Read Moroccan Standard Translation بُطْرُسْ اللّْوّْلَى 1 Bible Online

بُطْرُسْ اللّْوّْلَى 1 - Moroccan Standard Translation bible

بُطْرُسْ اللّْوّْلَى 1

¹الْفَصْلْ اللّْوّْلْ أَنَا بُطْرُسْ، رَسُولْ يَسُوعْ الْمَسِيحْ، كَنْكْتَبْ لْلنَّاسْ اللِّي عَايْشِينْ فْالْغُرْبَة وْاللِّي مْشَتّْتِينْ فْبُنْتُسْ وْغَلَاطِيَّة وْكَبَّدُوكِيَّة وْآسْيَا وْبِيتِينِيَّة، وْاللِّي تّْخْتَارُو

²عْلَى حْسَابْ الْخُطَّة دْيَالْ اللَّهْ الْآبْ اللِّي وَجّْدْهَا مْنْ قْبَلْ، وْتّْقَدّْسُو بْالرُّوحْ دْيَالُه، بَاشْ يْطِيعُو يَسُوعْ الْمَسِيحْ، وْيْتّْرْشُو بْالدّْمْ دْيَالُه. كَنْطْلَبْ مْنْ اللَّهْ بَاشْ يْكَتّْرْ لِيكُمْ النِّعْمَة وْالْهْنَا!

³يْتْبَارْكْ اللَّهْ بُو رَبّْنَا يَسُوعْ الْمَسِيحْ، اللِّي بْرْحَمْتُه الْكْبِيرَة وْلَدْنَا مْنْ جْدِيدْ لْوَاحْدْ الرّْجَا حَيّْ مْلِّي بْعَتْ يَسُوعْ الْمَسِيحْ مْنْ الْمُوتْ،

⁴وْلْوَاحْدْ الْوَرْتْ عَمّْرُه مَا غَيْفْنَى وَلَا يْفْسَدْ وَلَا يْدْبَالْ، مْخَبِّيهْ لِيكُمْ اللَّهْ فْالسّْمَا،

⁵نْتُمَ اللِّي مْحْضِيِّينْ بْقُوَّةْ اللَّهْ بْالْإِيمَانْ، لْلنّْجَا اللِّي مُوجُودْ يْبَانْ فْاللّْخْرْ دْيَالْ الزّْمَانْ.

⁶رَاكُمْ كَتْفَرْحُو بِيهْ، وَاخَّا دَابَا لَابْدّْ مَا تْحَزْنُو شِي وَقْتْ قْلِيلْ بْسْبَابْ ݣَاعْ نْوَاعْ التَّجْرِبَاتْ،

⁷بَاشْ يْبَانْ إِيمَانْكُمْ الْحْقِيقِي. وْرَاهْ كِمَا كَتْصَفِّي الْعَافْيَة الدّْهَبْ، هَكَّا حْتَّى إِيمَانْكُمْ اللِّي غْلَى بْزَّافْ مْنْ الدّْهَبْ كَيْتّْجَرّْبْ. وْبْسْبَابْ الْإِيمَانْ غَتْرَبْحُو الشُّكْرْ وْالْعَزّْ وْالْكَرَامَة مْلِّي غَيْرْجَعْ يَسُوعْ الْمَسِيحْ،

⁸اللِّي كَتْبْغِيوْهْ وَاخَّا مَا شْفْتُوهْشْ، وْكَتْآمْنُو بِيهْ وَاخَّا مَا كَتْشُوفُوهْشْ دَابَا، دَاكْشِّي عْلَاشْ رَاكُمْ فْرْحَانِينْ فَرْحَة كْبِيرَة مَا كَتّْوْصَفْشْ،

⁹حِيتْ وْصَلْتُو لْلْغَرَضْ دْ إِيمَانْكُمْ، اللِّي هُوَ النّْجَا دْيَالْ نْفُوسْكُمْ.

¹⁰هَادْ النّْجَا هُوَ اللِّي قَلّْبُو وْفَتّْشُو عْلِيهْ الْأَنْبِيَا، اللِّي تّْنَبّْأُو عْلَى النِّعْمَة اللِّي تّْعْطَاتْكُمْ،

¹¹وْقَلّْبُو بَاشْ يْعَرْفُو الْوَقْتْ وْالْحَالَة اللِّي نَبّْهْهُمْ لِيهَا رُوحْ الْمَسِيحْ اللِّي فِيهُمْ، مْلِّي شْهَدْ لِيهُمْ مْنْ قْبَلْ عْلَى الْعْدَابْ اللِّي كَيْتّْسَنَّى الْمَسِيحْ وْالْعَزّْ اللِّي غَيْكُونْ مْنْ بَعْدْ.

¹²وْبَانْ لِيهُمْ بْلِّي هَادْ الْأُمُورْ مَاشِي لِيهُمْ، وَلَكِنْ تّْعْطَاتْ لِيكُمْ نْتُمَ، وْدَابَا رَاهْ خَبّْرُوكُمْ بِيهَا النَّاسْ اللِّي كَيْخَبّْرُو بْالْإِنْجِيلْ بْقُوَّةْ الرُّوحْ الْقُدُسْ اللِّي جَا مْنْ السّْمَا، وْرَاهْ حْتَّى الْمَلَايْكَة بْغَاوْ يْعَرْفُو هَادْ الْأُمُورْ كْتَرْ.

¹³عْلَى هَادْشِّي كُونُو عْلَى بَالْ وْكُونُو مْوَݣّْضِينْ، وْدِيرُو رْجَاكُمْ كُلُّه فْالنِّعْمَة اللِّي غَتّْعْطَاكُمْ مْلِّي غَيْرْجَعْ يَسُوعْ الْمَسِيحْ.

¹⁴كُونُو طَايْعِينْ بْحَالْ الدّْرَارِي الصّْغَارْ وْمَا تّْبْعُوشْ الشَّهَوَاتْ اللِّي كَانُو عَنْدْكُمْ مْنْ زْمَانْ قْبَلْ مَا تْعَرْفُو الْمَسِيحْ،

¹⁵وَلَكِنْ كُونُو حْتَّى نْتُمَ مْقَدّْسِينْ فْكُلّْ حَاجَة كَتْدِيرُوهَا بْحَالْ الْقُدُّوسْ اللِّي عَيّْطْ لِيكُمْ.

¹⁶عْلَاحْقَّاشْ كْتَابْ اللَّهْ كَيْݣُولْ: «كُونُو مْقَدّْسِينْ حِيتْ أَنَا قُدُّوسْ».

¹⁷وْإِلَا كْنْتُو كَتْݣُولُو لْلَّهْ بُونَا، وْهُوَ اللِّي كَيْحْكَمْ عْلَى كُلّْ وَاحْدْ عْلَى حْسَابْ الْأَعْمَالْ بْلَا مَا يْتْحَيّْزْ لْحَدّْ، إِيوَا عِيشُو حْيَاتْكُمْ فْالْخُوفْ دْيَالُه فْهَادْ الدّْنْيَا بْحَالْ الْبْرَّانِيِّينْ،

¹⁸وْخَاصّْكُمْ تْكُونُو عَارْفِينْ بْلِّي رَاكُمْ تّْفْدِيتُو مَاشِي عْلَى وْدّْ حْيَاتْكُمْ الْقْدِيمَة، اللِّي وْرَتُّوهَا مْنْ جْدُودْكُمْ بْالْحَاجَاتْ اللِّي مَا عَنْدْهَا قِيمَة بْحَالْ الْفْضَّة وْالدّْهَبْ،

¹⁹وَلَكِنْ بْالدّْمْ الْغَالِي، بْحَالْ دْمّْ الْخْرُوفْ اللِّي مَا فِيهْ لَا عِيبْ وَلَا لُومْ، دْمّْ الْمَسِيحْ،

²⁰اللِّي خْتَارُه اللَّهْ مْنْ قْبَلْ مَا تّْخْلَقْ الدّْنْيَا، وْبَانْ عْلَى وْدّْكُمْ فْهَادْ لِيَّامْ اللّْخْرَة.

²¹وْرَاكُمْ بِيهْ كَتْآمْنُو بْاللَّهْ اللِّي بَعْتُه مْنْ بِينْ الْمُوتَى وْعْطَاهْ الْعَزّْ، وْهَكَّا وْلَّى إِيمَانْكُمْ وْرْجَاكُمْ فْاللَّهْ.

²²وْمْلِّي طْعْتُو الْحَقّْ، نْقِّيتُو نْفُوسْكُمْ وْوْلَّاتْ عَنْدْكُمْ مْحَبَّةْ الْخُوتْ اللِّي مَا فِيهَا نِفَاقْ، إِيوَا بْغِيوْ بْعْضِيَّاتْكُمْ بْمْحَبَّة قْوِيَّة مْنْ كُلّْ قَلْبْكُمْ.

²³رَاكُمْ تّْوْلَدْتُو مْنْ جْدِيدْ مَاشِي مْنْ زْرِّيعَة كَتْفْنَى، وَلَكِنْ مْنْ زْرِّيعَة مَا كَتْفْنَاشْ، هِيَ كْلْمَةْ اللَّهْ الْحَيَّة اللِّي كَتْبْقَى عْلَى الدّْوَامْ.

²⁴عْلَاحْقَّاشْ كْتَابْ اللَّهْ كَيْݣُولْ: «النَّاسْ كُلّْهُمْ بْحَالْ الرّْبِيعْ وْالْعَزّْ دْيَالْهُمْ بْحَالْ نُوَّارْ الرّْبِيعْ. الرّْبِيعْ كَيْيْبَسْ وْالنُّوَارْ دْيَالُه كَيْطِيحْ،

²⁵وَلَكِنْ كْلْمَةْ الرَّبّْ كَتْبْقَى تَابْتَة عْلَى الدّْوَامْ». وْهَادْ الْكْلْمَة هِيَ الْإِنْجِيلْ اللِّي تْخَبّْرْتُو بِيهْ.