Read Moroccan Standard Translation الرِّسَالَة لْلْعِبْرَانِيِّينْ 1 Bible Online

الرِّسَالَة لْلْعِبْرَانِيِّينْ 1 - Moroccan Standard Translation bible

الرِّسَالَة لْلْعِبْرَانِيِّينْ 1

¹الْفَصْلْ اللّْوّْلْ فْقْدِيمْ الزّْمَانْ، تّْكَلّْمْ اللَّهْ مْعَ جْدُودْنَا بْلْسَانْ الْأَنْبِيَا بْزَّافْ دْ الْمَرَّاتْ وْبْطُرُقْ مْخْتَلْفَة،

²وَلَكِنْ فْهَادْ لِيَّامْ اللّْخْرَة، تّْكَلّْمْ مْعَانَا بْوَلْدُه اللِّي بِيهْ خْلَقْ الدّْنْيَا، وْدَارُه وَارْتْ لْكُلّْشِي.

³هُوَ نُورْ الْعَزّْ دْيَالْ اللَّهْ، وْهُوَ الصُّورَة الْأَصْلِيَّة دْيَالْ الطّْبِيعَة دْيَالُه، كَيْحْفَضْ كُلّْ مَا فْالدّْنْيَا بْكْلْمْتُه الْقَادْرَة عْلَى كُلّْشِي، وْمْنْ بَعْدْمَا نْقَّانَا مْنْ الدّْنُوبْ ݣْلَسْ عْلَى لِيمْنْ دْيَالْ اللَّهْ فْالسّْمَا،

⁴وْخْدَا مْقَامْ عَالِي كْتَرْ مْنْ مْقَامْ الْمَلَايْكَة، وْكْتَرْ مْنْ هَادْشِّي وْرَتْ إِسْمْ حْسَنْ بْزَّافْ مْنْ سْمِيَّاتْهُمْ.

⁵حِيتْ لَمّْنْ فْالْمَلَايْكَة عَمّْرْ اللَّهْ ݣَالْ: «نْتَ وْلْدِي وْمْنْ الْيُومْ رَانِي بَّاكْ». وْعَاوْدْ ݣَالْ: «أَنَا غَنْكُونْ بَّاهْ وْهُوَ غَيْكُونْ وْلْدِي»؟.

⁶وْمْلِّي صِيفْطْ وْلْدُه الْبْكَرْ لْلدّْنْيَا ݣَالْ: «خَاصّْ يْسَجْدُو لِيهْ ݣَاعْ الْمَلَايْكَة دْ اللَّهْ».

⁷وْعْلَى الْمَلَايْكَة ݣَالْ: «اللَّهْ دَارْ الْمَلَايْكَة دْيَالُه رِيحْ، وْالْخُدَّامْ دْيَالُه شْعَّالَة دْ الْعَافْيَة».

⁸أَمَّا عْلَى الْوَلْدْ دْيَالُه ݣَالْ: «الْعَرْشْ دْيَالْكْ يَا اللَّهْ تَابْتْ دِيمَا وْعْلَى الدّْوَامْ. وْكَتْحْكَمْ الشَّعْبْ دْيَالْكْ بْالْعَدْلْ.

⁹كَتْبْغِي التَّقْوَى وْكَتْكْرَهْ الْإِتْمْ. عْلَى دَاكْشِّي اللَّهْ إِلَاهْكْ خْتَارْكْ مْلِّي دْهْنْكْ بْزِيتْ الْفَرْحَة وْفَضّْلْكْ عْلَى صْحَابْكْ».

¹⁰وْݣَالْ: «نْتَ يَا رَبّْ مْنْ الْبْدُو خْلَقْتِي الْأَرْضْ، وْبْيْدِّيكْ صْنَعْتِي السَّمَاوَاتْ،

¹¹هُمَ غَيْفْنَاوْ وَلَكِنْ نْتَ كَتْبْقَى، وْغَيْقْدَامُو كُلّْهُمْ بْحَالْ الْحْوَايْجْ،

¹²وْبْحَالْ اللّْبَاسْ غَتْطْوِيهُمْ وْغَيْتّْبَدّْلُو، وَلَكِنْ نْتَ هُوَ هُوَ، وْالْعْمَرْ دْيَالْكْ مَا لِيهْ حَدّْ».

¹³وْلَمّْنْ فْالْمَلَايْكَة عَمّْرْ اللَّهْ ݣَالْ: «ݣْلَسْ عْلَى لِيمْنْ دْيَالِي حْتَّى نْدِيرْ عْدْيَانْكْ تَحْتْ رْجْلِيكْ؟»

¹⁴وَاشْ مَاشِي كُلّْهُمْ رُوحْ كَيْخَدْمُو اللَّهْ وْمْصِيفْطْهُمْ بَاشْ يْعَاوْنُو اللِّي غَيْوَرْتُو النّْجَا!