Read Moroccan Standard Translation يَعْقُوبْ 2 Bible Online

يَعْقُوبْ 2 - Moroccan Standard Translation bible

يَعْقُوبْ 2

¹الْفَصْلْ التَّانِي آ خُوتِي، حِيتْ نْتُمَ كَتْآمْنُو بْرَبّْنَا يَسُوعْ الْمَسِيحْ مُولْ الْعَزّْ، مَا خَاصّْكُمْشْ تْدِيرُو الْوْجْهِيَّاتْ.

²حِيتْ إِلَا دْخَلْ شِي رَاجْلْ لْلْإِجْتِمَاعْ دْيَالْكُمْ وْهُوَ دَايْرْ الْخْوَاتْمْ دْيَالْ الدّْهَبْ وْلَابْسْ الْحْوَايْجْ الرّْفَاعْ، وْدْخَلْ وَاحْدْ آخُرْ مَا فْحَالُوشْ لَابْسْ حْوَايْجْ مْقَطّْعِينْ،

³وْدِّيتُوهَا فْهَادَاكْ اللِّي لَابْسْ الْحْوَايْجْ الرّْفَاعْ، وْݣْلْتُو لِيهْ: «ݣْلَسْ هْنَا فْهَادْ الْمُوضْعْ الْمْزْيَانْ». وْݣْلْتُو لْلِّي مَا فْحَالُوشْ: «وْقَفْ نْتَ تْمَّ» وْلَا: «ݣْلَسْ حْدَا رْجْلِيَّ».

⁴وَاشْ مَا غَتْكُونُوشْ كَتْدِيرُو الْوْجْهِيَّاتْ بِينَاتْكُمْ، وْوْلِّيتُو كَتْحَكْمُو بْأَفْكَارْ الشَّرّْ؟

⁵سْمْعُو آ خُوتِي الْعْزَازْ: وَاشْ اللَّهْ مَا خْتَارْشْ الْفُقَرَا دْيَالْ هَادْ الدّْنْيَا بَاشْ يْكُونُو أَغْنِيَا فْالْإِيمَانْ، وْيْوَرْتُو مَمْلَكَةْ اللَّهْ اللِّي وَاعْدْ بِيهَا هَادُوكْ اللِّي كَيْبْغِيوْهْ؟

⁶وَلَكِنْ نْتُمَ طِيّْحْتُو مْنْ قِيمْةْ الْفُقَرَا. وَاشْ مَاشِي الْأَغْنِيَا هُمَ اللِّي كَيْضَلْمُوكُمْ وْكَيْجَرُّوكُمْ لْلْمَحَاكِمْ؟

⁷وَاشْ مَاشِي هُمَ اللِّي كَيْݣُولُو كْلَامْ الْكُفْرْ عْلَى الْإِسْمْ الْمْزْيَانْ اللِّي تّْسْمِّيتُو بِيهْ؟

⁸إِلَا كَتْدِيرُو بْالْوْصِيَّة الْمُهِمَّة فْالشّْرَعْ، اللِّي مْدْكُورَة فْكْتَابْ اللَّهْ وْاللِّي كَتْݣُولْ: «خَاصّْكْ تْبْغِي اللِّي قْرِيبْ لِيكْ كِيفْ كَتْبْغِي رَاسْكْ»، رَاكُمْ كَتْدِيرُو شِي حَاجَة مْزْيَانَة.

⁹وَلَكِنْ إِلَا كْنْتُو كَتْدِيرُو الْوْجْهِيَّاتْ رَاكُمْ كَتْدَنْبُو، وْالشّْرَعْ كَيْحْكَمْ عْلِيكُمْ حِيتْ مَا كَتْدِيرُوشْ بِيهْ.

¹⁰عْلَاحْقَّاشْ اللِّي دَارْ بْشْرَعْ مُوسَى كُلُّه وْغْلَطْ غِيرْ فْوْصِيَّة وَحْدَة، رَاهْ دْنَبْ فْحَقّْ الشّْرَعْ كُلُّه.

¹¹حِيتْ اللِّي ݣَالْ: «مَا تْفْسَدْشْ»، ݣَالْ عَاوْتَانِي: «مَا تْقْتَلْشْ»، وْإِلَا مَا فْسَدْتِيشْ وَلَكِنْ قْتَلْتِي، رَاكْ مَا دْرْتِيشْ بْالشّْرَعْ.

¹²إِيوَا تّْكَلّْمُو وْتّْعَامْلُو بْحَالْ النَّاسْ اللِّي غَيْحَاكْمْهُمْ اللَّهْ بْالشّْرَعْ دْ الْحُرِّيَّة.

¹³حِيتْ الْحُكْمْ مَا كَيْرْحَمْشْ اللِّي مَا فِيهُمْشْ الرَّحْمَة، وَلَكِنْ الرَّحْمَة كَتْغْلَبْ الْحُكْمْ.

¹⁴آشْ مْنْ فَايْدَة آ خُوتِي إِلَا ݣَالْ شِي وَاحْدْ بْلِّي عَنْدُه الْإِيمَانْ، وَلَكِنْ مَا عَنْدُوشْ الْأَعْمَالْ، وَاشْ بْحَالْ هَادْ الْإِيمَانْ يْقْدَرْ يْنَجِّيهْ؟

¹⁵وْإِلَا كَانْ شِي خُو وْلَا أُخْتْ مَا عَنْدْهُمْ مَا يْلَبْسُو وْمَا عَنْدْهُمْ مَا يَاكْلُو،

¹⁶وْݣَالْ لِيهُمْ شِي وَاحْدْ فِيكُمْ: «سِيرُو اللَّهْ يْسَهّْلْ عْلِيكُمْ، لْبْسُو حْوَايْجْ سْخَانْ وْكُولُو مْزْيَانْ»، وَلَكِنْ مَا عْطِيتُوهُمْشْ دَاكْشِّي اللِّي كَيْحْتَاجُوهْ، آشْ مْنْ فَايْدَة فْهَادْشِّي؟

¹⁷وْهَكَّا، حْتَّى الْإِيمَانْ إِلَا كَانْ بُوحْدُه بْلَا أَعْمَالْ، رَاهْ مْيّْتْ.

¹⁸وَلَكِنْ يْقْدَرْ شِي وَاحْدْ يْݣُولْ: «نْتَ عَنْدْكْ الْإِيمَانْ وْأَنَا عَنْدِي الْأَعْمَالْ» غَنْݣُولْ لِيهْ: «وْرِّينِي الْإِيمَانْ دْيَالْكْ بْلَا أَعْمَالْ وْأَنَا غَنْوَرِّيكْ الْإِيمَانْ دْيَالِي بْالْأَعْمَالْ دْيَالِي».

¹⁹نْتَ كَتْآمْنْ بْلِّي اللَّهْ وَاحْدْ، هَادْشِّي مْزْيَانْ. رَاهْ حْتَّى الشَّيَاطِينْ كَيْآمْنُو بِيهْ وْكَيْتّْرَعّْدُو بْالْخُوفْ!

²⁰وَلَكِنْ وَاشْ بْغِيتِي تْعْرَفْ آ قْلِيلْ الْفْهَامَة بْلِّي الْإِيمَانْ بْلَا أَعْمَالْ مْيّْتْ؟

²¹وَاشْ مَاشِي بْالْأَعْمَالْ وْلَّى بُونَا إِبْرَاهِيمْ مْتَّاقِي اللَّهْ مْلِّي قَدّْمْ وَلْدُه إِسْحَاقْ عْلَى الْمَدْبَحْ؟

²²إِيوَا شْفْتِي بْلِّي الْإِيمَانْ دْيَالُه كَانْ مْعَ أَعْمَالُه، وْبْلِّي بْالْأَعْمَالْ كْمَلْ الْإِيمَانْ،

²³وْهَكَّا كْمَلْ دَاكْشِّي اللِّي جَا فْالْكْتَابْ: «آمْنْ إِبْرَاهِيمْ بْاللَّهْ وْحْسْبُه اللَّهْ مْتَّاقِي عْلَى قْبَلْ الْإِيمَانْ دْيَالُه»، وْهَادْشِّي عْلَاشْ تّْسَمَّى خَلِيلْ اللَّهْ.

²⁴هَا نْتُمَ شْفْتُو كِيفَاشْ بْالْأَعْمَالْ كَيْوَلِّي بْنَادْمْ مْتَّاقِي اللَّهْ، مَاشِي غِيرْ بْالْإِيمَانْ بُوحْدُه.

²⁵وْحْتَّى رَاحَابْ الْمْرَاة الْفَاسْدَة، وَاشْ مَا وْلَّاتْشْ مْتَّاقْيَة اللَّهْ بْالْأَعْمَالْ مْلِّي رَحّْبَاتْ بْالرُّسُلْ وْهَرّْبَاتْهُمْ مْنْ طْرِيقْ خْرَى؟

²⁶حِيتْ كِمَا الدَّاتْ بْلَا رُوحْ رَاهَا مْيّْتَة، هَكَّا حْتَّى الْإِيمَانْ بْلَا الْأَعْمَالْ رَاهْ مْيّْتْ.