Read Moroccan Standard Translation يَعْقُوبْ 1 Bible Online

يَعْقُوبْ 1 - Moroccan Standard Translation bible

يَعْقُوبْ 1

¹الْفَصْلْ اللّْوّْلْ مْنْ يَعْقُوبْ، الْعَبْدْ دْيَالْ اللَّهْ وْالرَّبّْ يَسُوعْ الْمَسِيحْ، كَنْسَلّْمْ عْلَى الْقْبَايْلْ الطّْنَاشْ اللِّي مْشَتّْتِينْ.

²فْرْحُو مْنْ كُلّْ قَلْبْكُمْ آ خُوتِي مْلِّي تْكُونُو كَتْدُوزُو فْݣَاعْ الْمْحَايْنْ،

³وْرَاكُمْ عَارْفِينْ بْلِّي وَقْتْمَا تْجَرّْبْتُو فْإِيمَانْكُمْ كَيْوَلِّي عَنْدْكُمْ الصّْبَرْ.

⁴إِيوَا خَلِّيوْ صْبَرْكُمْ يْكْمَلْ، بَاشْ تْكُونُو مْكْمُولِينْ وْمَا نَاقْصِينْ فْحْتَّى حَاجَة.

⁵وَلَكِنْ إِلَا كَانْ شِي وَاحْدْ مْنّْكُمْ نَاقْصَاهْ الْحْكْمَة، خَاصُّه يْطْلَبْهَا مْنْ اللَّهْ اللِّي كَيْعْطِي لْكُلّْ وَاحْدْ بْالسّْخَاوَة بْلَا مَا يْلُومْ حَدّْ، وْهُوَ غَيْعْطِيهَا لِيهْ.

⁶وَلَكِنْ خَاصُّه يْطْلَبْهَا بْالْإِيمَانْ بْلَا مَا يْشَكّْ، حِيتْ الْمْشْكَاكْ كَيْشْبَهْ لْلْمُوجَة دْ الْبْحَرْ اللِّي كَتّْهَزّْهَا الرِّيحْ وْكَتْقْلَبْهَا.

⁷بْحَالْ هَادَا، بْلَا مَا يْفَكّْرْ يَاخُدْ شِي حَاجَة مْنْ عَنْدْ الرَّبّْ.

⁸حِيتْ بْنَادْمْ اللِّي عَنْدُه جُوجْ دْ الْأَرَاءْ مَا كَيْبْقَاشْ تَابْتْ فْطْرْقَانُه.

⁹خَاصّْ الْخُو الْمُومْنْ الْفَقِيرْ يْفْتَخْرْ حِيتْ اللَّهْ رْفَعْ مْنْ شَانُه.

¹⁰وْاللِّي لَبَاسْ عْلِيهْ خَاصُّه يْفْتَخْرْ حِيتْ اللَّهْ رْدُّه مْتْوَاضْعْ، عْلَاحْقَّاشْ هُوَ بْحَالْ نُوَّارْ الرّْبِيعْ اللِّي مَا كَيْدُومْشْ.

¹¹حِيتْ مْلِّي كَتْشْرَقْ الشّْمْسْ الْحَارَّة، كَتْيَبّْسْ الرّْبِيعْ، وْكَيْطِيحْ النُّوَّارْ دْيَالُه وْكَيْفْنَى زِينُه. هَكَّا حْتَّى اللِّي لَبَاسْ عْلِيهْ غَيْدْبَالْ وْهُوَ مْشْغُولْ فْحْيَاتُه.

¹²سْعْدَاتْ اللِّي كَيْصْبَرْ فْالتَّجْرِبَة، عْلَاحْقَّاشْ مْلِّي يْخْرُجْ مْنّْهَا غَيَاخُدْ تَاجْ الْحَيَاةْ اللِّي وَاعْدْ بِيهْ الرَّبّْ هَادُوكْ اللِّي كَيْبْغِيوْهْ.

¹³إِلَا شِي وَاحْدْ كَيْتّْجَرّْبْ، مَا خَاصُّوشْ يْݣُولْ: «رَاهْ اللَّهْ كَيْجَرّْبْنِي»، حِيتْ اللَّهْ مَا كَيْتّْجَرّْبْشْ بْالشَّرّْ، وْهُوَ مَا كَيْجَرّْبْ حَدّْ.

¹⁴وَلَكِنْ رَاهْ كُلّْ وَاحْدْ كَيْتّْجَرّْبْ مْلِّي كَيْتّْغَرْ وْكَيْمْشِي وْرَا الشَّهْوَة دْيَالُه.

¹⁵وْالشَّهْوَة إِلَا حْمْلَاتْ كَتْوْلَدْ الدّْنُوبْ، وْالدّْنُوبْ إِلَا كْبْرُو كَيْدِّيوْ لْلْمُوتْ.

¹⁶مَا تّْخَدْعُوشْ آ خُوتِي الْعْزَازْ.

¹⁷كُلّْ هْدِيَّة مْزْيَانَة وْكُلّْ مَوْهِبَة مْكْمُولَة رَاهَا مْنْ الْفُوقْ، جَايَّانَا مْنْ عَنْدْ الْآبْ دْيَالْ النُّورْ، اللِّي مَا كَيْتّْبَدّْلْشْ وْمَا كَيْدِيرْشْ الْخْيَالْ مْلِّي كَيْتّْحَرّْكْ.

¹⁸بْالْمُرَادْ دْيَالُه وْلَدْنَا بْكْلْمَةْ الْحَقّْ بَاشْ نْكُونُو الْغْلَّة اللّْوّْلَى بِينْ الْمْخْلُوقَاتْ دْيَالُه.

¹⁹خَاصّْكُمْ تْعَرْفُو آ خُوتِي الْعْزَازْ، بْلِّي كُلّْ وَاحْدْ فِيكُمْ خَاصّْ يْكُونْ كَيْسْمَعْ دْغْيَا، وْيْكُونْ تْقِيلْ فْكْلَامُه، وْمَا كَيْتّْقَلّْقْشْ دْغْيَا.

²⁰حِيتْ بْنَادْمْ اللِّي كَيْتّْقَلّْقْ مَا كَيْرْضِيشْ اللَّهْ.

²¹عْلَى هَادْشِّي رْمِيوْ عْلِيكُمْ كُلّْ حَاجَة مْنْجُوسَة وْكْتْرَةْ الشَّرّْ، وْقْبْلُو بْالتَّوَاضُعْ الْكْلَامْ اللِّي زْرْعُه اللَّهْ فِيكُمْ، رَاهْ هَادْ الْكْلَامْ هُوَ اللِّي قَادْرْ يْنَجِّي حْيَاتْكُمْ.

²²دِيرُو بْكْلَامْ اللَّهْ مَاشِي غِيرْ تْسَمْعُوهْ، وْلَا رَاهْ غَتْكُونُو كَتْخَدْعُو رَاسْكُمْ.

²³عْلَاحْقَّاشْ اللِّي كَيْسْمَعْ كْلَامْ اللَّهْ وْمَا كَيْدِيرْشْ بِيهْ، كَيْشْبَهْ لْشِي وَاحْدْ كَيْشُوفْ فْالْمْرَايَة وْجْهُه اللِّي بِيهْ تّْوْلَدْ،

²⁴وْغِيرْ كَيْشُوفْ رَاسُه وْكَيْمْشِي، كَيْنْسَى شَكْلُه كِيفْ دَايْرْ.

²⁵وَلَكِنْ اللِّي كَيْشُوفْ مْزْيَانْ فْالشّْرَعْ الْمْكْمُولْ اللِّي هُوَ شْرَعْ الْحُرِّيَّة، وْمَاشِي غِيرْ كَيْسَمْعُه وْمْنْ بَعْدْ كَيْنْسَاهْ وَلَكِنْ كَيْتْبَتْ فِيهْ وْكَيْدِيرْ بِيهْ، غَيْبَارْكُه اللَّهْ فْݣَاعْ دَاكْشِّي اللِّي كَيْدِيرْ.

²⁶إِلَا كَانْ شِي وَاحْدْ كَيْشُوفْ رَاسُه مْتْدَيّْنْ، وْهُوَ مَا كَيْتّْحَكّْمْشْ فْلْسَانُه، رَاهْ كَيْخْدَعْ رَاسُه، وْالدِّينْ دْيَالُه بَاطْلْ.

²⁷رَاهْ الدِّينْ الصّْحِيحْ وْالنّْقِي عَنْدْ اللَّهْ الْآبْ هُوَ يْتّْهَلَّى الْوَاحْدْ فْالْيَتَامَى وْالْهْجَّالَاتْ اللِّي عَايْشِينْ فْالْمْحْنَة، وْيْحْفَضْ رَاسُه مْنْ وْسَخْ الدّْنْيَا.