Read Moroccan Standard Translation الرِّسَالَة لْلْعِبْرَانِيِّينْ 12 Bible Online

الرِّسَالَة لْلْعِبْرَانِيِّينْ 12 - Moroccan Standard Translation bible

الرِّسَالَة لْلْعِبْرَانِيِّينْ 12

¹الْفَصْلْ طْنَاشْ وْهَكَّا، رَاهْ ݣَاعْ هَادْ النَّاسْ اللِّي كَيْشَهْدُو بْالْإِيمَانْ ضَايْرِينْ بِينَا بْحَالْ السّْحَابَة، دَاكْشِّي عْلَاشْ خَاصّْنَا نْتّْفَكُّو مْنْ ݣَاعْ الْأُمُورْ اللِّي مَا كَتْخَلِّينَاشْ نْزِيدُو لْلْقُدَّامْ وْمْنْ الدّْنُوبْ اللِّي كَنْطِيحُو فِيهُمْ، وْنْكَافْحُو بْكُلّْ جَهْدْنَا فْالسِّبَاقْ اللِّي قُدَّامْنَا.

²وْخَاصّْنَا نْخَلِّيوْ عِينِينَا عْلَى يَسُوعْ اللِّي هُوَ رَئِيسْ الْإِيمَانْ وْبِيهْ إِيمَانْنَا مْكْمُولْ، عْلَاحْقَّاشْ بْسْبَابْ الْفَرْحَة اللِّي كَتّْسْنَّاهْ، تْحَمّْلْ الْمُوتْ عْلَى الصّْلِيبْ بْلَا مَا يْفَكّْرْ فْاللَّعْنَة، وْݣْلَسْ عْلَى لِيمْنْ دْيَالْ عَرْشْ اللَّهْ.

³إِيوَا فَكّْرُو فْهَادَاكْ اللِّي تْحَمّْلْ الْعْدَابْ دْيَالْ الْمُدْنِبِينْ اللِّي كَانُو ضْدُّه، وْهَادْشِّي بَاشْ مَا تْعْيَاوْشْ وْمَا تْفَشْلُوشْ.

⁴رَاكُمْ كَتّْحَارْبُو ضْدّْ الدّْنُوبْ، وَلَكِنْ مَازَالْ مَا قَاوْمْتُوشْ حْتَّى لْلْمُوتْ.

⁵وَاشْ نْسِيتُو الْكْلَامْ اللِّي كَيْشَجّْعْ وْاللِّي بِيهْ كَيْتّْكَلّْمْ مْعَاكُمْ اللَّهْ بْحَالْ وْلَادُه: «آ وْلْدِي، مَا تْحْتَقْرْشْ التَّرْبِيَّة دْيَالْ الرَّبّْ، وْمَا تْفْشَلْشْ إِلَا خَاصْمْ عْلِيكْ.

⁶حِيتْ اللِّي كَيْبْغِيهْ الرَّبّْ كَيْرَبِّيهْ، وْكَيْضْرَبْ ݣَاعْ وْلَادُه اللِّي كَيْقْبَلْهُمْ».

⁷إِيوَا صْبْرُو مْلِّي يْكُونْ الرَّبّْ كَيْرَبِّيكُمْ، رَاهْ كَيْتّْصَرّْفْ مْعَاكُمْ بْحَالْ الْبُو مْعَ وْلَادُه. وَاشْ كَايْنْ شِي وَلْدْ مَا كَيْرَبِّيهْشْ بَّاهْ؟

⁸وَلَكِنْ إِلَا مَا كْنْتُوشْ مْرَبّْيِينْ بْحَالْ وْلَادُه لْخْرِينْ، هَادْشِّي كَيْعْنِي بْلِّي نْتُمَ مَاشِي وْلَادْ شَرْعِيِّينْ.

⁹رَاهْ كَانُو عَنْدْنَا بَّاوَاتْنَا اللِّي وْلْدُونَا، وْرْبَّاوْنَا وْكْنَّا كَنْحْتَرْمُوهُمْ، إِيوَا كِيفَاشْ مَا غَنْخَضْعُوشْ لْلْآبْ اللِّي فْالسّْمَا بَاشْ تْكُونْ عَنْدْنَا الْحَيَاةْ؟

¹⁰حِيتْ وَالِدِينَا رْبَّاوْنَا يَّامَاتْ قْلَالْ عْلَى حْسَابْ دَاكْشِّي اللِّي بَانْ لِيهُمْ مْزْيَانْ، وَلَكِنْ اللَّهْ كَيْرَبِّينَا عْلَى وْدّْ الْمْنْفَعَة دْيَالْنَا بَاشْ نْكُونُو مْقَدّْسِينْ بْحَالُه.

¹¹كُلّْ تَرْبِيَّة فْاللّْوّْلْ كَتْقَلّْقْ، وْمَا كَتْبَانْشْ بْاللِّي هِيَ شِي حَاجَة اللِّي كَتْفَرّْحْ، وَلَكِنْ مْنْ بَعْدْ رَاهَا كَتْعْطِي الْغْلَّة دْ الْهْنَا وْالتَّقْوَى فْهَادُوكْ اللِّي تّْرَبَّاوْ.

¹²إِيوَا قْوِّيوْ يْدِّيكُمْ الْمْرْخِيِّينْ وْرْكَابِيكُمْ الْفَاشْلِينْ.

¹³وْوَجّْدُو طْرِيقْ مْقَادَّة لْرْجْلِيكُمْ، بَاشْ الرّْجْلِينْ الْعَرْجِينْ مَا يْعْوَاجُوشْ وَلَكِنْ يْتّْشَافَاوْ.

¹⁴عِيشُو فْالْهْنَا مْعَ ݣَاعْ النَّاسْ، وْفْالْقَدَاسَة اللِّي بْلَا بِيهَا حْتَّى وَاحْدْ مَا يْقْدَرْ يْشُوفْ الرَّبّْ.

¹⁵رْدُّو الْبَالْ بَاشْ حْتَّى وَاحْدْ مْنّْكُمْ مَا يْتّْحْرَمْ مْنْ النِّعْمَة دْ اللَّهْ، وْمَا تْخَلِّيوْ حْتَّى جْدَرْ دْيَالْ الْحْقَدْ يْكْبَرْ بِينَاتْكُمْ وْيْشَوّْشْ عْلِيكُمْ، وْيْنَجّْسْ بْزَّافْ مْنّْكُمْ.

¹⁶وْرَدُّو بَالْكُمْ لَيْكُونْ شِي وَاحْدْ مْنّْكُمْ كَيْفْسَدْ وْلَا مَا كَيْحْتَرْمْشْ اللَّهْ، بْحَالْ عِيسُو اللِّي بَاعْ حَقُّه حِيتْ هُوَ الْبْكَرْ عْلَى وْدّْ مَاكْلَة وَحْدَة.

¹⁷وْنْتُمَ كَتْعَرْفُو أَشْنُو وْقَعْ مْنْ بَعْدْ هَادْشِّي، مْلِّي بْغَا يْوْرَتْ الْبَرَكَة مَا تّْقْبَلْشْ، حِيتْ مَا لْقَاشْ كِيفَاشْ يْدِيرْ بَاشْ يْتُوبْ وَاخَّا طْلَبْهَا بْالدّْمُوعْ.

¹⁸وْرَاكُمْ مَا جِيتُوشْ لْشِي جْبَلْ مُمْكِنْ يْتّْمَسّْ، فِيهْ الْعَافْيَة شَاعْلَة وْالضّْلَامْ وْالضّْبَابَة وْالْعْجَاجْ،

¹⁹وْالصُّوتْ دْ الْبُوقْ وْالصّْدَاعْ دْ الْهَضْرَة، وْݣَاعْ هَادُوكْ اللِّي سْمْعُوهْ طْلْبُو بَاشْ مَا يْزِيدُو يْسَمْعُو حْتَّى كْلْمَة،

²⁰حِيتْ مَا قَدْرُوشْ يْتّْحَمّْلُو الْأَمْرْ اللِّي تّْعْطَاهُمْ، وْاللِّي كَيْݣُولْ: «وَاخَّا تْكُونْ بْهِيمَة هِيَ اللِّي كَتْمَسّْ الجّْبَلْ، خَاصّْهَا تّْرْجَمْ حْتَّى لْلْمُوتْ».

²¹دَاكْشِّي كَانْ كَيْخْلَعْ بْزَّافْ وْخْلَّا مُوسَى يْتّْكَلّْمْ وْيْݣُولْ: «رَانِي خَايْفْ بْزَّافْ وْكَنْتْرَعّْدْ».

²²وَلَكِنْ رَاكُمْ جِيتُو لْجْبَلْ صِهْيَوْنْ، لْمْدِينْةْ اللَّهْ الْحَيّْ اللِّي هِيَ أُورْشَلِيمْ دْيَالْ السّْمَا، وْاللِّي فِيهَا الْآلَافْ دْيَالْ الْمَلَايْكَة دَايْرِينْ حَفْلَة.

²³وْجِيتُو لْلْكْنِيسَة دْيَالْ الْوْلَادْ الْبْكْرِيِّينْ وْاللِّي سْمِيَّاتْهُمْ مْكْتُوبِينْ فْالسَّمَاوَاتْ. جِيتُو لْعَنْدْ اللَّهْ اللِّي كَيْحْكَمْ عْلَى كُلّْشِي، وْلْلرُّوحْ دْ النَّاسْ اللِّي مْتَّاقْيِينْ اللَّهْ وْرَدّْهُمْ مْكْمُولِينْ.

²⁴وْجِيتُو لْعَنْدْ يَسُوعْ الْوَسِيطْ دْيَالْ الْعَهْدْ الجّْدِيدْ، وْلْلدّْمْ دْيَالُه الْمْرْشُوشْ اللِّي كَيْتّْكَلّْمْ بْكْلَامْ حْسَنْ مْنْ دْمّْ هَابِيلْ.

²⁵إِيوَا رْدُّو الْبَالْ لَتْوَلِّيوْ مَا قَابْلِينْشْ تْسَمْعُو لْهَادَاكْ اللِّي كَيْتّْكَلّْمْ مْعَاكُمْ، حِيتْ إِلَا هَادُوكْ اللِّي مَا قْبْلُوشْ يْسَمْعُو لْهَادَاكْ اللِّي تّْكَلّْمْ مْعَاهُمْ فْالْأَرْضْ مَا نْجَاوْشْ مْنْ الْعِقَابْ، كِيفَاشْ غَنّْجَاوْ حْنَا إِلَا مَا قْبَلْنَاشْ نْسَمْعُو لْهَادَاكْ اللِّي كَيْتّْكَلّْمْ مْعَانَا مْنْ السَّمَاوَاتْ!

²⁶هَادَاكْ اللِّي صُوتُه زَلْزْلْ الْأَرْضْ فْهَادَاكْ الْوَقْتْ، وَلَكِنْ دَابَا رَاهْ وَاعْدْ وْݣَالْ: «رَانِي مَرَّة خْرَى غَنْزَلْزَلْ مَاشِي غِيرْ الْأَرْضْ وَلَكِنْ حْتَّى السّْمَا».

²⁷وْمْلِّي ݣَالْ: «مَرَّة خْرَى»، رَاهْ كَيْعْنِي بْلِّي غَيْحَيّْدْ ݣَاعْ الْمْخْلُوقَاتْ اللِّي مَا تَابْتَاشْ بَاشْ تْبْقَى غِيرْ اللِّي تَابْتَة.

²⁸عْلَى هَادْشِّي، حِيتْ وْلَّاتْ عَنْدْنَا مَمْلَكَة تَابْتَة وْمَا كَتّْزَعْزَعْشْ، خَاصّْنَا نْشَكْرُو اللَّهْ وْنْعَبْدُوهْ كِيفْ كَيْلِيقْ بِيهْ وْنْحْتَرْمُوهْ وْنْخَافُوهْ.

²⁹حِيتْ إِلَاهْنَا بْحَالْ الْعَافْيَة اللِّي كَتَاكُلْ.