Read Moroccan Standard Translation الرِّسَالَة لْلْعِبْرَانِيِّينْ 3 Bible Online

الرِّسَالَة لْلْعِبْرَانِيِّينْ 3 - Moroccan Standard Translation bible

الرِّسَالَة لْلْعِبْرَانِيِّينْ 3

¹الْفَصْلْ التَّالْتْ عْلَى وْدّْ هَادْشِّي آ خُوتِي الْمْقَدّْسِينْ، اللِّي عَيّْطْ لِيكُمْ اللَّهْ، شُوفُو مْزْيَانْ يَسُوعْ اللِّي هُوَ رَسُولْ وْرَئِيسْ رْجَالْ الدِّينْ دْ الْإِيمَانْ اللِّي كَنْعْتَرْفُو بِيهْ،

²هُوَ أَمِينْ لْلَّهْ اللِّي خْتَارُه، كِمَا كَانْ مُوسَى حْتَّى هُوَ أَمِينْ فْبِيتْ اللَّهْ كُلُّه.

³وَلَكِنْ يَسُوعْ كَيْسْتَاهْلْ الْعَزّْ كْتَرْ مْنْ مُوسَى، عْلَاحْقَّاشْ اللِّي كَيْبْنِي الدَّارْ عَنْدُه الْعَزّْ كْتَرْ مْنْ الدَّارْ بْرَاسْهَا.

⁴حِيتْ كُلّْ دَارْ كَيْبْنِيهَا شِي حَدّْ، وَلَكِنْ اللِّي كَيْبْنِي كُلّْشِي هُوَ اللَّهْ.

⁵وْمُوسَى كَانْ أَمِينْ فْبِيتْ اللَّهْ كَامْلْ بْصِفْتُه خْدَّامْ دْيَالْ اللَّهْ، بَاشْ يْشْهَدْ بْدَاكْشِّي اللِّي غَيْتّْكَلّْمْ بِيهْ اللَّهْ.

⁶وَلَكِنْ الْمَسِيحْ رَاهْ أَمِينْ فْبِيتْ اللَّهْ بْصِفْتُه وَلْدْ اللَّهْ، وْحْنَا هُمَ هَادْ الْبِيتْ إِلَا بْقِينَا تَابْتِينْ بْالتِّقَة فْالرّْجَا اللِّي كَنْفْتَخْرُو بِيهْ.

⁷عْلَى هَادْشِّي، كِمَا كَيْݣُولْ الرُّوحْ الْقُدُسْ: «إِلَا سْمَعْتُو صُوتْ اللَّهْ الْيُومْ،

⁸مَا تْقَسّْحُوشْ قْلُوبْكُمْ، كِمَا دَارُو جْدُودْكُمْ مْلِّي تَارُو فْيُومْ التَّجْرِبَة فْالصَّحْرَا

⁹فِينْ جَرّْبُونِي، بَاشْ يْعَرْفُو آشْ غَنْدِيرْ، وْشَافُو أَشْنُو دْرْتْ

¹⁰لْمُدَّةْ رْبْعِينْ عَامْ. عْلَى دَاكْشِّي تْقَلّْقْتْ بْزَّافْ عْلَى دَاكْ الْجِيلْ، وْݣْلْتْ: قْلُوبْهُمْ كَيْدِّيوْهُمْ دِيمَا لْلْمَعْصِيَّة، وْمَا كَيْعَرْفُوشْ الطّْرِيقْ دْيَالِي.

¹¹هَادْشِّي عْلَاشْ حْلَفْتْ فْوَقْتْ الْغَضَبْ دْيَالِي وْݣْلْتْ: عَمّْرْهُمْ مَا غَيْدَخْلُو لْلْبْلَادْ فِينْ وَجّْدْتْ لِيهُمْ الرَّاحَة!».

¹²إِيوَا رْدُّو بَالْكُمْ آ الْخُوتْ، بَاشْ مَا يْكُونْ قَلْبْ حْتَّى وَاحْدْ فِيكُمْ عَامْرْ بْالشَّرّْ مَا فِيهْ إِيمَانْ، وْيْبَعّْدْ عْلَى اللَّهْ الْحَيّْ.

¹³وَلَكِنْ شَجّْعُو بْعْضِيَّاتْكُمْ كُلَّ نْهَارْ، مَا حَدّْ هَادْ الْيُومْ اللِّي كَيْتّْكَلّْمْ عْلِيهْ الْكْتَابْ كَايْنْ، بَاشْ الدّْنُوبْ مَا يْخَدْعُو حْتَّى وَاحْدْ فِيكُمْ وْيْوَلِّي قَلْبُه قَاسْحْ.

¹⁴حِيتْ وْلِّينَا مْشَارْكِينْ مْعَ الْمَسِيحْ، إِلَا بْقِينَا تَابْتِينْ حْتَّى لْلّْخْرْ فْالتِّقَة اللِّي كَانْتْ عَنْدْنَا فْاللّْوّْلْ،

¹⁵وْرَاهْ كْتَابْ اللَّهْ كَيْݣُولْ: «إِلَا سْمَعْتُو صُوتْ اللَّهْ الْيُومْ، مَا تْقَسّْحُوشْ قْلُوبْكُمْ كِمَا دَارُو جْدُودْكُمْ مْلِّي تَارُو».

¹⁶إِيوَا شْكُونْ هُمَ اللِّي سْمْعُو صُوتُه وْتَارُو؟ وَاشْ مَاشِي ݣَاعْ هَادُوكْ اللِّي خَرْجُو مْنْ مِصْرْ مْعَ مُوسَى؟

¹⁷وْعْلَى مْنْ غْضَبْ اللَّهْ لْمُدَّةْ رْبْعِينْ عَامْ؟ وَاشْ مَاشِي عْلَى هَادُوكْ اللِّي دَنْبُو وْمَاتُو فْالصَّحْرَا؟

¹⁸وْلَمّْنْ حْلَفْ، وْݣَالْ: «عَمّْرْهُمْ مَا غَيْدَخْلُو لْلْبْلَادْ فِينْ وَجّْدْتْ لِيهُمْ الرَّاحَة»؟ وَاشْ مَاشِي لْهَادُوكْ اللِّي مَا طَاعُوهْشْ؟

¹⁹وْهَكَّا، كَنْشُوفُو بْلِّي مَا قَدْرُوشْ يْدَخْلُو عْلَاحْقَّاشْ مَا آمْنُوشْ.