Read Moroccan Standard Translation الرِّسَالَة لْلْعِبْرَانِيِّينْ 8 Bible Online

الرِّسَالَة لْلْعِبْرَانِيِّينْ 8 - Moroccan Standard Translation bible

الرِّسَالَة لْلْعِبْرَانِيِّينْ 8

¹الْفَصْلْ التَّامْنْ وْاللِّي مُهِمّْ فْهَادْشِّي اللِّي تّْݣَالْ هُوَ هَادَا: رَاهْ عَنْدْنَا رَئِيسْ رْجَالْ الدِّينْ دْيَالْنَا، وْهُوَ ݣَالْسْ فْالسّْمَا عْلَى لِيمْنْ دْيَالْ عَرْشْ اللَّهْ،

²وْكَيْدِيرْ خْدَمْتُه فْالْمُوضْعْ الْمْقَدّْسْ بْزَّافْ وْفْالسُّكْنَى الْمْقَدّْسَة الْحْقِيقِيَّة اللِّي صَايْبْهَا الرَّبّْ مَاشِي بْنَادْمْ.

³وْحِيتْ كُلّْ وَاحْدْ مْنْ الرُّؤَسَا دْ رْجَالْ الدِّينْ كَيْتّْخْتَارْ بَاشْ يْقَدّْمْ الْهْدِيَّاتْ وْالدّْبَايْحْ، خَاصّْ حْتَّى رَئِيسْ رْجَالْ الدِّينْ دْيَالْنَا تْكُونْ عَنْدُه شِي حَاجَة يْقَدّْمْهَا.

⁴وْكُونْ كَانْ هْنَا فْالْأَرْضْ كُونْ ݣَاعْ مَا وْلَّى رَاجْلْ الدِّينْ، حِيتْ كَانُو رْجَالْ الدِّينْ خْرِينْ مْنْ قْبَلْ اللِّي كَيْقَدّْمُو هْدِيَّاتْ عْلَى حْسَابْ الشّْرَعْ.

⁵هَادْ رْجَالْ الدِّينْ كَانُو كَيْخَدْمُو فْبِيتْ اللَّهْ الْمْقَدّْسْ اللِّي كَيْشْبَهْ لْهَادَاكْ اللِّي فْالسّْمَا فْكُلّْشِي، وْقْبَلْ مَا يْبْدَا مُوسَى يْبْنِي السُّكْنَى الْمْقَدّْسَة نَبّْهُه اللَّهْ وْݣَالْ لِيهْ: «رَدّْ بَالْكْ بَاشْ تْصَايْبْ كُلّْشِي بْحَالْ الشّْكَلْ اللِّي وْرِّيتُه لِيكْ فْالجّْبَلْ».

⁶وَلَكِنْ دَابَا، رَاهْ الْمَسِيحْ خْدَا خْدْمَة حْسَنْ بْزَّافْ، حِيتْ هُوَ الْوَسِيطْ دْيَالْ أَحْسَنْ عَهْدْ تّْدَارْ بِينْ اللَّهْ وْالنَّاسْ، وْهَادْ الْعَهْدْ رَاهْ مْبْنِي عْلَى أَحْسَنْ مَا وَاعْدْ بِيهْ اللَّهْ.

⁷حِيتْ كُونْ كَانْ هَادَاكْ الْعَهْدْ اللّْوّْلْ بْلَا عِيبْ كُونْ ݣَاعْ مَا غَيْتّْحْتَاجْ لْعَهْدْ آخُرْ فْبْلَاصْتُه.

⁸وَلَكِنْ اللَّهْ كَيْلُومْ الشَّعْبْ دْيَالُه وْكَيْݣُولْ: «هَا لِيَّامْ جَايَّة، كَيْݣُولْ الرَّبّْ، اللِّي غَنْدِيرْ فِيهَا عَهْدْ جْدِيدْ مْعَ شَعْبْ إِسْرَائِيلْ وْشَعْبْ يَهُودَا،

⁹مَاشِي بْحَالْ الْعَهْدْ اللِّي دْرْتْ مْعَ جْدُودْهُمْ نْهَارْ خْدِيتْ بْيْدّْهُمْ وْخَرّْجْتْهُمْ مْنْ مِصْرْ. عْلَاحْقَّاشْ مَا دَارُوشْ بْالْعَهْدْ دْيَالِي، وْأَنَا سْمَحْتْ فِيهُمْ، كَيْݣُولْ الرَّبّْ.

¹⁰وْهَادَا هُوَ الْعَهْدْ اللِّي غَنْدِيرْ مْعَ شَعْبْ إِسْرَائِيلْ فْلِيَّامْ الجَّايَّة، كَيْݣُولْ الرَّبّْ: غَنْعْطِيهُمْ الْفَهْمْ بَاشْ يْعَرْفُو الْوْصِيَّاتْ دْيَالِي، وْغَنْكْتَبْهَا فْقْلُوبْهُمْ، وْغَنْكُونْ الْإِلَاهْ دْيَالْهُمْ وْهُمَ غَيْكُونُو الشَّعْبْ دْيَالِي.

¹¹وْحْتَّى وَاحْدْ مْنّْهُمْ مَا خَاصُّه يْعَلّْمْ وَلْدْ بْلَادُه وْلَا خُوهْ وْيْݣُولْ لِيهْ: خَاصّْكْ تْعْرَفْ الرَّبّْ، عْلَاحْقَّاشْ كُلّْهُمْ غَيْعَرْفُونِي، مْنْ صْغِيرْهُمْ لْكْبِيرْهُمْ،

¹²عْلَاحْقَّاشْ غَنْغْفَرْ لِيهُمْ الْإِتْمْ دْيَالْهُمْ وْعَمّْرْنِي مَا غَنْعَاوْدْ نْتّْفَكّْرْ دْنُوبْهُمْ».

¹³وْمْلِّي اللَّهْ كَيْݣُولْ بْلِّي "هَادَا هُوَ الْعَهْدْ الجّْدِيدْ" رَاهْ كَيْعْنِي بْلِّي الْعَهْدْ اللّْوّْلْ وْلَّى قْدِيمْ، وْكُلّْ حَاجَة قْدِيمَة رَاهَا كَتْمْشِي وْمَا كَيْبْقَاشْ لِيهَا لَاتَرْ.