Read Moroccan Standard Translation يَعْقُوبْ 5 Bible Online

يَعْقُوبْ 5 - Moroccan Standard Translation bible

يَعْقُوبْ 5

¹الْفَصْلْ الْخَامْسْ وْدَابَا نْتُمَ آ الْأَغْنِيَا، بْكِيوْ وْنْوّْحُو عْلَى الْمْصَايْبْ اللِّي غَيْنَزْلُو عْلِيكُمْ.

²رَاهْ الْكَنْزْ دْيَالْكُمْ فْسَدْ، وْلْبَاسْكُمْ كْلَاتُه التُّونْيَا.

³الدّْهَبْ وْالْفْضَّة دْيَالْكُمْ صْدَّاوْ، وْهَادْ الصّْدَا غَادِي يْشْهَدْ ضَدّْكُمْ وْغَيَاكُلْ لْحَمْكُمْ بْحَالْ الْعَافْيَة! رَاكُمْ كَتْجَمْعُو الْكَنْزْ فْلِيَّامْ اللّْخْرَة.

⁴هَا هِيَ الْأُجْرَة اللِّي دِّيتُوهَا لْلْحْصَّادَا اللِّي حْصْدُو فْدَادْنْكُمْ كَتْغَوّْتْ، وْغْوَاتْ الْحْصَّادَا سْمْعُه الرَّبّْ الْقَادْرْ عْلَى كُلّْشِي.

⁵رَاكُمْ عْشْتُو فْالرَّفَاهِيَّة وْتّْمَتّْعُو فْهَادْ الدّْنْيَا، وْعَلّْفْتُو رَاسْكُمْ بْحَالْ إِلَا كَتّْوَجّْدُوهْ لْنْهَارْ الدّْبِيحَة.

⁶وْحْكَمْتُو عْلَى رَاجْلْ مْتَّاقِي اللَّهْ وْقْتَلْتُوهْ، وْهُوَ مَا قَاوْمْكُومْشْ!

⁷إِيوَا صْبْرُو آ خُوتِي حْتَّى يْرْجَعْ الرَّبّْ. شُوفُو الْفْلَّاحْ كِيفَاشْ كَيْتّْسَنَّى الْغْلَّة الْمْزْيَانَة دْ الْأَرْضْ دْيَالُه، كَيْصْبَرْ عْلِيهَا حْتَّى تْطِيحْ الشّْتَا الْبْكْرِيَّة وْالْمَازُوزِيَّة.

⁸إِيوَا صْبْرُو حْتَّى نْتُمَ وْتّْشَجّْعُو، عْلَاحْقَّاشْ الرَّبّْ قْرِيبْ يْرْجَعْ.

⁹مَا تْلُومُوشْ بْعْضِيَّاتْكُمْ آ الْخُوتْ، بَاشْ مَا يْحَاسْبْكُمْشْ اللَّهْ. رَاهْ هَادَاكْ اللِّي كَيْحْكَمْ وَاقْفْ قُدَّامْ الْبَابْ.

¹⁰كُونُو آ خُوتِي بْحَالْ الْأَنْبِيَا اللِّي تّْكَلّْمُو بْإِسْمْ الرَّبّْ وْتّْعَدّْبُو وْصْبْرُو.

¹¹هَا حْنَا كَنْݣُولُو لْهَادُوكْ اللِّي صْبْرُو سْعْدَاتْكُمْ. وْرَاكُمْ سْمَعْتُو عْلَى صْبَرْ أَيُّوبْ، وْشْفْتُو آشْ دَارْ مْعَاهْ الرَّبّْ فْاللّْخْرْ، حِيتْ الرَّبّْ كَيْرْحَمْ بْزَّافْ وْكَيْحَنّْ.

¹²قْبَلْ مْنْ كُلّْشِي آ خُوتِي، مَا تْحَلْفُوشْ، لَا بْالسّْمَا وْلَا بْالْأَرْضْ وْلَا حْتَّى بْشِي حَاجَة خْرَى. وَلَكِنْ خَاصّْ كْلَامْكُمْ يْكُونْ إِيِّهْ إِلَا كَانْ إِيِّهْ، وْلَّا إِلَا كَانْ لَّا، بَاشْ مَا يْحَاكْمْكُمْشْ اللَّهْ.

¹³إِلَا كَانْ شِي وَاحْدْ مْنّْكُمْ فْالْمْحْنَة خَاصُّه يْصَلِّي، وْإِلَا كَانْ شِي وَاحْدْ مْنّْكُمْ فْرْحَانْ خَاصُّه يْسَبّْحْ الرَّبّْ.

¹⁴إِلَا كَانْ شِي وَاحْدْ مْنّْكُمْ مْرِيضْ، خَاصُّه يْعَيّْطْ عْلَى الْمْسْؤُولِينْ دْ الْكْنِيسَة بَاشْ يْصَلِّيوْ مْنْ جِيهْتُه وْيْدَهْنُوهْ بْالزِّيتْ بْإِسْمْ الرَّبّْ.

¹⁵وْالصّْلَاة بْالْإِيمَانْ غَتْشَافِي الْمْرِيضْ، وْالرَّبّْ غَيْشَافِيهْ، وْإِلَا كَانْ دَارْ شِي دَنْبْ رَاهْ غَيْتّْغْفَرْ لِيهْ.

¹⁶عْتَرْفُو لْبَعْضِيَّاتْكُمْ بْدْنُوبْكُمْ وْصَلِّيوْ لْبَعْضِيَّاتْكُمْ بَاشْ تّْشَافَاوْ. رَاهْ صْلَاةْ الْمُومْنْ اللِّي مْتَّاقِي اللَّهْ قْوِيَّة بْزَّافْ وْكَتّْسْتَاجْبْ.

¹⁷كَانْ إِيلِيَّا بْنَادْمْ بْحَالْنَا، وْصْلَّى بْقُوَّة بَاشْ مَا تّْصَبّْشْ الشّْتَا، وْمَا صْبَّاتْشْ عْلَى الْأَرْضْ لْمُدَّةْ تْلْتْ سْنِينْ وْسْتّْ شْهُورْ.

¹⁸وْصْلَّى عَاوْتَانِي، وْصْبَّاتْ الشّْتَا مْنْ السّْمَا وْعْطَاتْ الْأَرْضْ غَلّْتْهَا.

¹⁹آ خُوتِي، إِلَا شِي وَاحْدْ مْنّْكُمْ بَعّْدْ عْلَى الْحَقّْ وْرَدُّه شِي وَاحْدْ آخُرْ،

²⁰رَاهْ خَاصّْكُمْ تْعَرْفُو بْلِّي هَادَاكْ اللِّي رَدّْ الْمُدْنِبْ مْنْ الطّْرِيقْ اللِّي مْشَى فِيهَا، غَيْنَجِّي حَيَاةْ الْمُدْنِبْ مْنْ الْمُوتْ وْغَيْسْتَرْ بْزَّافْ دْيَالْ الدّْنُوبْ.