Read Moroccan Standard Translation الرِّسَالَة لْلْعِبْرَانِيِّينْ 6 Bible Online

الرِّسَالَة لْلْعِبْرَانِيِّينْ 6 - Moroccan Standard Translation bible

الرِّسَالَة لْلْعِبْرَانِيِّينْ 6

¹الْفَصْلْ السَّادْسْ عْلَى هَادْشِّي، خَاصّْنَا نْخَلِّيوْ الدُّرُوسْ اللّْوّْلِينْ اللِّي تّْعَلّْمْنَاهُمْ عْلَى الْمَسِيحْ، وْنْزِيدُو نْتّْعَلّْمُو بَاشْ نْكُونُو كَامْلِينْ، وْمَا خَاصّْنَاشْ نْعَاوْدُو نْتّْكَلّْمُو عْلَى السَّاسْ اللِّي هُوَ التُّوبَة مْنْ الْأَعْمَالْ الْمْيّْتَة، وْالْإِيمَانْ بْاللَّهْ،

²وْالتَّعْلِيمْ عْلَى الْمَعْمُودِيَّة، وْحْطَّانْ الْيْدِّينْ، وْالْبَعْتْ مْنْ الْمُوتْ، وْيُومْ الْحِسَابْ،

³وْهَادْشِّي اللِّي غَنْدِيرُو إِلَا بْغَا اللَّهْ.

⁴حِيتْ اللِّي جَاوْ لْلنُّورْ وَاحْدْ الْمَرَّة، وْدَاقُو الْعَطِيَّة دْ اللَّهْ مْنْ السّْمَا، وْوْلَّاتْ عَنْدْهُمْ الشّْرْكَة مْعَ الرُّوحْ الْقُدُسْ،

⁵وْدَاقُو كْلَامْ اللَّهْ الْمْزْيَانْ وْالْقُوَّاتْ دْيَالْ الزّْمَانْ اللِّي غَيْجِي،

⁶وْمْنْ بَعْدْ رْجْعُو عْلَى إِيمَانْهُمْ، مَا يْمْكَنْشْ تْرْجّْعْهُمْ مَرَّة خْرَى بَاشْ يْتُوبُو، حِيتْ هُمَ بْرَاسْهُمْ كَيْصَلْبُو وَلْدْ اللَّهْ مَرَّة خْرَى، وْكَيْشَوّْهُو السُّمْعَة دْيَالُه.

⁷عْلَاحْقَّاشْ الْأَرْضْ إِلَا رْوَاتْ مْنْ كْتْرَةْ الشّْتَا اللِّي صْبَّاتْ عْلِيهَا، وْنْبّْتَّاتْ رْبِيعْ نَافْعْ لْهَادُوكْ اللِّي تّْحَرْتَاتْ عْلَى وْدّْهُمْ، اللَّهْ غَيْبَارْكْهَا.

⁸وَلَكِنْ إِلَا نْبّْتَاتْ الشُّوكْ وْالسّْدْرَة، رَاهَا بْلَا قِيمَة وْتْسْتَاهْلْ اللَّعْنَة، وْفْاللّْخْرْ غَتّْحْرَقْ.

⁹كَنْݣُولُو هَادْ الْكْلَامْ آ خُوتِي الْعْزَازْ، وَلَكِنْ رَاهْ حْنَا مْتْيِقّْنِينْ بْلِّي نْتُمَ فْالطّْرِيقْ الْمْزْيَانَة اللِّي كَتْدِّي لْلنّْجَا.

¹⁰حِيتْ اللَّهْ مَاشِي ضَالْمْ بَاشْ يْنْسَى الْخْدْمَة دْيَالْكُمْ، وْالْمْحَبَّة اللِّي بَيّْنْتُوهَا عْلَى وْدّْ الْإِسْمْ دْيَالُه، مْلِّي عَاوْنْتُو الْمُومْنِينْ الْمْقَدّْسِينْ وْمَازَالْ كَتْعَاوْنُوهُمْ.

¹¹وْرَاهْ بْغِينَا يْبَيّْنْ كُلّْ وَاحْدْ مْنّْكُمْ بْحَالْ هَادْ الْحْدَاݣَة، وْيْبْقَى تَابْتْ فْالرّْجَا حْتَّى لْلّْخْرْ،

¹²بَاشْ مَا تْكُونُوشْ مْعْݣَازِينْ، وَلَكِنْ تْكُونُو بْحَالْ هَادُوكْ اللِّي بْالْإِيمَانْ وْالصّْبَرْ كَيْوَرْتُو دَاكْشِّي اللِّي وَاعْدْ بِيهْ اللَّهْ.

¹³حِيتْ مْلِّي اللَّهْ وَاعْدْ إِبْرَاهِيمْ حْلَفْ لِيهْ بْرَاسُه، حِيتْ مَا كَايْنْشْ مَا فْضَلْ مْنْ رَاسُه بَاشْ يْحْلَفْ بِيهْ.

¹⁴وْݣَالْ لْإِبْرَاهِيمْ: «غَنْبَارْكْكْ وْغَنْكَتّْرْ تْرِّيكْتْكْ».

¹⁵وْهَكَّا صْبَرْ إِبْرَاهِيمْ حْتَّى خْدَا الْوَعْدْ.

¹⁶حِيتْ النَّاسْ كَيْحَلْفُو بْشِي حَدّْ فْضَلْ مْنّْهُمْ، بَاشْ يْأَكّْدُو كْلَامْهُمْ بْالْحْلُوفْ وْيْوَقّْفُو الْخْصُومَة بِينَاتْهُمْ.

¹⁷وْهَكَّا حْتَّى اللَّهْ مْلِّي بْغَا يْأَكّْدْ لْلِّي غَيْوَرْتُو الْوَعْدْ بْلِّي مُرَادُه عَمّْرُه مَا غَيْتْبَدّْلْ، أَكّْدْ كْلَامُه بْالْحْلُوفْ،

¹⁸هَادْ الجُّوجْ دْ الْأُمُورْ مَا كَيْتّْبَدّْلُوشْ، وْمَا يْمْكَنْشْ اللَّهْ يْكْدَبْ فِيهُمْ، وْبِيهُمْ كَنْتّْشَجّْعُو بْزَّافْ حْنَا اللِّي دْرْنَا تِقْتْنَا فْاللَّهْ بَاشْ نْتَبْتُو فْالرّْجَا اللِّي عْطَاهْ لِينَا.

¹⁹وْهَادْ الرّْجَا رَاهْ لْنْفُوسْنَا بْحَالْ الْفَاسْ دْ السّْفِينَة اللِّي تَابْتْ وْفِيهْ الْأَمَانْ، كَيْدْخَلْ مُورَا الْخَامِيَّة دْيَالْ الْمُوضْعْ الْمْقَدّْسْ،

²⁰لْلْبْلَاصَة فِينْ دْخَلْ يَسُوعْ مْنْ قْبَلْ عْلَى وْدّْنَا، وْوْلَّى رَئِيسْ رْجَالْ الدِّينْ عْلَى الدّْوَامْ فْمْقَامْ مَلْكِي صَادِقْ.