Read Moroccan Standard Translation الرِّسَالَة لْلْعِبْرَانِيِّينْ 2 Bible Online

الرِّسَالَة لْلْعِبْرَانِيِّينْ 2 - Moroccan Standard Translation bible

الرِّسَالَة لْلْعِبْرَانِيِّينْ 2

¹الْفَصْلْ التَّانِي عْلَى هَادْشِّي، خَاصّْنَا نْتَبْتُو مْزْيَانْ فْالْكْلَامْ اللِّي سْمَعْنَاهْ، بَاشْ مَا نْخَرْجُوشْ عْلَى الطّْرِيقْ،

²حِيتْ إِلَا كَانْ الْكْلَامْ اللِّي وَصّْلُوهْ لِينَا الْمَلَايْكَة حَقّْ، وْكُلّْ وَاحْدْ تْعْدَّى وْلَا عْصَى، نْزَلْ عْلِيهْ الْعِقَابْ اللِّي كَيْسْتَاهْلْ،

³إِيوَا كِيفَاشْ غَنْفَلْتُو مْنْ الْعِقَابْ إِلَا مَا دِّينَاهَاشْ فْهَادْ النّْجَا الْكْبِيرْ؟ رَاهْ الرَّبّْ بْرَاسُه خَبّْرْ بِيهْ فْاللّْوّْلْ، وْمْنْ بَعْدْ أَكّْدُوهْ لِينَا النَّاسْ اللِّي سْمْعُوهْ،

⁴وْفْنَفْسْ الْوَقْتْ، بَيّْنْ اللَّهْ الشّْهَادَة دْيَالْهُمْ بْالْعَلَامَاتْ وْالْعْجَايْبْ وْالْمُعْجِزَاتْ الْمْتْنَوّْعَة، وْبْالْمَوَاهِبْ دْيَالْ الرُّوحْ الْقُدُسْ اللِّي فَرّْقْهَا عْلَى حْسَابْ الْمُرَادْ دْيَالُه.

⁵وْرَاهْ اللَّهْ مَا عْطَاشْ الزّْمَانْ اللِّي غَيْجِي وْاللِّي كَنْتّْكَلّْمُو عْلِيهْ دَابَا لْلْمَلَايْكَة بَاشْ يْتّْحَكّْمُو فِيهْ.

⁶وْشِي وَاحْدْ شْهَدْ فْكْتَابْ اللَّهْ وْݣَالْ: «شْكُونْ هُوَ الْإِنْسَانْ حْتَّى تّْفَكّْرُه؟ وْلَا بْنَادْمْ حْتَّى تْدِّيهَا فِيهْ؟

⁷رْدِّيتِيهْ قَلّْ مْنْ الْمَلَايْكَة وَاحْدْ الْمُدَّة قْصِيرَة، وْمْنْ بَعْدْ عْطِيتِيهْ تَاجْ الْعَزّْ وْالْكَرَامَة،

⁸وْدْرْتِي كُلّْ حَاجَة تَحْتْ رْجْلِيهْ». وْإِلَا دَارْ اللَّهْ كُلّْشِي تَحْتْ الْحْكَامْ دْيَالْ بْنَادْمْ، رَاهْ مَا بْقَاتْ حْتَّى حَاجَة خَارْجَة عْلَى الْحْكَامْ دْيَالْ بْنَادْمْ، وَلَكِنْ حْنَا دَابَا مَازَالْ مَا كَنْشُوفُوشْ بْلِّي كُلّْ حَاجَة هِيَ تَحْتْ حْكَامُه.

⁹وَلَكِنْ يَسُوعْ اللِّي رْدُّه اللَّهْ قَلّْ مْنْ الْمَلَايْكَة لْمُدَّة قْصِيرَة، كَنْشُوفُوهْ دَابَا عَنْدُه تَاجْ الْعَزّْ وْالْكَرَامَة، عْلَاحْقَّاشْ صْبَرْ لْعْدَابْ الْمُوتْ، وْهَكَّا بْنِعْمَةْ اللَّهْ مَاتْ عْلَى وْدّْ ݣَاعْ النَّاسْ.

¹⁰رَاهْ اللَّهْ اللِّي خْلَقْ كُلّْشِي، وْبِيهْ كُلّْشِي كَايْنْ، بْغَا يْجِيبْ وْلَادْ كْتَارْ لْلْعَزّْ دْيَالُه، عْلَى هَادْشِّي رَدّْ الْمَسِيحْ اللِّي نْجَّاهُمْ مْكْمُولْ بْسْبَابْ الْعْدَابْ اللِّي قَاسَاهْ.

¹¹حِيتْ هَادَاكْ اللِّي كَيْقَدّْسْ وْهَادُوكْ اللِّي مْقَدّْسِينْ رَاهْ كُلّْهُمْ مْنْ وَاحْدْ، هَادْشِّي عْلَاشْ مَا كَيْحْشَمْشْ يْسَمِّيهُمْ خُوتُه،

¹²وْكَيْݣُولْ: «غَنْخَبّْرْ خُوتِي بْإِسْمْكْ، وْغَنْسَبّْحْ لِيكْ فْوَسْطْ جْمَاعْةْ الْمُومْنِينْ».

¹³وْكَيْݣُولْ مَرَّة خْرَى: «غَادِي نْتّْكَلْ عْلِيكْ». وْكَيْزِيدْ يْݣُولْ: «هَانَا مْعَ الْوْلَادْ اللِّي عْطَاهُمْ لِيَّ اللَّهْ».

¹⁴وْكِمَا هَادْ الْوْلَادْ مْنْ لْحَمْ وْدْمّْ، رَاهْ حْتَّى هُوَ وْلَّى مْشَارْكْ مْعَاهُمْ فْنَفْسْ الشِّي، بَاشْ بْالْمُوتْ دْيَالُه يْهْلَكْ إِبْلِيسْ اللِّي عَنْدُه السُّلْطَة عْلَى الْمُوتْ،

¹⁵وْيْعْتَقْ هَادُوكْ اللِّي بْسْبَابْ الْخُوفْ دْيَالْهُمْ مْنْ الْمُوتْ عَاشُو طُولْ حْيَاتْهُمْ عْبِيدْ.

¹⁶رَاهْ فْالْحَقِيقَة مَا جَاشْ بَاشْ يْعَاوْنْ الْمَلَايْكَة، وَلَكِنْ بَاشْ يْعَاوْنْ تْرِّيكْةْ إِبْرَاهِيمْ.

¹⁷عْلَى وْدّْ هَادْشِّي، كَانْ خَاصُّه يْشْبَهْ لْخُوتُه فْكُلّْ حَاجَة، بَاشْ يْكُونْ رْحِيمْ وْيْوَلِّي رَئِيسْ رْجَالْ الدِّينْ، وْأَمِينْ فْالْأُمُورْ دْيَالْ اللَّهْ، بَاشْ يْغْفَرْ دْنُوبْ الشَّعْبْ.

¹⁸وْعْلَاحْقَّاشْ هُوَ بْرَاسُه تّْعَدّْبْ وْتّْجَرّْبْ، رَاهْ يْقْدَرْ يْعَاوْنْ هَادُوكْ اللِّي كَيْتّْجَرّْبُو.