْيَاتْهُمْ بْلَا فَايْدَة.

¹⁵ݣَاعْ النَّاسْ اللِّي مْعَايَ كَيْسَلّْمُو عْلِيكْ. سَلّْمْ عْلَى اللِّي كَيْبْغِيوْنَا فْالْإِيمَانْ. وْالنِّعْمَة دْيَالْ اللَّهْ تْكُونْ مْعَاكُمْ كُلّْكُمْ.