Read Moroccan Standard Translation الرِّسَالَة لْلْعِبْرَانِيِّينْ 7 Bible Online

الرِّسَالَة لْلْعِبْرَانِيِّينْ 7 - Moroccan Standard Translation bible

الرِّسَالَة لْلْعِبْرَانِيِّينْ 7

¹الْفَصْلْ السَّابْعْ حِيتْ هَادْ مَلْكِي صَادِقْ، كَانْ مَلِكْ سَالِيمْ، وْرَاجْلْ الدِّينْ دْ اللَّهْ الْعَالِي، وْهُوَ اللِّي سْتَقْبْلْ إِبْرَاهِيمْ مْلِّي كَانْ إِبْرَاهِيمْ رَاجْعْ مْنْ الْحَرْبْ اللِّي غْلَبْ فِيهَا الْمُلُوكْ، وْبَارْكُه.

²وْعْطَاهْ إِبْرَاهِيمْ الْعْشُورْ مْنْ كُلّْ حَاجَة. وْمَلْكِي صَادِقْ كَتْعْنِي فْاللّْوّْلْ «مَلِكْ التَّقْوَى»، وْكَتْعْنِي عَاوْتَانِي «مَلِكْ الْهْنَا» حِيتْ كَانْ مَلِكْ دْيَالْ سَالِيمْ.

³وْهَادْ الْمَلِكْ مَا كَانْ عَنْدُه لَا بَّاهْ، وَلَا مُّه، وَلَا تْرِّيكَة. وْلِيَّامْ دْيَالُه مَا عَنْدْهَا بْدُو وْحْيَاتُه مَا عَنْدْهَا لَخّْرْ، وَلَكِنْ هُوَ بْحَالْ وَلْدْ اللَّهْ، وْغَيْبْقَى رَاجْلْ الدِّينْ عْلَى الدّْوَامْ.

⁴إِيوَا شُوفُو شْحَالْ هُوَ مُهِمّْ، حْتَّى جْدّْنَا الْكْبِيرْ إِبْرَاهِيمْ، عْطَاهْ الْعْشُورْ مْنْ ݣَاعْ الْحْوَايْجْ الْمْخَيّْرِينْ اللِّي خْدَاهُمْ مْنْ الْمُلُوكْ!

⁵وْرْجَالْ الدِّينْ اللِّي مْنْ وْلَادْ لَاوِي، كَيْآمْرْهُمْ الشّْرَعْ بَاشْ يَاخْدُو الْعْشُورْ مْنْ الشَّعْبْ اللِّي هُمَ خُوتْهُمْ وَاخَّا هُمَ مْنْ تْرِّيكْةْ إِبْرَاهِيمْ.

⁶وَلَكِنْ مَلْكِي صَادِقْ وَاخَّا مَا جَاشْ مْنْ التّْرِّيكَة دْيَالْهُمْ، رَاهْ خْدَا الْعْشُورْ مْنْ إِبْرَاهِيمْ، وْبَارْكْ إِبْرَاهِيمْ اللِّي خْدَا الْوَعْدْ مْنْ اللَّهْ.

⁷وْبْلَا شْكّْ، اللِّي شَانُه كْبِيرْ هُوَ اللِّي كَيْبَارْكْ اللِّي شَانُه صْغِيرْ.

⁸وْرْجَالْ الدِّينْ اللِّي كَيَاخْدُو الْعْشُورْ رَاهْ هُمَ غِيرْ نَاسْ غَادِي يْمُوتُو وَاحْدْ النّْهَارْ، وْحْتَّى مَلْكِي صَادِقْ خْدَا الْعْشُورْ، وَلَكِنْ كْتَابْ اللَّهْ كَيْشْهَدْ لِيهْ بْلِّي هُوَ حَيّْ.

⁹وْنْقَدْرُو نْݣُولُو بْلِّي حْتَّى لَاوِي اللِّي كَيَاخُدْ الْعْشُورْ رَاهْ عْطَى الْعْشُورْ عْلَى يْدّْ إِبْرَاهِيمْ.

¹⁰حِيتْ وَاخَّا مَازَالْ مَا تّْوَلْدُو اللَّاوِيِّينْ كَانْ إِبْرَاهِيمْ هُوَ جَدّْهُمْ مْلِّي سْتَقْبْلُه مَلْكِي صَادِقْ.

¹¹رَاهْ كَانُو رْجَالْ الدِّينْ كَيْتّْخْتَارُو مْنْ اللَّاوِيِّينْ عْلَى حْسَابْ الشّْرَعْ اللِّي تّْعْطَى لْلشَّعْبْ، وْكُونْ كَانْتْ الْخْدْمَة دْيَالْهُمْ كَامْلَة، ݣَاعْ مَا غَيْحْتَاجُو لْرَاجْلْ الدِّينْ آخُرْ بْحَالْ مَلْكِي صَادِقْ وْمَاشِي بْحَالْ هَارُونْ.

¹²حِيتْ مْلِّي كَتْتْبَدّْلْ الْخْدْمَة دْ رْجَالْ الدِّينْ، رَاهْ خَاصّْ حْتَّى الشّْرَعْ يْتّْبَدّْلْ.

¹³وْهَادَاكْ اللِّي تّْݣَالْتْ عْلِيهْ هَادْ الْأُمُورْ، كَانْ مْنْ قْبِيلَة خْرَى عَمّْرْ شِي وَاحْدْ مْنّْهَا مَا خْدَمْ فْالْمَدْبَحْ.

¹⁴حِيتْ مْعْرُوفْ بْلِّي الرَّبّْ دْيَالْنَا تّْوْلَدْ فْقْبِيلْةْ يَهُودَا، وْمُوسَى مَا ݣَالْشْ بْلِّي مْنْ هَادْ الْقْبِيلَة غَيْجِيوْ رْجَالْ الدِّينْ.

¹⁵وْاللِّي كَيْزِيدْ يْبَيّْنْ هَادْ الْأُمُورْ هُوَ الْمْجِي دْيَالْ رَاجْلْ الدِّينْ آخُرْ بْحَالْ مَلْكِي صَادِقْ،

¹⁶اللِّي مَا وْلَّاشْ رَاجْلْ الدِّينْ بْحَسَبْ الشّْرَعْ وْوْصِيَّاتْ بْنَادْمْ، وَلَكِنْ بْالْقُوَّة دْ الْحَيَاةْ اللِّي مَا عَنْدْهَا لَخّْرْ.

¹⁷حِيتْ كْتَابْ اللَّهْ كَيْشْهَدْ لِيهْ وْكَيْݣُولْ: «نْتَ رَاجْلْ الدِّينْ عْلَى الدّْوَامْ فْمْقَامْ مَلْكِي صَادِقْ».

¹⁸وْهَكَّا تّْلْغَى الْقَانُونْ الْقْدِيمْ عْلَاحْقَّاشْ كَانْ ضْعِيفْ وْمَا صَالْحْشْ،

¹⁹حِيتْ الشّْرَعْ عَمّْرُه مَا رَدّْ شِي حَاجَة مْكْمُولَة. وَلَكِنْ تّْعْطَى لِينَا وَاحْدْ الرّْجَا حْسَنْ مْنُّه وْبِيهْ كَنْقَرّْبُو لْلَّهْ.

²⁰فُوقْ هَادْشِّي، رَاهْ كَايْنْ الْحْلُوفْ دْيَالْ اللَّهْ. وْاللَّاوِيِّينْ كَانُو كَيْوَلِّيوْ رْجَالْ الدِّينْ بْلَا حْلُوفْ.

²¹وَلَكِنْ يَسُوعْ وْلَّى رَاجْلْ الدِّينْ بْالْحْلُوفْ دْيَالْ اللَّهْ اللِّي كَيْݣُولْ لِيهْ: «الرَّبّْ حْلَفْ وْمَا غَيْتّْرَاجَعْشْ: نْتَ رَاجْلْ الدِّينْ عْلَى الدّْوَامْ».

²²وْبْهَادْ الْحْلُوفْ ضْمَنْ لِينَا يَسُوعْ عَهْدْ حْسَنْ.

²³وْزْيَادَة عْلَى هَادْشِّي، رَاهْ كَانُو بْزَّافْ دْ رْجَالْ الدِّينْ، عْلَاحْقَّاشْ الْمُوتْ مَا كَانْتْشْ كَتْخَلِّيهُمْ يْبْقَاوْ فْخْدَمْتْهُمْ.

²⁴وَلَكِنْ عْلَاحْقَّاشْ يَسُوعْ حَيّْ عْلَى الدّْوَامْ، رَاهْ غَيْبْقَى دِيمَا رَاجْلْ الدِّينْ.

²⁵وْعْلَى هَادْشِّي هُوَ قَادْرْ يْنَجِّي عْلَى الدّْوَامْ هَادُوكْ اللِّي بِيهْ كَيْجِيوْ عَنْدْ اللَّهْ، حِيتْ هُوَ حَيّْ عْلَى الدّْوَامْ بَاشْ يْشْفَعْ لِيهُمْ.

²⁶رَاهْ هَادَا هُوَ رَئِيسْ رْجَالْ الدِّينْ اللِّي حْنَا مْحْتَاجِينْ لِيهْ، قُدُّوسْ بْلَا دَنْبْ وْبْلَا عِيبْ، وْحْيَاتُه بْعِيدَة عْلَى حَيَاةْ الْمُدْنِبِينْ، وْرْفْعُه اللَّهْ عْلَا مْنْ السَّمَاوَاتْ.

²⁷هُوَ مَا مْحْتَاجْشْ يْقَدّْمْ دْبَايْحْ كُلَّ نْهَارْ عْلَى دْنُوبُه وْدْنُوبْ الشَّعْبْ كِمَا كَيْدِيرُو الرُّؤَسَا دْ رْجَالْ الدِّينْ، حِيتْ دَارْ هَادْشِّي مَرَّة وَحْدَة مْلِّي قَدّْمْ حْيَاتُه عْلَى وْدّْهُمْ.

²⁸وْرَاهْ الشّْرَعْ كَيْخْتَارْ النَّاسْ اللِّي مَا هُمَاشْ كَامْلِينْ بَاشْ يْكُونُو رُؤَسَا دْ رْجَالْ الدِّينْ، وَلَكِنْ دَاكْشِّي اللِّي وْعَدْ بِيهْ اللَّهْ بْالْحْلُوفْ اللِّي جَا مْنْ بَعْدْ الشّْرَعْ كَيْخْتَارْ وَلْدْ اللَّهْ اللِّي كَامْلْ عْلَى الدّْوَامْ.