Read Moroccan Standard Translation يَعْقُوبْ 3 Bible Online

يَعْقُوبْ 3 - Moroccan Standard Translation bible

يَعْقُوبْ 3

¹الْفَصْلْ التَّالْتْ آ خُوتِي، مَا خَاصّْكُمْشْ تْكُونُو كُلّْكُمْ مُعَلِّمِينْ، رَاكُمْ كَتْعَرْفُو بْلِّي حْنَا الْمُعَلِّمِينْ غَنْتّْحَاكْمُو بْحْكَامْ صْعَبْ مْنْ النَّاسْ لْخْرِينْ.

²حِيتْ كُلّْنَا كَنْغَلْطُو فْأُمُورْ كْتِيرَة. إِلَا شِي وَاحْدْ مَا كَيْغْلَطْشْ فْكْلَامُه، رَاهْ هُوَ رَاجْلْ مْكْمُولْ وْقَادْرْ يْتّْحَكّْمْ فْدَاتُه كُلّْهَا.

³إِلَا دْرْنَا اللّْجَامْ فْفُمّْ الْخِيلْ بَاشْ تْطِيعْنَا، رَاهْ كَنْوَجّْهُوهَا كِمَا بْغِينَا.

⁴شُوفُو السّْفِينَة، وَاخَّا هِيَ كْبِيرَة وْكَتْدْفَعْهَا رِيحْ قْوِيَّة، رَاهْ غِيرْ بْدْفَّة صْغِيرَة بْزَّافْ كَيْوَجّْهْهَا هَادَاكْ اللِّي كَيْسُوݣْهَا فِينْ مَا بْغَا.

⁵هَكَّا حْتَّى اللّْسَانْ، هُوَ غِيرْ طَرْفْ صْغِيرْ فْالدَّاتْ، وَلَكِنْ كَيْفْتَخْرْ بْبْزَّافْ دْ الْحْوَايْجْ. شُوفُو كِيفَاشْ شْعْلَة دْ الْعَافْيَة صْغِيرَة كَتْحْرَقْ غَابَة كْبِيرَة.

⁶وْاللّْسَانْ عَافْيَة! مْجْمُوعْ فِيهْ ݣَاعْ الشَّرّْ، هُوَ طَرْفْ فْالدَّاتْ دْيَالْنَا كَيْنَجّْسْهَا كُلّْهَا، وْكَيْحْرَقْ الدّْنْيَا كُلّْهَا بْالْعَافْيَة اللِّي كَتْجِي مْنْ نَارْ جَهْنَّمْ.

⁷رَاهْ بْنَادْمْ قَادْرْ يْتّْحَكّْمْ فْݣَاعْ نْوَاعْ الْوْحُوشْ وْالطّْيُورْ وْالْحَيَوَانَاتْ اللِّي كَيْزْحْفُو وْالْمْخْلُوقَاتْ اللِّي فْالْبْحَرْ، وْرَاهْ دَاكْشِّي اللِّي دَارْ.

⁸وَلَكِنْ اللّْسَانْ، حْتَّى وَاحْدْ مَا يْقْدَرْ يْتّْحَكّْمْ فِيهْ. هُوَ شَرّْ مَا كَيْغَلْبُو حَدّْ، وْعَامْرْ بْالسّْمْ اللِّي كَيْقْتَلْ.

⁹بِيهْ كَنْشَكْرُو الرَّبّْ وْالْآبْ، وْبِيهْ كَنْلَعْنُو النَّاسْ اللِّي خْلَقْهُمْ اللَّهْ عْلَى صُورْتُه.

¹⁰مْنْ فُمّْ وَاحْدْ كَيْخْرُجْ الْكْلَامْ اللِّي كَيْبَارْكْ وْالْكْلَامْ اللِّي كَيْلْعَنْ! وْهَادْشِّي آ خُوتِي، مَا خَاصُّوشْ يْكُونْ!

¹¹وَاشْ مْنْ عِينْ وَحْدَة يْقْدَرْ يْخْرَجْ الْمَا الْحْلُو وْالْمَالْحْ؟

¹²وَاشْ آ خُوتِي، الْكَرْمَة تْقْدَرْ تْعْطِي الزِّيتُونْ، وْلَا الدَّالْيَة تْعْطِي الْكَرْمُوسْ؟ هَكَّا حْتَّى الْعِينْ الْمَالْحَة مَا كَتْعْطِيشْ الْمَا الْحْلُو!

¹³شْكُونْ فِيكُمْ اللِّي حْكِيمْ وْفَاهْمْ؟ إِيوَا رَاهْ خَاصُّه يْبَيّْنْ بْالْمُعَامَلَة دْيَالُه الْمْزْيَانَة أَعْمَالُه اللِّي كَيْدِيرْهُمْ بْالتَّوَاضُعْ اللِّي فْالْحْكْمَة.

¹⁴وَلَكِنْ إِلَا كَانْ قَلْبْكُمْ عَامْرْ بْالْغِيرَة الْقْوِيَّة وْالْأَنَانِيَّة، مَا تْفْتَخْرُوشْ وْمَا تْكَدْبُوشْ عْلَى الْحَقّْ.

¹⁵هَادْ الْحْكْمَة مَا نْزْلَاتْشْ مْنْ السّْمَا، وَلَكِنْ هِيَ مْنْ الْأَرْضْ وْمْنْ بْنَادْمْ وْمْنْ الشِّيطَانْ.

¹⁶حِيتْ فِينْ مَا كَتْكُونْ الْغِيرَة وْالْأَنَانِيَّة، كَتْكُونْ الْفُوضَى وْݣَاعْ فْعَايْلْ الشَّرّْ.

¹⁷وَلَكِنْ الْحْكْمَة اللِّي مْنْ عَنْدْ اللَّهْ رَاهَا فْاللّْوّْلْ نْقِيَّة، وْفِيهَا الْهْنَا، وْالتَّوَاضُعْ، وْالْمُسَامَحَة، وْعَامْرَة بْالرَّحْمَة، وْبْأَعْمَالْ الْخِيرْ، وْمَا فِيهَا لَا وْجْهِيَّاتْ وَلَا نِفَاقْ.

¹⁸وْالْغْلَّة دْيَالْ التَّقْوَى كَتّْزْرَعْ فْالْهْنَا بْهَادُوكْ اللِّي كَيْدِيرُو الْهْنَا.