Read Moroccan Standard Translation الرِّسَالَة لْلْعِبْرَانِيِّينْ 10 Bible Online

الرِّسَالَة لْلْعِبْرَانِيِّينْ 10 - Moroccan Standard Translation bible

الرِّسَالَة لْلْعِبْرَانِيِّينْ 10

¹الْفَصْلْ الْعَاشْرْ الشّْرَعْ مَاشِي هُوَ الْخِيرْ الْحْقِيقِي، وَلَكِنْ هُوَ غِيرْ خْيَالْ دْيَالْ الْخِيرْ اللِّي غَيْجِي مْنْ بَعْدْ، هَادْشِّي عْلَاشْ عَمّْرُه مَا قْدَرْ يْرَدّْ النَّاسْ مْكْمُولِينْ بْالدّْبَايْحْ اللِّي دِيمَا كَيْقَدّْمُوهُمْ لْلَّهْ كُلّْ عَامْ.

²وْكُونْ كَانُو الدّْنُوبْ كَيْتّْغَفْرُو بْالدّْبَايْحْ، كُونْ مَا بْقَاوْشْ النَّاسْ كَيْقَدّْمُوهُمْ عْلَاحْقَّاشْ وْلَّاوْ طَاهْرِينْ فْمَرَّة، وْكُونْ مَا بْقَاوْشْ كَيْحَسُّو بْالدّْنُوبْ فْضَمِيرْهُمْ.

³وَلَكِنْ بْهَادْ الدّْبَايْحْ اللِّي كَيْتّْقَدّْمُو كُلّْ عَامْ كَانُو النَّاسْ غِيرْ كَيْتّْفَكّْرُو دْنُوبْهُمْ،

⁴حِيتْ مَا يْمْكَنْشْ لْلدّْمْ دْيَالْ التِّيرَانْ وْالْعْتَارْسْ يْمْحِي الدّْنُوبْ.

⁵عْلَى هَادْشِّي، ݣَالْ الْمَسِيحْ مْلِّي كَانْ جَايْ لْلدّْنْيَا: «نْتَ مَا بْغِيتِي لَا دْبِيحَة وَلَا تَقْدِمَة، وَلَكِنْ عْطِيتِينِي دَاتْ دْيَالْ بْنَادْمْ،

⁶حِيتْ مَا كَتْفْرَحْشْ بْالدّْبَايْحْ اللِّي كَتّْحْرَقْ وْبْالدّْبَايْحْ اللِّي كَتّْقَدّْمْ عْلَى وْدّْ الدّْنُوبْ.

⁷وْأَنَا ݣْلْتْ لِيكْ: هَانِي آ رْبِّي جِيتْ نْدِيرْ مُرَادْكْ كِمَا تّْكْتَبْ عْلِيَّ فْكْتَابْكْ».

⁸رَاهْ الْمَسِيحْ ݣَالْ فْاللّْوّْلْ: «نْتَ مَا كَتْقْبَلْشْ وْمَا كَتْفْرَحْشْ بْالدّْبَايْحْ وْالتَّقْدِمَاتْ وْبْالدّْبَايْحْ اللِّي كَتّْحْرَقْ وْالدّْبَايْحْ اللِّي كَتّْقَدّْمْ عْلَى وْدّْ الدّْنُوبْ». وَاخَّا كَانُو النَّاسْ كَيْقَدّْمُوهَا عْلَى حْسَابْ الشّْرَعْ.

⁹وْزَادْ ݣَالْ: «هَانِي جِيتْ بَاشْ نْدِيرْ مُرَادْكْ يَا اللَّهْ». وْبْهَادْ الْكْلَامْ لْغَى الدّْبَايْحْ اللّْوّْلِينْ وْبَدّْلْهُمْ بْالدّْبِيحَة التَّانْيَة.

¹⁰وْعْلَى حْسَابْ مُرَادْ اللَّهْ قَدّْمْ يَسُوعْ الْمَسِيحْ الدَّاتْ دْيَالُه دْبِيحَة عْلَى وْدّْنَا مَرَّة وَحْدَة، وْهَكَّا وْلِّينَا مْقَدّْسِينْ.

¹¹كُلَّ نْهَارْ كَانْ كُلّْ وَاحْدْ مْنْ رْجَالْ الدِّينْ كَيْدِيرْ خْدَمْتُه، وْكَيْقَدّْمْ نَفْسْ الدّْبَايْحْ لْلَّهْ بْزَّافْ دْ الْمَرَّاتْ، وْعَمّْرْ هَادْ الدّْبَايْحْ مَا قَدْرُو يْمْحِيوْ الدّْنُوبْ.

¹²وَلَكِنْ الْمَسِيحْ مْنْ بَعْدْمَا قَدّْمْ دْبِيحَة وَحْدَة لْلَّهْ عْلَى وْدّْ دْنُوبْنَا، ݣْلَسْ عْلَى لِيمْنْ دْيَالْ اللَّهْ عْلَى الدّْوَامْ،

¹³وْدَابَا، كَيْتّْسَنَّى يْدِيرْ اللَّهْ عْدْيَانُه تَحْتْ رْجْلِيهْ.

¹⁴حِيتْ بْدْبِيحَة وَحْدَة رَدّْ هَادُوكْ اللِّي قَدّْسْهُمْ اللَّهْ مْكْمُولِينْ عْلَى الدّْوَامْ.

¹⁵وْحْتَّى الرُّوحْ الْقُدُسْ كَيْشْهَدْ لِينَا عْلَى هَادْ الْأُمُورْ، حِيتْ ݣَالْ مْنْ قْبَلْ:

¹⁶«هَادَا هُوَ الْعَهْدْ اللِّي غَنْدِيرْ مْعَاهُمْ مْنْ بَعْدْ هَادْ لِيَّامْ، كَيْݣُولْ الرَّبّْ، رَاهْ غَنْدِيرْ الشّْرَعْ دْيَالِي فْقْلُوبْهُمْ، وْغَنْكَتْبُه فْعْقُولْهُمْ،

¹⁷وْعَمّْرْنِي مَا غَنْعَاوْدْ نْتّْفَكّْرْ دْنُوبْهُمْ وْالْإِتْمْ دْيَالْهُمْ».

¹⁸عْلَى هَادْشِّي، مْلِّي كَيْتّْغَفْرُو الدّْنُوبْ رَاهْ مَا كَنْحْتَاجُوشْ لْتَقْدِمَة خْرَى عْلَى وْدّْهُمْ.

¹⁹وْهَادْشِّي عْلَاشْ آ الْخُوتْ، عَنْدْنَا التِّقَة بْلِّي نْقَدْرُو نْدَخْلُو لْلْمُوضْعْ الْمْقَدّْسْ بْزَّافْ بْالدّْمْ دْيَالْ يَسُوعْ.

²⁰رَاهْ حَلّْ لِينَا طْرِيقْ حَيَّة وْجْدِيدَة مْلِّي تّْشَرّْݣَاتْ الْخَامِيَّة دْيَالْ الْمُوضْعْ الْمْقَدّْسْ، اللِّي هِيَ الدَّاتْ دْيَالُه،

²¹وْرَاهْ عَنْدْنَا رَئِيسْ رْجَالْ الدِّينْ هُوَ اللِّي مْسْؤُولْ عْلَى بِيتْ اللَّهْ.

²²عْلِيهَا خَاصّْنَا نْجِيوْ قُدَّامْ اللَّهْ بْقَلْبْ صَادْقْ، وْبْالتِّقَة الْكَامْلَة بْالْإِيمَانْ، وْقَلْبْنَا نْقِي مْنْ أَفْكَارْ الشَّرّْ، وْدَاتْنَا مْغْسُولَة بْالْمَا النّْقِي.

²³وْخَاصّْنَا نْتَبْتُو فْالرّْجَا اللِّي كَنْعْتَرْفُو بِيهْ، حِيتْ اللَّهْ أَمِينْ فْدَاكْشِّي اللِّي كَيْوْعَدْ بِيهْ.

²⁴وْخَاصّْنَا نْرَدُّو الْبَالْ لْبَعْضِيَّاتْنَا بَاشْ نْتّْشَجّْعُو عْلَى الْمْحَبَّة وْالْأَعْمَالْ الْمْزْيَانَة.

²⁵وْمَا نْغَيّْبُوشْ عْلَى الْإِجْتِمَاعَاتْ دْيَالْنَا كِيفْ وْلّْفُو شِي وْحْدِينْ يْدِيرُو، وَلَكِنْ خَاصّْنَا نْشَجّْعُو بْعْضِيَّاتْنَا بْزَّافْ، وْبْالْخُصُوصْ وْنْتُمَ كَتْشُوفُو بْاللِّي يُومْ الرَّبّْ غَادِي وْكَيْقَرّْبْ.

²⁶حِيتْ إِلَا دْنَبْنَا بْخَاطْرْنَا بَعْدْمَا عْرَفْنَا الْحَقّْ، رَاهْ مَا بْقَاتْ حْتَّى دْبِيحَة اللِّي غَتْغْفَرْ الدّْنُوبْ،

²⁷وْمَا بْقَى لِينَا غِيرْ نْتّْسْنَّاوْ بْالْخُوفْ يُومْ الْحِسَابْ وْالْعَافْيَة الْقْوِيَّة اللِّي غَتْحْرَقْ عْدْيَانْ اللَّهْ.

²⁸إِلَا شْهْدُو جُوجْ وْلَا تْلَاتَة دْيَالْ الشّْهُودْ ضْدّْ شِي وَاحْدْ مَا كَيْدِيرْشْ بْالشّْرَعْ دْ مُوسَى، رَاهْ كَيْتّْقْتَلْ بْلَا رَحْمَة.

²⁹إِيوَا شْحَالْ كَتْضَنُّو غَيْتّْعَاقْبْ هَادَاكْ اللِّي كَيْحْتَقْرْ وَلْدْ اللَّهْ، وْكَيْحْسَبْ الدّْمْ دْيَالْ الْعَهْدْ اللِّي قَدّْسُه مْنْجُوسْ، وْكَيْسَبّْ رُوحْ النِّعْمَة؟

³⁰رَاهْ حْنَا كَنْعَرْفُو شْكُونْ اللِّي ݣَالْ: «أَنَا اللِّي كَنّْتَقْمْ وْكَنْجَازِي كُلّْ وَاحْدْ». وْكَيْݣُولْ عَاوْتَانِي: «الرَّبّْ غَيْحَاكْمْ الشَّعْبْ دْيَالُه».

³¹يَا وِيلْ هَادَاكْ اللِّي غَيْطِيحْ بِينْ يْدِّينْ اللَّهْ الْحَيّْ.

³²وَلَكِنْ تْفَكّْرُو لِيَّامْ اللِّي فَاتْتْ، رَاهْ فْدِيكْ لِيَّامْ مْنْ بَعْدْمَا نَوّْرْ عْلِيكُمْ اللَّهْ، كَافْحْتُو وْصْبَرْتُو بْزَّافْ عْلَى الْعْدَابْ.

³³مْنْ جِهَة رَاهْ شِي وْحْدِينْ سْبُّوكُمْ وْتّْعَدَّاوْ عْلِيكُمْ، وْمْنْ جِهَة خْرَى وْلِّيتُو مْشَارْكِينْ مْعَ هَادُوكْ اللِّي تْعَدَّاوْ عْلِيهُمْ بْحَالْكُمْ.

³⁴رَاكُمْ شَارْكْتُو الْمْسْجُونِينْ فْعْدَابْهُمْ، وْمْلِّي تّْخَادْ مْنّْكُمْ كُلّْ مَا كَتْمَلْكُو، صْبَرْتُو وْنْتُمَ فْرْحَانِينْ، حِيتْ كْنْتُو عَارْفِينْ بْلِّي كَتْمَلْكُو اللِّي هُوَ حْسَنْ وْدَايْمْ.

³⁵إِيوَا مَا تْضَيّْعُوشْ التِّقَة دْيَالْكُمْ، رَاكُمْ غَتَاخْدُو عْلِيهَا أَجْرْ كْبِيرْ.

³⁶حِيتْ نْتُمَ مْحْتَاجِينْ لْلصّْبَرْ، بَاشْ مْلِّي تْدِيرُو مُرَادْ اللَّهْ، غَادِي تَاخْدُو دَاكْشِّي اللِّي وَاعْدْكُمْ بِيهْ.

³⁷وْكِمَا مْكْتُوبْ فْكْتَابْ اللَّهْ: «مْنْ بَعْدْ وَقْتْ قْلِيلْ بْزَّافْ، غَيْجِي هَادَاكْ اللِّي جَايْ وْمَا غَادِيشْ يْتّْعَطّْلْ.

³⁸رَاهْ بْنَادْمْ اللِّي مْتَّاقِي اللَّهْ بْالْإِيمَانْ غَيْعِيشْ، وَلَكِنْ إِلَا رْجَعْ عْلَى إِيمَانُه مَا غَنْفْرَحْشْ بِيهْ».

³⁹أَمَّا حْنَا رَاهْ مَاشِي مْنْ هَادُوكْ اللِّي رْجْعُو عْلَى الْإِيمَانْ وْتّْهَلْكُو، وَلَكِنْ مْنْ هَادُوكْ اللِّي عَنْدْهُمْ الْإِيمَانْ بَاشْ يْحَافْضُو عْلَى نْفُوسْهُمْ.