Read Moroccan Standard Translation الرِّسَالَة لْلْعِبْرَانِيِّينْ 13 Bible Online

الرِّسَالَة لْلْعِبْرَانِيِّينْ 13 - Moroccan Standard Translation bible

الرِّسَالَة لْلْعِبْرَانِيِّينْ 13

¹الْفَصْلْ تْلْطَاشْ خَلِّيوْ مْحَبّْتْكُمْ لْلْخُوتْ تْزِيدْ.

²وْمَا تْنْسَاوْشْ تْكُونُو مْضْيَافِينْ، حِيتْ شِي نَاسْ دَارُو هَادْشِّي وْضَايْفُو مَلَايْكَة بْلَا مَا يْعَرْفُو.

³تّْفَكّْرُو الْمْسْجُونِينْ بْحَالْ إِلَا كْنْتُو مْسْجُونِينْ مْعَاهُمْ، وْتّْفَكّْرُو اللِّي كَيْتّْعَدّْبُو بْحَالْ إِلَا نْتُمَ نِيتْ اللِّي كَتّْعَدّْبُو فْالدَّاتْ.

⁴خَاصّْ كُلّْ وَاحْدْ فِيكُمْ يْحْتَرْمْ الزّْوَاجْ، وْتْكُونْ الْعَلَاقَة مَا بِينْ الرَّاجْلْ وْمْرَاتُه نْقِيَّة، حِيتْ اللَّهْ غَيْعَاقْبْ اللِّي كَيْزْنِيوْ وْاللِّي كَيْفَسْدُو.

⁵وْمَا تْخَلِّيوْشْ مْحَبّْتْكُمْ لْلْفْلُوسْ تْأَتّْرْ عْلَى حْيَاتْكُمْ، وْقْنْعُو بْدَاكْشِّي اللِّي عَنْدْكُمْ، حِيتْ اللَّهْ كَيْݣُولْ: «عَمّْرْنِي مَا غَنْخَلِّيكْ وَلَا غَنْسْمَحْ فِيكْ».

⁶دَاكْشِّي عْلَاشْ كَنْݣُولُو وْحْنَا تَايْقِينْ فْنْفُوسْنَا: «الرَّبّْ هُوَ اللِّي كَيْعَاوْنِّي وْمَا غَادِيشْ نْخَافْ. آشْ غَيْدِيرْ لِيَّ بْنَادْمْ؟».

⁷تْفَكّْرُو الْمْسْؤُولِينْ دْيَالْكُمْ اللِّي خَبّْرُوكُمْ بْكْلَامْ اللَّهْ، وْشُوفُو مْزْيَانْ كِيفَاشْ كْمْلَاتْ حْيَاتْهُمْ، كُونُو بْحَالْهُمْ فْالْإِيمَانْ.

⁸يَسُوعْ الْمَسِيحْ رَاهْ هُوَ هُوَ، الْبَارْحْ وْالْيُومْ وْعْلَى الدّْوَامْ.

⁹مَا تْخَلِّيوْشْ التَّعَالِيمْ الْمْتْنَوّْعَة وْالْغْرِيبَة تْجَرّْكُمْ، حِيتْ مْزْيَانْ يْكُونْ الْقَلْبْ تَابْتْ بْالنِّعْمَة مَاشِي بْالْمَاكْلَة اللِّي مَا نْفْعَاتْشْ هَادُوكْ اللِّي دَارُو بِيهَا.

¹⁰حْنَا عَنْدْنَا مَدْبَحْ، وْاللِّي كَيْخَدْمُو فْالسُّكْنَى الْمْقَدّْسَة مَا عَنْدْهُمْشْ الْحَقّْ يَاكْلُو مْنُّه.

¹¹وْرَاهْ رَئِيسْ رْجَالْ الدِّينْ كَانْ كَيَاخُدْ الدّْمْ دْيَالْ الْحَيَوَانَاتْ وْكَيْدْخَلْ بِيهْ لْلْمُوضْعْ الْمْقَدّْسْ بْزَّافْ، وْكَيْقَدّْمُه لْلَّهْ عْلَى وْدّْ الدّْنُوبْ، وْكَيْحْرَقْ الدّْبَايْحْ عْلَى بْرَّا دْ الْخْيَامْ.

¹²هَادْشِّي عْلَاشْ، حْتَّى يَسُوعْ مَاتْ عْلَى بْرَّا دْيَالْ بَابْ أُورْشَلِيمْ بَاشْ بْالدّْمْ دْيَالُه يْقَدّْسْ الشَّعْبْ.

¹³إِيوَا خَاصّْنَا نْخَرْجُو لْعَنْدُه عْلَى بْرَّا دْ الْخْيَامْ وْحْنَا هَازِّينْ اللَّعْنَة دْيَالُه.

¹⁴حِيتْ فْهَادْ الدّْنْيَا كَنْسَكْنُو فْمْدِينَة مَا دَايْمَاشْ، وَلَكِنْ كَنْقَلّْبُو عْلَى الْمْدِينَة اللِّي دَايْمَة.

¹⁵عْلِيهَا خَاصّْنَا بْيَسُوعْ نْقَدّْمُو لْلَّهْ فْكُلّْ وَقْتْ الدّْبِيحَة دْيَالْ التَّسْبِيحْ، اللِّي هِيَ الْغْلَّة دْيَالْ الشّْفَايْفْ اللِّي كَيْعْتَرْفُو بْإِسْمْ الرَّبّْ.

¹⁶وَلَكِنْ مَا تْنْسَاوْشْ تْدِيرُو الْخِيرْ، وْتْشَرْكُو مْعَ النَّاسْ دَاكْشِّي اللِّي عَنْدْكُمْ، حِيتْ بْحَالْ هَادْ الدّْبَايْحْ هُمَ اللِّي كَيْفَرّْحُو اللَّهْ.

¹⁷طِيعُو الْمْسْؤُولِينْ دْيَالْكُمْ وْدِيرُو بْكْلَامْهُمْ، حِيتْ كَيْرَدُّو لِيكُمْ الْبَالْ بْحَالْ إِلَا غَيْتّْحَاسْبُو عْلَى هَادْشِّي، بَاشْ يْدِيرُو خْدَمْتْهُمْ بْالْفَرْحَة مَاشِي بْالجّْمِيلْ حِيتْ هَادْشِّي مَا عَنْدْكُمْ فِيهْ رْبَحْ.

¹⁸صْلِّيوْ مْنْ جِهْتْنَا، حِيتْ حْنَا مْتْيِقّْنِينْ بْلِّي ضَمِيرْنَا نْقِي، وْكَنْبْغِيوْ نْتّْعَامْلُو مْزْيَانْ فْكُلّْشِي.

¹⁹وْكَنْطْلَبْ مْنّْكُمْ بْالْخُصُوصْ، تْصَلِّيوْ مْنْ جِهْتِي بَاشْ يْرَدّْنِي اللَّهْ دْغْيَا لْعَنْدْكُمْ.

²⁰وْكَنْطْلَبْ مْنْ اللَّهْ اللِّي كَيْعْطِي الْهْنَا، وْاللِّي بْعَتْ مْنْ الْمُوتْ رَبّْنَا يَسُوعْ الرَّاعِي الْكْبِيرْ دْيَالْ الْخْرْفَانْ بْدْمّْ الْعَهْدْ الدَّايْمْ،

²¹بَاشْ يْخَلِّيكُمْ قَادْرِينْ تْدِيرُو كُلّْ حَاجَة مْزْيَانَة، وْتْدِيرُو مُرَادُه، وْيْدِيرْ فِينَا دَاكْشِّي اللِّي كَيْرْضِيهْ بْيَسُوعْ الْمَسِيحْ اللِّي لِيهْ الْعَزّْ دِيمَا وْعْلَى الدّْوَامْ. آمِينْ.

²²وْكَنْطْلَبْ مْنّْكُمْ آ الْخُوتْ بَاشْ تْقْبْلُو بْالصّْبَرْ كْلَامْ التَّشْجِيعْ اللِّي كْتَبْتُه لِيكُمْ فْهَادْ الرِّسَالَة، حِيتْ رَاهْ هُوَ كْلَامْ قْلِيلْ.

²³وْكَنْعْلَمْكُمْ بْلِّي خُونَا تِيمُوتَاوُسْ خْرَجْ مْنْ الْحَبْسْ، وْإِلَا جَا عَنْدِي دْغْيَا غَادِي نْجِي مْعَاهْ بَاشْ نْشُوفْكُمْ.

²⁴سَلّْمُو عْلَى ݣَاعْ الْمْسْؤُولِينْ دْيَاوْلْكُمْ وْعْلَى ݣَاعْ الْمُومْنِينْ الْمْقَدّْسِينْ. كَيْسَلّْمُو عْلِيكُمْ الْخُوتْ اللِّي فْإِيطَالِيَا.

²⁵وْالنِّعْمَة دْيَالْ اللَّهْ تْكُونْ مْعَاكُمْ كُلّْكُمْ.