Read Moroccan Standard Translation الرِّسَالَة لْلْعِبْرَانِيِّينْ 9 Bible Online

الرِّسَالَة لْلْعِبْرَانِيِّينْ 9 - Moroccan Standard Translation bible

الرِّسَالَة لْلْعِبْرَانِيِّينْ 9

¹الْفَصْلْ التَّاسْعْ الْعَهْدْ اللّْوّْلْ كَانُو عَنْدُه فْرَايْضْ دْ الْعِبَادَة، وْمُوضْعْ مْقَدّْسْ فْالْأَرْضْ،

²عْلَى هَادْشِّي تّْبْنَاتْ وَاحْدْ الْخِيمَة كَيْتّْسْمَّى الْمُوضْعْ اللّْوّْلْ فِيهَا «الْمُوضْعْ الْمْقَدّْسْ»، وْفِيهْ كَايْنَة الْحَسْكَة وْالْمِيدَة وْخُبْزْ التَّقْدِمَة.

³وْمْنْ وْرَا الْخَامِيَّة التَّانْيَة كَايْنْ الْمُوضْعْ اللِّي كَيْتّْسْمَّى «الْمُوضْعْ الْمْقَدّْسْ بْزَّافْ»،

⁴وْفِيهْ كَايْنْ مَدْبَحْ الدّْهَبْ دْيَالْ الْبْخُورْ، وْالتَّابُوتْ دْيَالْ الْعَهْدْ اللِّي مْغَطِّي كُلُّه بْالدّْهَبْ، وْفْلْدَاخْلْ دْيَالُه كَانْ وَاحْدْ الْمَاعُونْ دْيَالْ الدّْهَبْ فِيهْ خُبْزْ الْمَنّْ، وْالْعْصَا دْيَالْ هَارُونْ اللِّي نْبّْتَاتْ، وْجُوجْ لْوَاحْ دْ الْحْجَرْ فِيهُمْ وْصِيَّاتْ الْعَهْدْ.

⁵وْفُوقْ التَّابُوتْ كَايْنِينْ جُوجْ دْ الْمَلَايْكَة مْنْ الْكَرُوبِيمْ كَيْرَمْزُو لْلْحُضُورْ دْيَالْ اللَّهْ، وْبْضْلّْ جْنَاوْحْهُمْ كَيْغَطِّيوْ الْغْطَا دْيَالْ التَّابُوتْ. وَلَكِنْ دَابَا مَاشِي هَادَا هُوَ الْوَقْتْ فَاشْ غَنْفَسّْرْ هَادْ الْأُمُورْ بْالتَّدْقِيقْ.

⁶هَادْ الْأُمُورْ كَانْتْ مْرَتّْبَة بْهَادْ الشّْكَلْ، وْكَانُو رْجَالْ الدِّينْ كَيْدَخْلُو كُلَّ نْهَارْ لْلْمُوضْعْ اللّْوّْلْ بَاشْ يْدِيرُو خْدَمْتْهُمْ.

⁷أَمَّا الْمُوضْعْ التَّانِي رَاهْ مَا كَيْدْخَلْ لِيهْ غِيرْ رَئِيسْ رْجَالْ الدِّينْ مَرَّة وَحْدَة فْالْعَامْ، وْخَاصُّه يْدَخّْلْ مْعَاهْ دْمّْ الدّْبِيحَة بَاشْ يْقَدّْمُه لْلَّهْ عْلَى وْدّْ دْنُوبُه وْالدّْنُوبْ اللِّي دَارُوهُمْ الشَّعْبْ وْهُمَ مَا عَارْفِينْشْ،

⁸وْبْهَادْشِّي كَيْبَيّْنْ الرُّوحْ الْقُدُسْ بْلِّي الطّْرِيقْ اللِّي كَتْدِّي لْلْمُوضْعْ الْمْقَدّْسْ بْزَّافْ مَازَالْ مَا تّْحَلَّاتْ، حِيتْ الْخِيمَة اللِّي فْالْأَرْضْ بَاقْيَة كَايْنَة.

⁹وْهَادْشِّي كَيْرْمَزْ لْهَادْ الزّْمَانْ، اللِّي فِيهْ كَيْتّْقَدّْمُو هْدِيَّاتْ وْدْبَايْحْ مَا يْقَدْرُوشْ يْنَقِّيوْ الضَّمِيرْ دْيَالْ هَادَاكْ اللِّي كَيْخْدَمْ.

¹⁰حِيتْ هُمَ غِيرْ فْرَايْضْ دْيَالْ الدَّاتْ مْبْنِيِّينْ عْلَى الْمَاكْلَة وْالْمْشْرُوبَاتْ وْالْعَادَاتْ الْكْتِيرَة دْيَالْ الْغْسِيلْ، وْݣَاعْ هَادْ الْأُمُورْ كَانْتْ مْفْرُوضَة حْتَّى لْلْوَقْتْ اللِّي غَيْبَدّْلْ فِيهْ اللَّهْ كُلّْشِي.

¹¹وَلَكِنْ الْمَسِيحْ، جَا بْحَالْ رَئِيسْ رْجَالْ الدِّينْ بَاشْ يْعْطِينَا الْبَرَكَاتْ اللِّي كَانُو مُوجُودِينْ مْنْ قْبَلْ، وْدْخَلْ لْوَاحْدْ الْخِيمَة مْكْمُولَة وْكْبِيرَة، مَا صَايْبُوهَاشْ النَّاسْ وْمَا مْحْسُوبَاشْ عْلَى هَادْ الدّْنْيَا.

¹²رَاهْ دْخَلْ مَرَّة وَحْدَة لْلْمُوضْعْ الْمْقَدّْسْ بْزَّافْ وْمَا قَدّْمْ لَا دْمّْ الْعْتَارْسْ وَلَا دْمّْ الْعْجُولْ، وَلَكِنْ قَدّْمْ الدّْمْ دْيَالُه وْبِيهْ عْطَانَا الْفِدَاءْ الدَّايْمْ.

¹³حِيتْ إِلَا كَانْ دْمّْ الْعْتَارْسْ وْالتِّيرَانْ وْرْمَادْ الْعْجْلَة الْمْحْرُوقَة كَيْتّْرَشْ عْلَى النَّاسْ الْمْنْجُوسِينْ بَاشْ يْقَدّْسْهُمْ وْيْرَدّْ الدَّاتْ دْيَالْهُمْ طَاهْرَة،

¹⁴إِيوَا رَاهْ دْمّْ الْمَسِيحْ اللِّي قَدّْمْ حْيَاتُه لْلَّهْ بْالرُّوحْ الدَّايْمْ بْلَا مَا يْكُونْ فِيهْ حْتَّى عِيبْ حْسَنْ بْزَّافْ، وْالدّْمْ دْيَالُه غَادِي يْنَقِّي ضَمِيرْنَا مْنْ الْأَعْمَالْ اللِّي كَتْدِّي لْلْمُوتْ، بَاشْ نْعَبْدُو اللَّهْ الْحَيّْ.

¹⁵هَادْشِّي عْلَاشْ الْمَسِيحْ هُوَ الْوَسِيطْ دْيَالْ الْعَهْدْ الجّْدِيدْ، حِيتْ مَاتْ بَاشْ يْفْدِي النَّاسْ مْنْ الدّْنُوبْ اللِّي دَارُوهُمْ فْالْعَهْدْ اللّْوّْلْ، وْبَاشْ هَادُوكْ اللِّي خْتَارْهُمْ اللَّهْ يَاخْدُو الْوَرْتْ الدَّايْمْ اللِّي وَاعْدْهُمْ بِيهْ اللَّهْ.

¹⁶حِيتْ فِينْ مَا كَانْتْ شِي وْصِيَّة، خَاصّْ يْبَانْ بْلِّي مُولَاهَا مْيّْتْ،

¹⁷حِيتْ الْوْصِيَّة كَتْكُونْ صَالْحَة غِيرْ إِلَا مَاتْ مُولَاهَا، عْلَاحْقَّاشْ إِلَا كَانْ بَاقِي فْالْحَيَاةْ رَاهَا مَا صَالْحَاشْ.

¹⁸وْهَكَّا حْتَّى الْعَهْدْ اللّْوّْلْ مَا كَانْشْ صَالْحْ حْتَّى سَالْ الدّْمْ،

¹⁹حِيتْ مُوسَى بَعْدْمَا خَبّْرْ الشَّعْبْ كُلُّه بْݣَاعْ الْوْصِيَّاتْ دْيَالْ الشّْرَعْ، خْدَا دْمّْ الْعْجُولْ وْالْعْتَارْسْ، وْخْدَا مْعَاهْ الْمَا، وْرْشُّه بْوَاحْدْ الطَّرْفْ دْيَالْ الصُّوفَة حَمْرَا وْبْعَرْشْ دْيَالْ عَشْبَةْ الزُّوفَا عْلَى كْتَابْ الشّْرَعْ وْعْلَى الشَّعْبْ كُلُّه،

²⁰وْݣَالْ: «هَادَا هُوَ دْمّْ الْعَهْدْ اللِّي وْصَّاكُمْ بِيهْ اللَّهْ».

²¹وْمْنْ بَعْدْ رَشّْ الدّْمْ حْتَّى عْلَى الْخِيمَة وْعْلَى ݣَاعْ الْمَّاعْنْ دْيَالْ الْعِبَادَة.

²²وْعْلَى حْسَابْ الشّْرَعْ كُلّْ حَاجَة تْقْرِيبًا كَتّْنَقَّى بْالدّْمْ، وْبْلَا مَا يْسِيلْ الدّْمْ مَا كَيْتّْغَفْرُوشْ الدّْنُوبْ.

²³إِيوَا إِلَا كَانْتْ الْأُمُورْ اللِّي كَتْرْمَزْ لْلْأُمُورْ اللِّي فْالسَّمَاوَاتْ كَتْحْتَاجْ تْتّْنَقَّى بْهَادْ الشّْكَلْ، رَاهْ الْأُمُورْ اللِّي فْالسّْمَا خَاصّْهَا تّْنَقَّى بْدْبَايْحْ حْسَنْ مْنْ هَادُو،

²⁴حِيتْ الْمَسِيحْ مَا دْخَلْشْ لْلْمُوضْعْ الْمْقَدّْسْ بْزَّافْ اللِّي صَايْبُوهْ النَّاسْ وْاللِّي كَيْشْبَهْ لْلْمُوضْعْ الْحْقِيقِي، وَلَكِنْ رَاهْ دْخَلْ لْلسّْمَا نِيتْ، وْهُوَ دَابَا وَاقْفْ قُدَّامْ اللَّهْ عْلَى وْدّْنَا.

²⁵وْمَا دْخَلْشْ بَاشْ يْقَدّْمْ رَاسُه بْزَّافْ دْ الْمَرَّاتْ، كِمَا كَيْدْخَلْ رَئِيسْ رْجَالْ الدِّينْ كُلّْ عَامْ لْلْمُوضْعْ الْمْقَدّْسْ بْزَّافْ وْكَيْدِّي مْعَاهْ الدّْمْ دْيَالْ الدّْبِيحَة،

²⁶وَإِلَّا كَانْ خَاصُّه يْتّْعَدّْبْ بْزَّافْ دْ الْمَرَّاتْ مْنْ الْوَقْتْ اللِّي خْلَقْ فِيهْ اللَّهْ الدّْنْيَا، وَلَكِنْ دَابَا فْهَادْ لِيَّامْ اللّْخْرَة، رَاهْ بَانْ مَرَّة وَحْدَة بَاشْ يْمْحِي الدّْنُوبْ مْلِّي عْطَى حْيَاتُه دْبِيحَة لْلَّهْ.

²⁷وْكِيفْ كَيْمُوتُو النَّاسْ مَرَّة وَحْدَة، وْمْنْ بَعْدْ غَيْجِي يُومْ الْحِسَابْ،

²⁸هَكَّا حْتَّى الْمَسِيحْ قَدّْمْ حْيَاتُه دْبِيحَة لْلَّهْ مَرَّة وَحْدَة بَاشْ يْمْحِي الدّْنُوبْ دْيَالْ بْزَّافْ دْ النَّاسْ، وْرَاهْ غَيْرْجَعْ مَرَّة خْرَى مَاشِي بَاشْ يْحَيّْدْ الدّْنُوبْ، وَلَكِنْ بَاشْ يْنَجِّي اللِّي كَيْتّْسْنَّاوْ الْمْجِي دْيَالُه.