Read Moroccan Standard Translation الرِّسَالَة لْلْعِبْرَانِيِّينْ 11 Bible Online

الرِّسَالَة لْلْعِبْرَانِيِّينْ 11 - Moroccan Standard Translation bible

الرِّسَالَة لْلْعِبْرَانِيِّينْ 11

¹الْفَصْلْ حْضَاشْ الْإِيمَانْ هُوَ نْتِيقُو بْلِّي دَاكْشِّي اللِّي كَنْتّْرَجَّاوْهْ غَيْتّْحَقّْقْ، وْنْتْيِقّْنُو بْلِّي الْأُمُورْ اللِّي مَا كَتّْشَافْشْ كَايْنَة بْالصَّحْ.

²رَاهْ بْسْبَابْ هَادْشِّي رْضَى اللَّهْ عْلَى النَّاسْ دْيَالْ زْمَانْ.

³بْالْإِيمَانْ، كَنْعَرْفُو بْلِّي اللَّهْ خْلَقْ الدّْنْيَا بْكْلْمَة مْنُّه، وْهَكَّا رَاهْ الْأُمُورْ اللِّي كَنْشُوفُوهَا جَاتْ مْنْ الْأُمُورْ اللِّي مَا كَنْشُوفُوهَاشْ.

⁴بْالْإِيمَانْ قَدّْمْ هَابِيلْ لْلَّهْ دْبِيحَة حْسَنْ مْنْ الْهْدِيَّة دْيَالْ قَايِينْ. وْبْالْإِيمَانْ قْبَلْ اللَّهْ التَّقْدِمَة دْيَالُه، وْشْهَدْ لِيهْ بْلِّي هُوَ مْتَّاقِي اللَّهْ. وْبْالْإِيمَانْ دْيَالُه، وَاخَّا مَاتْ رَاهْ هُوَ بَاقِي كَيْتّْكَلّْمْ.

⁵بْالْإِيمَانْ، تّْرْفَعْ أَخْنُوخْ لْلسّْمَا بْلَا مَا يْمُوتْ وْمَا بْقَاشْ عْلَى الْأَرْضْ، عْلَاحْقَّاشْ اللَّهْ رْفْعُه لْعَنْدُه. وْقْبَلْ مَا يْتّْرْفَعْ لْلسّْمَا، تّْشْهَدْ لِيهْ بْلِّي هُوَ مْرْضِي عَنْدْ اللَّهْ.

⁶وْبْلَا إِيمَانْ مَا يْمْكَنْشْ نْرْضِيوْ اللَّهْ، حِيتْ اللِّي بْغَا يْجِي لْعَنْدُه خَاصُّه يْآمْنْ بْلِّي هُوَ كَايْنْ وْكَيْجَازِي النَّاسْ اللِّي كَيْطْلْبُوهْ.

⁷بْالْإِيمَانْ، دَارْ نُوحْ بْكْلَامْ اللَّهْ مْلِّي نَبّْهُه عْلَى الْأُمُورْ اللِّي غَتْوْقَعْ وْمَا كَتّْشَافْشْ، وْبْنَى السّْفِينَة بَاشْ يْنَجِّي عَائِلْتُه، وْبْهَادْشِّي حْكَمْ عْلَى الدّْنْيَا وْوْرَتْ التَّقْوَى اللِّي كَتّْعْطَى عْلَى حْسَابْ الْإِيمَانْ.

⁸بْالْإِيمَانْ، سْمَعْ إِبْرَاهِيمْ لْلَّهْ مْلِّي عَيّْطْ عْلِيهْ، وْطَاعْ وْخْرَجْ لْلْأَرْضْ اللِّي وَاعْدُه بَاشْ يْوْرَتْهَا. خْرَجْ بْلَا مَا يْعْرَفْ فِينْ غَيْمْشِي.

⁹بْالْإِيمَانْ، تّْغَرّْبْ فْالْأَرْضْ اللِّي وَاعْدُه بِيهَا اللَّهْ. وْسْكَنْ فْالْخْيَامْ مْعَ إِسْحَاقْ وْيَعْقُوبْ اللِّي وَارْتِينْ مْعَاهْ نَفْسْ الْوَعْدْ.

¹⁰حِيتْ كَانْ إِبْرَاهِيمْ كَيْتّْسَنَّى الْمْدِينَة اللِّي عَنْدْهَا السَّاسْ، وْاللِّي اللَّهْ خَطّْطْ لِيهَا وْبْنَاهَا.

¹¹بْالْإِيمَانْ، سَارَة حْتَّى هِيَ عْطَاهَا اللَّهْ الْقُدْرَة بَاشْ تْوْلَدْ وَاخَّا كْبْرَاتْ فْالْعْمَرْ، حِيتْ آمْنَاتْ بْلِّي اللَّهْ أَمِينْ وْكَيْدِيرْ دَاكْشِّي اللِّي كَيْوْعَدْ بِيهْ.

¹²عْلَى دَاكْشِّي، تّْوْلَدْ مْنْ رَاجْلْ وَاحْدْ اللِّي هُوَ إِبْرَاهِيمْ وْاللِّي كَانْ قْرِيبْ يْمُوتْ، شَعْبْ بْحَالْ نْجُومْ السّْمَا فْالْكْتْرَة دْيَالُه، وْبْحَالْ الرّْمْلَة دْ الْبْحَرْ اللِّي مَا يْمْكَنْشْ تّْحْسَبْ.

¹³فْالْإِيمَانْ مَاتُو هَادْ النَّاسْ كُلّْهُمْ، بْلَا مَا يَاخْدُو دَاكْشِّي اللِّي وَاعْدْهُمْ بِيهْ اللَّهْ، وَلَكِنْ مْنْ بْعِيدْ شَافُو هَادْ الْأُمُورْ وْفْرْحُو بِيهَا، وْعْتَرْفُو بْلِّي هُمَ بْرَّانِيِّينْ وْضْيَافْ فْهَادْ الْأَرْضْ.

¹⁴حِيتْ اللِّي كَيْݣُولُو بْحَالْ هَادْ الْكْلَامْ كَيْبَيّْنُو بْلِّي رَاهُمْ كَيْقَلّْبُو عْلَى أَرْضْ غَتْكُونْ هِيَ بْلَادْهُمْ.

¹⁵وْكُونْ فَكّْرُو فْالْبْلَادْ اللِّي خَرْجُو مْنّْهَا، كُونْ كَانْتْ عَنْدْهُمْ الْوْجْبَة بَاشْ يْرْجْعُو لِيهَا.

¹⁶وَلَكِنْ هُمَ كَانُو كَيْتّْرَجَّاوْ بْلَادْ حْسَنْ، الْبْلَادْ اللِّي كَايْنَة فْالسّْمَا. هَادْشِّي عْلَاشْ مَا حْشَمْشْ اللَّهْ بَاشْ يْتّْسَمَّى الْإِلَاهْ دْيَالْهُمْ، حِيتْ وَجّْدْ لِيهُمْ وَاحْدْ الْمْدِينَة.

¹⁷بْالْإِيمَانْ، قَدّْمْ إِبْرَاهِيمْ وَلْدُه إِسْحَاقْ دْبِيحَة مْلِّي جَرّْبُه اللَّهْ. هَادَاكْ اللِّي قْبَلْ الْوَعْدْ دْيَالْ اللَّهْ قَدّْمْ وَلْدُه الْوْحِيدْ.

¹⁸وَاخَّا ݣَالْ لِيهْ اللَّهْ: «رَاهْ بْإِسْحَاقْ غَتْكُونْ عَنْدْكْ التّْرِّيكَة».

¹⁹وْآمْنْ إِبْرَاهِيمْ بْلِّي اللَّهْ قَادْرْ يْبْعَتْ الْمُوتَى، وْهَكَّا رْجّْعْ لِيهْ اللَّهْ وَلْدُه إِسْحَاقْ بْحَالْ إِلَا بَعْتُه مْنْ الْمُوتْ.

²⁰بْالْإِيمَانْ، بَارْكْ إِسْحَاقْ يَعْقُوبْ وْعِيسُو مْنْ جِهْةْ الْمُسْتَقْبَلْ دْيَالْهُمْ.

²¹بْالْإِيمَانْ، مْلِّي قَرّْبْ يَعْقُوبْ يْمُوتْ بَارْكْ وْلَادْ يُوسْفْ بْجُوجْ، وْسْجَدْ لْلَّهْ وْهُوَ مْتَكِّي عْلَى عْكَّازُه.

²²بْالْإِيمَانْ، مْلِّي قَرّْبْ يُوسْفْ يْمُوتْ تّْكَلّْمْ عْلَى النّْهَارْ اللِّي غَيْخْرُجْ فِيهْ شَعْبْ إِسْرَائِيلْ مْنْ مِصْرْ وْوْصَّى بَاشْ يَاخْدُو مْعَاهُمْ الْعْضَامْ دْيَالُه.

²³بْالْإِيمَانْ، بَعْدْمَا تّْوْلَدْ مُوسَى، خْبَّاوْهْ وَالِدِيهْ مُدَّةْ تْلْتْ شْهُورْ، حِيتْ شَافُو بْلِّي هُوَ وَلْدْ زْوِينْ وْمَا خَافُوشْ مْنْ الْأَمْرْ دْيَالْ الْمَلِكْ.

²⁴بْالْإِيمَانْ، مْلِّي كْبَرْ مُوسَى مَا قْبَلْشْ يْعَيْطُو لِيهْ النَّاسْ وَلْدْ بَنْتْ فِرْعَوْنْ،

²⁵وْفَضّْلْ بَاشْ يْتّْعَدّْبْ مْعَ شَعْبْ اللَّهْ فْعُوضْ مَا يْتّْمَتّْعْ وَقْتْ قْلِيلْ بْالدَّنْبْ.

²⁶وْحْسَبْ الْعْدَابْ اللِّي غَيْقَاسِيهْ الْمَسِيحْ كَنْزْ عْظِيمْ كْبَرْ مْنْ كْنُوزْ مِصْرْ، حِيتْ عِينِيهْ كَانُو عْلَى الْجَائِزَة.

²⁷بْالْإِيمَانْ، سْمَحْ مُوسَى فْأَرْضْ مِصْرْ بْلَا مَا يْخَافْ مْنْ الْغَضَبْ دْيَالْ الْمَلِكْ، وْبْقَى تَابْتْ فْالرَّأْيْ دْيَالُه بْحَالْ إِلَا كَانْ كَيْشُوفْ اللَّهْ اللِّي مَا كَيْتّْشَافْشْ.

²⁸بْالْإِيمَانْ، دَارْ عِيدْ الْفِصْحْ وْرَشّْ الدّْمْ بَاشْ مَا يْمَسّْشْ مَلَاكْ الْمُوتْ حْتَّى بْكَرْ مْنْ شَعْبْ إِسْرَائِيلْ.

²⁹بْالْإِيمَانْ، قْطَعْ الشَّعْبْ الْبْحَرْ الْأَحْمَرْ بْحَالْ الْأَرْضْ الْيَابْسَة، وَلَكِنْ مْلِّي بْغَاوْ الْمِصْرِيِّينْ يْقْطْعُوهْ غَرْقُو.

³⁰بْالْإِيمَانْ، طَاحُو أَسْوَارْ أَرِيحَا بَعْدْمَا ضَارْ عْلِيهُمْ الشَّعْبْ مُدَّةْ سْبَعْ يَّامْ.

³¹بْالْإِيمَانْ، رَاحَابْ اللِّي كَتْفْسَدْ مَا تّْهَلْكَاتْشْ مْعَ عْدْيَانْ اللَّهْ، حِيتْ رَحّْبَاتْ بْهَادُوكْ اللِّي جَاوْ بَاشْ يْدِّيوْ الْخْبَارْ لْشَعْبْ إِسْرَائِيلْ.

³²إِيوَا آشْ يْمْكَنْ نْݣُولْ كْتَرْ مْنْ هَادْشِّي؟ رَاهْ مَا عَنْدِيشْ الْوَقْتْ بَاشْ نْتّْكَلّْمْ عْلَى جِدْعُونْ، وْبَارَاقْ، وْشَمْشُونْ، وْيَفْتَاحْ، وْدَاوُدْ، وْصَمُوئِيلْ، وْالْأَنْبِيَا.

³³بْالْإِيمَانْ، رَاهُمْ غْلْبُو الْمَمْلَكَاتْ، وْحْكْمُو بْالْحَقّْ، وْخْدَاوْ دَاكْشِّي اللِّي وَاعْدْهُمْ بِيهْ اللَّهْ، وْسْدُّو فَّامْ السّْبُوعَ،

³⁴وْطْفَاوْ الْعَافْيَة الْقْوِيَّة، وْنْجَاوْ مْنْ الْمُوتْ فْالْحَرْبْ، كَانُو ضْعَافْ وْوْلَّاوْ قْوِيِّينْ، وْوْلَّاوْ شْدَادْ فْالْحَرْبْ، وْغْلْبُو بْزَّافْ دْيَالْ الْعَسْكَرْ الْبْرَّانِيِّينْ.

³⁵شِي عْيَالَاتْ رْجْعُو لِيهُمْ الْمُوتَى دْيَالْهُمْ مْنْ بَعْدْمَا تّْبَعْتُو مْنْ الْمُوتْ. وَلَكِنْ وْحْدِينْ خْرِينْ تّْعَدّْبُو وْرْفْضُو يْنْجَاوْ حِيتْ بْغَاوْ يْتّْبَعْتُو مْنْ الْمُوتْ وْتْكُونْ عَنْدْهُمْ الْحَيَاةْ الْمْزْيَانَة.

³⁶وْوْحْدِينْ خْرِينْ تّْضَلْمُو، وْتّْضْرْبُو، وْتّْرْمَاوْ فْالْحَبْسْ وْهُمَ مْكَتّْفِينْ بْالسّْنَاسْلْ.

³⁷وْمَاتُو مْرْجُومِينْ، وْتّْقَطّْعُو عْلَى جُوجْ طْرَافْ بْالْمْنْشَارْ، وْتّْقْتْلُو بْالسِّيفْ، وْمْنّْهُمْ اللِّي كَانُو دَايْعِينْ فْكُلّْ بْلَاصَة وْهُمَ لَابْسِينْ جْلُودْ الْغْنَمْ وْالْمَاعْزْ، وْمَا كَانْشْ عَنْدْهُمْ بَاشْ يْعِيشُو، وْكَانُو مْقْهُورِينْ وْمْضْلُومِينْ.

³⁸هَادْ النَّاسْ مَا كَتْسْتَاهْلْهُمْشْ الدّْنْيَا. كَانُو مُّوضّْرِينْ فْالصَّحْرَا وْالجّْبَالْ وْفْالْغِيرَانْ وْالْحْفَارِي.

³⁹ݣَاعْ هَادْ النَّاسْ كَانْ مْشْهُودْ لِيهُمْ بْإِيمَانْهُمْ، وْوَاخَّا هَكَّاكْ مَا خْدَاوْشْ الْوَعْدْ اللِّي وَاعْدْهُمْ بِيهْ اللَّهْ.

⁴⁰حِيتْ مْنْ قْبَلْ وَجّْدْ لِينَا اللَّهْ الْحَاجَة الْمْخَيّْرَة، وْمَا بْغَاهُمْشْ يْكُونُو مْكْمُولِينْ بْلَا بِينَا.