Read Moroccan Standard Translation رِسَالَةْ فِلِيمُونْ 1 Bible Online

رِسَالَةْ فِلِيمُونْ 1 - Moroccan Standard Translation bible

رِسَالَةْ فِلِيمُونْ 1

¹مْنْ بُولُسْ، الْمْسْجُونْ عْلَى وْدّْ يَسُوعْ الْمَسِيحْ، وْمْنْ تِيمُوتَاوُسْ خُونَا فْالْإِيمَانْ، لْفِلِيمُونْ خُونَا الْعْزِيزْ اللِّي كَيْعَاوْنَّا فْالْخْدْمَة دْ الرَّبّْ،

²وْلْخْتْنَا فْالْإِيمَانْ أَبْفِيَّة، وْلْأَرْخِيبُّوسْ اللِّي كَيْكَافْحْ مْعَانَا، وْلْلنَّاسْ دْيَالْ الْكْنِيسَة اللِّي كَيْتّْجَمْعُو فْدَارْكْ.

³النِّعْمَة وْالْهْنَا لِيكُمْ مْنْ اللَّهْ بَّانَا وْالرَّبّْ يَسُوعْ الْمَسِيحْ.

⁴دِيمَا كَنْشْكَرْ اللَّهْ مْلِّي كَنْتّْفَكّْرَكْ فْصْلَاتِي،

⁵حِيتْ كَنْسْمَعْ عْلَى الْمْحَبَّة دْيَالْكْ لْݣَاعْ الْمُومْنِينْ الْمْقَدّْسِينْ، وْالْإِيمَانْ اللِّي عَنْدْكْ فْالرَّبّْ يَسُوعْ.

⁶وْكَنْطْلَبْ اللَّهْ بَاشْ تْكُونْ الشّْرْكَة دْ الْإِيمَانْ دْيَالْكْ مْعَانَا قْوِيَّة، وْهَكَّا غَيْتّْعَرْفُو الْبَرَكَاتْ دْيَالْ الْمَسِيحْ اللِّي عَنْدْنَا.

⁷رَاهْ الْفَرْحَة دْيَالِي كْبِيرَة، وْتّْشَجّْعْتْ بْزَّافْ بْسْبَابْ الْمْحَبَّة دْيَالْكْ آ خُويَا، عْلَاحْقَّاشْ فَرّْحْتِي قْلُوبْ الْمُومْنِينْ الْمْقَدّْسِينْ.

⁸عْلَى هَادْشِّي، وَاخَّا عَنْدِي الشَّجَاعَة الْكَامْلَة فْالْمَسِيحْ بَاشْ نْآمْرَكْ أَشْنُو خَاصّْكْ تْدِيرْ،

⁹فَضّْلْتْ نْتّْرَجَّاكْ عْلَى وْدّْ الْمْحَبَّة اللِّي بِينَاتْنَا، أَنَا بُولُسْ الْكْبِيرْ فْالْعْمَرْ، وْاللِّي مْسْجُونْ دَابَا عْلَى وْدّْ يَسُوعْ الْمَسِيحْ.

¹⁰كَنْطْلْبَكْ مْنْ جِهْةْ أُنِسِيمُسْ اللِّي وْلَّى وْلْدِي فْالْمَسِيحْ وْأَنَا فْالْحَبْسْ.

¹¹مْنْ قْبَلْ رَاهْ مَا كَانْشْ صَالْحْ لِيكْ، وَلَكِنْ دَابَا وْلَّى صَالْحْ لِيكْ وْلِيَّ.

¹²هَانِي غَنْصِيفْطُه لِيكْ، رَاهْ هُوَ بْحَالْ نْفْسِي.

¹³كْنْتْ بَاغِي نْشَدُّه عَنْدِي بَاشْ يْعَاوْنِّي فْبْلَاصْتْكْ، فْالْوَقْتْ اللِّي أَنَا فِيهْ مْسْجُونْ عْلَى وْدّْ الْإِنْجِيلْ.

¹⁴وَلَكِنْ مَا بْغِيتْ نْدِيرْ حْتَّى حَاجَة بْلَا الْمُوَافَقَة دْيَالْكْ، بَاشْ مَا تْدِيرْشْ الْخِيرْ بَزّْزْ وَلَكِنْ بْخَاطْرَكْ.

¹⁵يْمْكَنْ تّْفْرَقْ عْلِيكْ أُنِسِيمُسْ لْوَقْتْ قْلِيلْ بَاشْ يْبْقَى مْعَاكْ دِيمَا،

¹⁶حِيتْ دَابَا مَا بْقَاشْ عَبْدْ وَلَكِنْ وْلَّى حْسَنْ مْنْ الْعَبْدْ، رَاهْ هُوَ خُو عْزِيزْ بْزَّافْ، بْالْخُصُوصْ عَنْدِي، إِيوَا كِيفَاشْ مَا يْكُونْشْ عْزِيزْ عَنْدْكْ كْتَرْ، حِيتْ هُوَ بْنَادْمْ وْخُونَا فْالرَّبّْ.

¹⁷إِلَا كْنْتِ كَتْحْسَبْنِي شْرِيكْكْ، قْبْلُه بْحَالْ إِلَا كْنْتْ أَنَا.

¹⁸وْإِلَا ضْلْمَكْ فْشِي حَاجَة، وْلَا كَتّْسَالُه شِي فْلُوسْ، حْسَبْ هَادْشِّي عْلِيَّ.

¹⁹وْأَنَا بُولُسْ كَنْكْتَبْ لِيكْ بْيْدِّي: رَانِي غَادِي نْرَدّْ لِيكْ فْلُوسْكْ، وْمَا غَادِيشْ نْفَكّْرَكْ بْلِّي حْتَّى نْتَ مْدْيُونْ لِيَّ بْحْيَاتْكْ.

²⁰إِيِّهْ آ خُويَا، دِيرْ فِيَّ هَادْ الْخِيرْ عْلَى وْجَهْ الرَّبّْ وْفَرّْحْ قَلْبِي فْالْمَسِيحْ.

²¹رَاهْ عَنْدِي التِّقَة وْأَنَا كَنْكْتَبْ لِيكْ بْلِّي غَادِي تْطِيعْ كْلَامِي، وْرَانِي عَارْفْ بْلِّي غَتْدِيرْ كْتَرْ مْنْ دَاكْشِّي اللِّي كَنْطْلَبْ.

²²وْفْنَفْسْ الْوَقْتْ، وَجّْدْ لِيَّ فِينْ نْسْكُنْ، حِيتْ كَنْتّْرَجَّا مْنْ اللَّهْ بَاشْ يْسْتَاجْبْ لْلصّْلَاة دْيَالْكُمْ وْنْرْجَعْ لْعَنْدْكُمْ.

²³كَيْسَلّْمْ عْلِيكْ أَبَفْرَاسْ اللِّي مْسْجُونْ مْعَايَ عْلَى وْدّْ الْمَسِيحْ يَسُوعْ،

²⁴وْكَيْسَلّْمْ عْلِيكْ مَرْقُسْ وْأَرِسْتَرْخُسْ وْدِيمَاسْ وْلُوقَا اللِّي كَيْعَاوْنُونِي فْالْخْدْمَة دْ الرَّبّْ.

²⁵وْالنِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَ رُوحْكُمْ.