Read Moroccan Standard Translation بُطْرُسْ اللّْوّْلَى 2 Bible Online

بُطْرُسْ اللّْوّْلَى 2 - Moroccan Standard Translation bible

بُطْرُسْ اللّْوّْلَى 2

¹الْفَصْلْ التَّانِي إِيوَا رْمِيوْ عْلِيكُمْ ݣَاعْ الْخُبْتْ وْݣَاعْ الْخْدِيعَة وْالنِّفَاقْ وْالْحْسَدْ وْالْهَضْرَة فْالنَّاسْ،

²وْبْحَالْ الدّْرَارِي اللِّي عَادْ تّْزَادُو، تّْشْهَّاوْ الْحْلِيبْ الرُّوحِي الصَّافِي بَاشْ تْكَبْرُو بِيهْ وْتْنْجَاوْ،

³إِلَا كْنْتُو دْقْتُو شْحَالْ الرَّبّْ مْزْيَانْ.

⁴قَرّْبُو لْعَنْدُه، رَاهْ هُوَ الْحَجْرَة الْحَيَّة اللِّي مَا بْغَاوْهَاشْ النَّاسْ، وَلَكِنْ خْتَارْهَا اللَّهْ وْهِيَ غَالْيَة عَنْدُه.

⁵إِيوَا كُونُو حْتَّى نْتُمَ بْحَالْ الْحْجَرْ الْحَيّْ اللِّي غَيْتّْبْنَى بِيهْ بِيتْ اللَّهْ الرُّوحِي، وْكُونُو رْجَالْ الدِّينْ مْقَدّْسِينْ بَاشْ تْقَدّْمُو دْبَايْحْ رُوحِيَّة مْقْبُولَة عَنْدْ اللَّهْ بْيَسُوعْ الْمَسِيحْ.

⁶وْكِيفْ مْكْتُوبْ فْكْتَابْ اللَّهْ: «هَانِي كَنْحَطّْ فْصِهْيَوْنْ الْحَجْرَة دْيَالْ السَّاسْ الْغَالْيَة اللِّي خْتَارِيتْهَا، وْكُلّْ مْنْ تَاقْ فِيهَا عَمّْرُه مَا غَيْنْدَمْ».

⁷وْهَادْ الْحَجْرَة رَاهَا غَالْيَة عَنْدْكُمْ نْتُمَ اللِّي كَتْآمْنُو، وَلَكِنْ عَنْدْ اللِّي مَا كَيْآمْنُوشْ، «رَاهْ الْحَجْرَة اللِّي مَا بْغَاوْهَاشْ الْبْنَّايَا، هِيَ اللِّي وْلَّاتْ حَجْرَةْ السَّاسْ».

⁸وْمْكْتُوبْ عَاوْتَانِي فْكْتَابْ اللَّهْ: «هِيَ الْحَجْرَة دْ الْعَتْرَة، وْالصَّخْرَة اللِّي كَتْطِيّْحْ». وْحِيتْ هَادْ النَّاسْ مَا طَاعُوشْ كْلَامْ اللَّهْ، هَادْشِّي اللِّي غَيْجْرَا لِيهُمْ.

⁹وَلَكِنْ نْتُمَ رَاكُمْ سُلَالَة خْتَارْهَا اللَّهْ، وْجْمَاعَة مَلَكِيَّة دْ رْجَالْ الدِّينْ، وْأُمَّة مْقَدّْسَة، وْشَعْبْ دْيَالْ اللَّهْ، خْتَارْكُمْ بَاشْ تْخَبّْرُو بْالْأَعْمَالْ الْعْظِيمَة، دْيَالْ هَادَاكْ اللِّي خَرّْجْكُمْ مْنْ الضّْلَامْ لْلنُّورْ دْيَالُه الْعْجِيبْ.

¹⁰نْتُمَ مَا كْنْتُوشْ مْنْ قْبَلْ شَعْبْ اللَّهْ، وَلَكِنْ دَابَا وْلِّيتُو شَعْبْ دْيَالُه. وْمَا كَانْتْشْ عَنْدْكُمْ الرَّحْمَة دْيَالُه، وَلَكِنْ دَابَا وْلَّاتْ عَنْدْكُمْ.

¹¹آ خُوتِي الْعْزَازْ، كَنْطْلَبْ مْنّْكُمْ نْتُمَ اللِّي بْرَّانِيِّينْ وْضْيَافْ فْهَادْ الدّْنْيَا، بَاشْ تْبَعّْدُو عْلَى الشَّهَوَاتْ دْيَالْ الدَّاتْ اللِّي كَيْحَارْبُو النّْفْسْ،

¹²وْبَاشْ تْعِيشُو حَيَاةْ مْزْيَانَة، فْوَسْطْ الشّْعُوبْ اللِّي مَا كَيْآمْنُوشْ بْاللَّهْ. وْهَكَّا، وَاخَّا يْتَّهْمُوكُمْ بْلِّي كَتْدِيرُو الشَّرّْ، غَيْشُوفُو أَعْمَالْكُمْ الْمْزْيَانَة وْغَيْعْطِيوْ الْعَزّْ لْلَّهْ فْالنّْهَارْ اللِّي غَيْجِي فِيهْ.

¹³وْعْلَى قْبَلْ الرَّبّْ، طِيعُو صْحَابْ السُّلْطَة وْطِيعُو الْمَلِكْ عْلَاحْقَّاشْ هُوَ الْحَاكْمْ الْكْبِيرْ،

¹⁴وْطِيعُو الْمْسْؤُولِينْ دْيَالُه اللِّي مْكَلّْفِينْ بَاشْ يْعَاقْبُو اللِّي كَيْدِيرْ الشَّرّْ، وْيْجَازِيوْ اللِّي كَيْدِيرْ الْخِيرْ.

¹⁵عْلَاحْقَّاشْ مُرَادْ اللَّهْ هُوَ تْدِيرُو الْخِيرْ بَاشْ تْسَكّْتُو النَّاسْ اللِّي مَا كَيْفَهْمُوشْ.

¹⁶عِيشُو بْحُرِّيَّة، وْمَا تْكُونُوشْ بْحَالْ هَادُوكْ اللِّي كَيْسْتَغْلُّوهَا بَاشْ يْسَتْرُو الشَّرّْ، وَلَكِنْ كُونُو بْحَالْ الْعْبِيدْ دْيَالْ اللَّهْ.

¹⁷حْتَرْمُو ݣَاعْ النَّاسْ، بْغِيوْ خُوتْكُمْ، خَافُو اللَّهْ، وْحْتَرْمُو الْمَلِكْ.

¹⁸آ الْعْبِيدْ، طِيعُو سْيَادْكُمْ وْحْتَرْمُوهُمْ بْزَّافْ كِمَا بْغَاوْ يْكُونُو، مَاشِي غِيرْ الْمْزْيَانِينْ وْالضّْرِيّْفِينْ، وَلَكِنْ حْتَّى الْخَايْبِينْ.

¹⁹حِيتْ الْوَاحْدْ كَيْتّْبَارْكْ بْالطَّاعَة دْيَالُه لْلَّهْ، إِلَا تْحَمّْلْ الْعْدَابْ اللِّي كَيْقَاسِيهْ وْهُوَ مْضْلُومْ.

²⁰حِيتْ آشْ مْنْ فْضَلْ عَنْدْكُمْ إِلَا دْرْتُو شِي دَنْبْ وْضْرْبُوكُمْ عْلِيهْ وْصْبَرْتُو؟ وَلَكِنْ إِلَا دْرْتُو الْخِيرْ وْتْعَدّْبْتُو عْلِيهْ وْصْبَرْتُو، رَاكُمْ مْبْرُوكِينْ قُدَّامْ اللَّهْ،

²¹وْهَادْشِّي عْلَاشْ عَيّْطْ لِيكُمْ اللَّهْ، عْلَاحْقَّاشْ حْتَّى الْمَسِيحْ تّْعَدّْبْ عْلَى وْدّْكُمْ، وْخْلَّا لِيكُمْ هَادْ الْمْتَالْ بَاشْ تْدِيرُو بْحَالُه.

²²«هُوَ عَمّْرُه مَا دَارْ شِي دَنْبْ، وْلَا عَمّْرْ فُمُّه نْطَقْ بْالْكْدُوبْ».

²³مْلِّي سْبُّوهْ مَا رَدّْشْ عْلِيهُمْ السّْبَّانْ، وْمْلِّي عَدّْبُوهْ مَا هَدّْدْهُمْشْ وَلَكِنْ خْلَّا كُلّْشِي فْيْدّْ هَادَاكْ اللِّي كَيْحْكَمْ بْالْعَدْلْ.

²⁴رَاهْ فْالدَّاتْ دْيَالُه هْزّْ دْنُوبْنَا فُوقْ الصّْلِيبْ، بَاشْ نْمُوتُو حْنَا عْلَى دْنُوبْنَا وْنْحْيَاوْ لْلتَّقْوَى. وْبْالْجْرَاحْ دْيَالُه تّْشَافِيتُو.

²⁵حِيتْ كْنْتُو بْحَالْ الْغْنَمْ الْمُّوضّْرَة، وَلَكِنْ دَابَا رَاكُمْ رْجَعْتُو لْلرَّاعِي اللِّي كَيْرَدّْ الْبَالْ لْنْفُوسْكُمْ وْكَيْحْضِيهَا.