Read Moroccan Standard Translation بُطْرُسْ اللّْوّْلَى 3 Bible Online

بُطْرُسْ اللّْوّْلَى 3 - Moroccan Standard Translation bible

بُطْرُسْ اللّْوّْلَى 3

¹الْفَصْلْ التَّالْتْ وْهَكَّا حْتَّى نْتُمَ آ الْعْيَالَاتْ، طِيعُو رْجَالْكُمْ، بَاشْ حْتَّى إِلَا كَانُو شِي وْحْدِينْ مْنّْهُمْ مَا كَيْآمْنُوشْ بْكْلَامْ اللَّهْ، غَتْرَبْحُوهُمْ لْلْإِيمَانْ غِيرْ بْالتَّصَرُّفْ دْيَالْكُمْ بْلَا مَا تْحْتَاجُو تّْكَلّْمُو،

²مْلِّي غَيْشُوفُو بْلِّي التَّصَرُّفْ دْيَالْكُمْ نْقِي وْمْحْتَرْمْ.

³وْخَاصّْ التَّزْيِينْ دْيَالْكُمْ مَا يْكُونْشْ مْنْ عْلَى بْرَّا، بْحَالْ تْصْوَابْ الشّْعَرْ الْغَالِي، وْالتَّزْيِينْ بْالدّْهَبْ، وْاللّْبَاسْ دْ الْحْوَايْجْ الرّْفَاعْ،

⁴وَلَكِنْ خَاصُّه يْكُونْ مْنْ لْدَاخْلْ، مْنْ الْقَلْبْ. زِينْ الرُّوحْ الضّْرِيّْفْ الْمْهَدّْنْ، هَادَا هُوَ الزِّينْ اللِّي مَا غَيْفْنَاشْ وْقِيمْتُه كْبِيرَة عَنْدْ اللَّهْ.

⁵رَاهْ مْنْ قْبَلْ، هَكَّا كَانُو كَيْتّْزَيّْنُو الْعْيَالَاتْ الْمْقَدّْسَاتْ اللِّي كَيْتّْكْلُو عْلَى اللَّهْ، حِيتْ كَيْطِيعُو رْجَالْهُمْ،

⁶كِيفْ كَانْتْ سَارَة كَتْطِيعْ إِبْرَاهِيمْ وْكَتْݣُولْ لِيهْ «سِيدِي». وْرَاكُمْ دَابَا وْلِّيتُو بْنَاتْهَا إِلَا كَتْدِيرُو الْخِيرْ وْمَا كَتْخَافُو مْنْ حْتَّى حَاجَة.

⁷حْتَّى نْتُمَ آ الرّْجَالْ، عِيشُو مْعَ عْيَالَاتْكُمْ وْدِيرُو بْحْسَابْ الطّْبِيعَة دْيَالْهُمْ الضّْعِيفَة، وْخَاصّْكُمْ تْحْتَرْمُوهُمْ حِيتْ حْتَّى هُمَ غَيْوَرْتُو مْعَاكُمْ نِعْمَةْ الْحَيَاةْ، بَاشْ حْتَّى حَاجَة مَا تْوْقَفْ ضْدّْ صْلَاتْكُمْ.

⁸وْفْاللّْخْرْ، كُونُو كُلّْكُمْ مْتَّافْقِينْ عْلَى رَأْيْ وَاحْدْ، وْحْسُّو بْبَعْضِيَّاتْكُمْ، وْبْغِيوْ بْعْضِيَّاتْكُمْ بْحَالْ الْخُوتْ، وْكُونُو حْنَانْ وْمْتْوَاضْعِينْ،

⁹مَا تْرَدُّوشْ الشَّرّْ بْالشَّرّْ، وْلَا الْمْعْيَارْ بْالْمْعْيَارْ، وَلَكِنْ بْالْعَكْسْ طْلْبُو اللَّهْ بَاشْ يْبَارْكْهُمْ، عْلَاحْقَّاشْ هَادْشِّي عْلَاشْ عَيّْطْ لِيكُمْ اللَّهْ بَاشْ تْوَرْتُو الْبَرَكَة دْيَالُه.

¹⁰حِيتْ مْكْتُوبْ فْكْتَابْ اللَّهْ: «اللِّي بْغَا يْتّْمَتّْعْ بْالْحَيَاةْ وْيْشُوفْ يَّامْ زْوِينَة، خَاصُّه يْحْضِي لْسَانُه مْنْ الشَّرّْ وْفُمُّه مْنْ كْلَامْ الْغْشّْ،

¹¹وْيْبَعّْدْ عْلَى الشَّرّْ وْيْدِيرْ الْخِيرْ، وْيْقَلّْبْ عْلَى الْهْنَا وْيْتْبْعُه.

¹²عْلَاحْقَّاشْ عِينِينْ الرَّبّْ عْلَى اللِّي مْتَّاقْيِينُه، وْوْدْنِيهْ كَيْسَمْعُو لْصْلَاتْهُمْ، وَلَكِنْ الرَّبّْ رَاهْ ضْدّْ هَادُوكْ اللِّي كَيْدِيرُو الشَّرّْ».

¹³وْشْكُونْ يْقْدَرْ يْآدِيكُمْ إِلَا كَانْتْ عَنْدْكُمْ الْغِيرَة بَاشْ تْدِيرُو الْخِيرْ؟

¹⁴وَلَكِنْ سْعْدَاتْكُمْ إِلَا كَانْ خَاصّْكُمْ تْتْعَدّْبُو عْلَى وْدّْ التَّقْوَى اللِّي كَتْدِيرُوهَا. مَا تْخَافُوشْ مْنْ اللِّي كَيْآدِيوْكُمْ وْمَا تّْخَلْعُوشْ،

¹⁵وَلَكِنْ قَدّْسُو الْمَسِيحْ اللِّي هُوَ الرَّبّْ فْقْلُوبْكُمْ، وْكُونُو دِيمَا مُوجُودِينْ بَاشْ تْجَاوْبُو ݣَاعْ هَادُوكْ اللِّي كَيْسْوّْلُوكُمْ عْلَى الرّْجَا اللِّي فِيكُمْ.

¹⁶وْدِيرُو هَادْشِّي بْالضّْرَافَة وْالْإِحْتِرَامْ وْبْضَمِيرْ نْقِي، بَاشْ اللِّي كَيْتّْكَلّْمُو بْالشَّرّْ عْلَى الْحَيَاةْ دْيَالْكُمْ الْمْزْيَانَة فْالْمَسِيحْ، يْتّْحَشّْمُو بْالْكْدُوبْ اللِّي كَيْتَّهْمُوكُمْ بِيهْ.

¹⁷حِيتْ خْيَرْ لِيكُمْ تْتْعَدّْبُو وْنْتُمَ كَتْدِيرُو الْخِيرْ، إِلَا كَانْ هَادَا هُوَ مُرَادْ اللَّهْ، وْمَا تْتْعَدّْبُوشْ وْنْتُمَ كَتْدِيرُو الشَّرّْ.

¹⁸عْلَاحْقَّاشْ حْتَّى الْمَسِيحْ تّْعَدّْبْ مَرَّة وَحْدَة عْلَى وْدّْ دْنُوبْ النَّاسْ، هُوَ الْبَارِي مَاتْ عْلَى وْدّْ الْمُدْنِبِينْ بَاشْ يْجِيبْنَا لْلَّهْ، مَاتْ فْالدَّاتْ وَلَكِنْ حْيَا بْالرُّوحْ الْقُدُسْ.

¹⁹وْبْهَادْ الرُّوحْ مْشَى بَشّْرْ الْأَرْوَاحْ الْمْسْجُونِينْ،

²⁰اللِّي مْنْ زْمَانْ رْفْضُو يْطِيعُو، مْلِّي كَانْ اللَّهْ كَيْتّْسْنَّاهُمْ بْالصّْبَرْ فْالْوَقْتْ اللِّي كَانْ فِيهْ نُوحْ كَيْصَاوْبْ السّْفِينَة، اللِّي نْجَاوْ فِيهَا بْالْمَا نَاسْ قْلَالْ، وْكَانُو غِيرْ تْمَنْيَة.

²¹وْهَادْشِّي رَاهْ مْتَالْ دْيَالْ الْمَعْمُودِيَّة اللِّي كَتْنَجِّيكُمْ دَابَا، وْهِيَ مَاشِي الْغْسِيلْ دْ الْوْسَخْ دْيَالْ الدَّاتْ، وَلَكِنْ هِيَ عَهْدْ بْضَمِيرْ صَالْحْ قُدَّامْ اللَّهْ بْالْبَعْتْ دْيَالْ يَسُوعْ الْمَسِيحْ،

²²اللِّي طْلَعْ لْلسّْمَا وْݣْلَسْ عْلَى لِيمْنْ دْيَالْ اللَّهْ، وْرَاهْ الْمَلَايْكَة وْالسُّلُطَاتْ وْالْقُوَّاتْ دْيَالْ السّْمَا كَيْخَضْعُو لِيهْ.